Cine asturianu
El cine presentóse n'Asturies siete meses depués de la so presentación pública en París. El cine nació oficialmente un 28 d'avientu de 1895 nel Salón Indien del Gran Café de París de la mano de los hermanos Lumière, inventores del so famosu cinematógrafu. Bien llueu presentóse n'Asturies el nuevu inventu, en concretu en Xixón nel marcu de les fiestes de branu. Asina, el sábadu 8 d'agostu de 1896 anunciábase una proyeición de cintes nel Teatru Xovellanos de Xixón, teatru que s'atopaba nel llugar que güei ocupa la biblioteca pública de la ciudá. El valiosu Teatru Xovellanos de Xixón cuntaba yá dende 1889 con enerxía llétrico, siendo'l primer teatru d'España qu'adoptó esti adelantu y por ello yera l'escenariu más afayadizu pa les primeres proyeiciones cinematográfiques.
![](http://178.128.105.246/cars-http-upload.wikimedia.org/wikipedia/commons/thumb/3/30/Cinemaaustralia.jpg/200px-Cinemaaustralia.jpg)
![](http://178.128.105.246/cars-http-upload.wikimedia.org/wikipedia/commons/thumb/7/77/Tatro_Jovellanos_Gij%C3%B3n.jpg/200px-Tatro_Jovellanos_Gij%C3%B3n.jpg)
Aniciu
editarNaquella dómina la prensa asturiana yera sorprendentemente mui escasa nel anunciu d'eventos cinematográficos polo que se dispón de poca información sobre'l comienzu del cine n'Asturies. Y ye que'l cine entá nun se consideraba, al menos por delles élites, como un arte sinón como una simple mercancía de feriantes, una atraición de fiesta llocal o un negociu más de barracones ambulantes. En xunetu de 1897 arriben a Xixón los portugueses César Marqués y Alexandre de Azevedo instalando'l so cinematógrafu Lumière nel baxu del Paséu de Begoña 33, onde proyectaríen al públicu durante aquel branu básicemente películes del catálogu Lumière. Ye de señalar que'l cinematógrafu Lumière sirvía lo mesmo pa proyeutar que pa impresionar y positivizar el material.
Ye por ello que Marqués y Azevedo, gracies a les magnífiques instalaciones téuniques pal reveláu que poseía la xixonesa Sociedad Electro-Fotográfica de la cai Corrida 37, nel mesmu branu de 1897 filmaríen les primeres tomavistes conocíes d'Asturies: Vista de un ruempefoles tomada desde Santa Catalina y Vista del Campu Valdés tomada a la salida de misa de la ilesia de San Pedro, esta última filmada con seguridá el domingu 12 de setiembre de 1897. La proyeición d'estes cintes resultó tou un ésitu de públicu, n'especial la de la surtida de misa yá que nella apaecíen filmaes les persones más relevantes y conocíes del Xixón d'entós.
La finalidá de rodar les salides masives de mises o fábriques tenía una finalidá comercial pues naquellos primeros años de la filmación garantizábase un públicu pa les proyeiciones, deseosu de vese espeyáu en movimientu nuna gran pantalla. El xixonés Arturo Truan y Vaamonde (1868 – 1937), artista ya industrial, sería ensin dulda ún de los aficionaos qu'acudía a les proyeiciones del Paséu Begoña naquellos años yá qu'al poco, en 1989, fizo él mesmu gracies a un catálogu de la casa Lumière de Lyon, nada menos qu'un cinematógrafu propiu. Filmaría en 1899 Vistas gijonesas dientro d'una filmografía curtia pero valiosa.
