Maodez Glanndour
Dr Maodez Glanndour, wo am 7. März 1909 z Pongtrev uf d Wält cho und am 25. Novämber 1986 z Louannec gstorben isch, isch e französische katolische Prieschter und e bretonische Schriftsteller und Filosoof gsi. Vo Geburt här isch si Naame Louis Augustin Le Floc'h gsi, und uf bretonisch het men em Loeiz ar Floc'h gseit.
![](http://178.128.105.246/cars-http-upload.wikimedia.org/wikipedia/als/thumb/f/f3/Maodez_Glanndour_-_%C3%9Cbersetzig_us_dr_Bible.jpg/220px-Maodez_Glanndour_-_%C3%9Cbersetzig_us_dr_Bible.jpg)
Dr Loeiz ar Floc'h isch z Pontrev ufgwachse. Er isch uf s Prieschterseminaar z Saint-Brieuc ggange und het 1932 z Rom studiert. Er isch z Gwengamp Pfaarer gsi und 1953 Armepfleeger vo Bleun-Brug woorde. Z Louannec het dr Glanndour vo 1956 bis 1986 as Pfaarer gwürkt.
Sit denn won er z Saint-Brieuc dr Pfaarer Yann-Vari Perrot het leere könne, isch em ar Floc'h di bretonischi Identität wichtig gsi. Er het sich als yfrige Sproochaktivischt für die lang underdrückti bretonischi Sprooch ygsetzt. Für die bretonischi Zytschrift Feiz ha Breizh het er Stuck gschribe, bi dr Bretonische Bewegig Emsav mitgmacht und de bretonische Literaturzytschrifte Gwalarn und Al Liamm Sache gliferet. 1941 isch er bi dr Reform vo dr einheitliche Orthografy vom Bretonische drby gsi. Und er het au sälber es paar Zytschrifte für die Sprooch und di bretonischi Kultur usegää:
- Studi hag Ober
- Kaieroù Kristen
- Gwerin
- Ar Bedenn evit ar Vro
Dr Le Floc'h het bretonischi Volkslieder zämetreit, und er het sälber mit em Künschtlername Maodez Glanndour Gedicht i dr Mundart gschribe; dr Yann-Ber Piriou het von em gseit, er sig vilech dr bedüütendsch bretoonisch Dichter vo säber Zyt gsi. Er het filosofischi Arbete gschribe, und er het zäme mit em Gwilherm Dubourg Schrifte, bsunders setigi us dr Bible, is Betonische übertreit.
Dr Glanndour isch vo dr bretonische Kulturorganisazioon Kuzul ar Brezhoneg geert worde.
Wärch
ändere- Troellennoù Glas, Samlig vo Gedicht, 1937
- Gwalarn, Samlig vo Gedicht, 1939
- Komzoù bev, Samlig vo syne Gedicht, 1949, nöi usegää 1984
- Telennganoù, Samlig vo syne Gedicht, 1984
- Vijelezh an deiz diwezhañ, 1978
- Imram, 1941
- Milc'hwid ar Serr-Noz, 1946
- zäme mit em Jean-Pierre Foucher: Le Brasier des ancêtres, e zwöisprochigi Samlig vo Volkslieder, 1977
- An Aviel hervez sant Mazhe, s Evangelium vom Mathäus uf Bretonisch, 1952
- Diskuliadur sant Yann, d Offebaarig vom Johannes uf Bretonisch, 1953
- Va levrig skeudennoù, 1983
- Kanadeg evit Nedeleg
- Kregin-mor, in: Al Liamm, 1987
- Dre Inizi ar bed keltiek, in: A Liamm, 1991
Literatur
ändere- Lukian Raoul: Geriadur ar skrivagnerien ha yezhourien vrezhonek aet da Anaon a-raok miz Meurzh 1992. 1992. ISBN 978-2-7368-0034-5
- Annaig Renault: Maodez Glanndour, son chemin d'humanité au long de Komzoù bev. 2008. ISBN 978-2-86863-148-0