El nuevu sieglu
editarA fines del sieglu XIX, Xixón yera una ciudá en plena espansión económica ya industrial con una burguesía inquieta y abierta a los adelantos del progresu y la cultura, que darréu vio nel cine un instrumentu dinamizador y afayadizu pa difundir los nuevos proyeutos comerciales como'l de la Esposición Asturiana. Pela so parte Uviéu siguía cola so imaxe secular y clariniana de ciudá dormida y levítica, un alma que s'alarma énte cada innovación, que se chancia del modernismu. De toes formes, Uviéu yá conociera del cinematógrafu en 1896 al empar que Xixón pero nun sería hasta 1900 cuando los dueños del Café Pasaje, pegáu a la cai Uría, ufiertaren sesiones de cine al públicu gracies a un cinematógrafu Lumière que teníen comprao na Esposición Universal de París esi mesmu añu. Otru pioneru del cine n'Asturies foi Julio Peinado y Alonso, profesor de fotografía formáu na Sociedad Electro-Fotográfica de Xixón, toa una escuela de cine n'aquel tiempu, y que rodó en 1903 la cinta Salida de las obreras de la fábrica de tabacos de Xixón. Otru interesantísimu trabayu d'él ye Día de fiesta en Candás, película de 1910 dixebrada en 5 capítulos.
En 1903 ábrese en Xixón el Salón Luminoso, llocal destináu a espectáculos y cinematógrafu, con dos sedes, una na cai Corrida n'iviernu y otra nel Paséu Begoña pel branu. El Salón Luminoso pasó a denomase depués Cine Modernista, en 1914 Salón Doré y yá na posguerra denomóse Salón Imperio y constituyó ún de los primeros templos importantes del cine n'Asturies. Nesti Salón Luminoso, estrenóse'l 22 de xunetu de 1905 la primer película asturiana de ficción: El robo de fruta, de Javier Sánchez Manteola (Boriñes 1877 – 1938), cinta de la que güei nun se conserva denguna copia. El nacimientu del cine con argumentu o de ficción, foi un procesu natural d'evolución del mercáu, al dir perdiendo atractivu pal públicu les yá reiteraes cintes de vistes panorámiques de ciudaes, monumentos, pueblos o romeríes, interés ensin embargo que nunca perdieron estos documentales nos ámbitos de la emigración asturiana, yá que siempre se recibíen n'América con gran interés.
El robo de fruta, de Javier Sánchez Manteola, yera una película cómica xixonesa, mui al gustu de los temes favoritos de les primeres películes: la escorribanda-escorridiella de lladrón y policíes, elementu básicu de la comedia burllesca de moda, con cayíes rares, voltiaderes, solmenaes, esparavanes y enfáticos saltos d'obstáculos. L'aición d'"El robo de fruta"" sitúase na finca de los Bustillo en Somió-Xixón, dende la que los lladrones escapen pela llamuerga de la quinta de los Pidal. Los guardies, en llegando al ríu Piles, atopen con Rigueletu, un pescador, y con Pilonga, otru xixonés famosu, valtiándolos a toos pal agua. La cinta termina na puente de Viñao y ye un exemplu del adelantu téunicu y artísticu qu'algamó la industria cinematográfica asturiana nel añu 1905, diez años depués de la invención del cine.
Pela so parte n'Uviéu había un creciente interés popular hacia'l cine gracies a les proyeiciones nel Café del Pasaje y a los barracones ambulantes mentanto les fiestes y pese al desinterés oficial polo cinematográfico. Asina, el Teatru Campoamor que cuntaba con allumáu llétrico dende la so inauguración en 1892, nun llegaría a ufiertar cine hasta 1925 y ello gracies al empresariu Juan Antonio Fandiño y Pérez, promotor del so famosu salón de cine que tenía entamáu en precariu dende 1908 nel Campu San Francisco. El Teatru Celso, inauguráu en 1906 frente la estación del Vasco-Asturianu, foi otru de los centros d'exhibición na capital yá que al poco convirtióse en llocal cinematográficu. Dapoco, los barracones ambulantes de cine n'Asturies diben dando pasu a nuevos y modernos teatros y salones de cine, asina abriéronse en Xixón los teatros Dindurra y Robledo (1917) y ameyorábense otros como'l Salón Luminoso qu'en 1914 como yá se dixo camudóse en Salón Doré. N'Avilés construyéronse el Teatro-Circo de Somines, el Salón Iris y yá en 1920 el tan deseyáu Teatru Palacio Valdés. Otros conceyos como Mieres, Tinéu, Llangréu, Carreño, Grao, Noreña, Sotrondio, Parres o Bual construyeron tamién bien aína los sos cines.
La edá d'oru
editarLos años 1920 puen calificase como la edá d'oru del cine asturianu, enantes de la llegada del cine sonoru. La emigración asturiana n'América ufría a les películes asturianes un inmensu mercáu d'esportación yá que siempres se recibíen ellí con entusiasmu. Munchos países, dende L'Arxentina a Los Estaos Xuníos, o dende Méxicu a Cuba proyeutaron les películes asturianes, dalgunes filmábense dafechu pal mercáu americanu como por exemplu Vistas de Asturias, proyectada en Buenos Aires en 1924.
Una de les cintes más señeres foi'l documental Asturias rodáu en 1925 por Romualdo Alvargonzález Lanquine (Xixón, 1880 – 1936), promotor de la I Feria de Muestres Asturiana de 1924. El documental Asturias constaba de 9 partes y foi una intelixente forma d'usar el cine como mediu de promoción del progresu industrial y turísticu asturianu. Otres películes relevantes del cine asturianu de los años 1920 foron Cuento de lobos (1925), José (1925, cinta estrenada con ésitu nos Estaos Xuníos), Bajo las nieblas de Asturias (1926), La sirena del Cantábrico (1926), Carolina la neña de plata (1927), Mieres del Camino (1927) o Yá t'oyí (1928)…
Nos años 1920, Asturies ocupaba ún de los primeros puestos na producción de películes depués de Madrid y Valencia. La llegada del cine sonoru aumentó los costos de les películes y los empresarios asturianos yá nun veíen mui claro arriesgar tanto nel negociu del cine, especialmente depués de la crisis de 1929. Asina, munches productores asturianes pesllaron pasando la industria del cine sonoro a depender básicamente de Madrid y Barcelona.
Si bien la producción asturiana baxó abondo nos años 1930, hai que destacar con too películes como Dos muyeres y un Don Juan (1933) y Sidra y picardía (1934). El cine sonoro esixía la renovación de los vieyos teatros y la instalación de mayores pantalles. Asina, el Teatru-Circu Obdulia de Xixón convirtióse en 1930 nel Cine Campos Elíseos. El vieyu Cine Versalles camudó en Cine Goya y abrieron otros nuevos como'l Cinema Rivero, el Roxy o l'Avenida, toos ellos en Xixón. De los 119 cines esistentes n'Asturies enantes de la Guerra del 36 más de la mitá d'ellos siguieron proyectando películes mudes por carecer d'instalaciones modernes pal cine sonoru. Na posguerra, el cine siguió medrando y abriendo nuevos llocales yá que yera entós cuasi la única vía d'evasión y ociu pa muncha xente. El recordáu Teatru Arango, el Cine Hernán Cortés, el Capitol, el Principado, el Pombo, l'Aramo… y tantos otros tristemente desapaecíos formen parte de la nuestra historia personal, la del nuestru recuerdu furtáu pa beneficiu de los intereses de la especulación urbanística ya inmobiliaria que nos privó pa siempre non yá de los nuestros recuerdos d'infancia sinón de tan céntricos espacios pa la cultura y pal arruelu.
El cine entra nos años 1960 n'Asturies nuna escayencia en competencia creciente cola televisión. N'abril del añu 2005 naz nel Atenéu de Madrid el primer Festival de Cine Asturianu cola idea de celebrar el primer Centenariu del cine asturianu.
Ver tamién
editar
Referencies
editarEnllaces esternos
editar
- Wikimedia Commons tien conteníu multimedia tocante a Cine asturianu.