Brexit
C'l artìcul chè 'l è scrit in
Miranduléś |
Al referéndum par far star incóra al Régn Unî in dl'Ugnòṅ Européa, cgnusû anc cuma Brexit (British Exit), 'l è stâ 'n referéndum ch'a s è tgnû in dal Régn Unî e a Gibiltèra al 23 ad Śugn dal 2016 par decìdar s'al stat al gh'iva da 'rmàgn'r incóra 'n mémbar dl'Ugnòṅ Européa o s'l éra méj lasàr-la dòp al sò ingrès in dal 1973.
![](http://178.128.105.246/cars-http-upload.wikimedia.org/wikipedia/commons/thumb/e/e4/United_Kingdom_EU_referendum_2016_area_results_2-tone.svg/270px-United_Kingdom_EU_referendum_2016_area_results_2-tone.svg.png)
Al referéndum 'l è stâ vlû da 'l partî cunservadōr dal premier David Cameron. Al tèst dla dmanda 'l è stâ qvést chè:
David Cameron al s è mis da la banda ad qvéi ch'i vlìv'n armàgnar in dl'UE mént'r al sò culéga 'd partî Boris Johnson, èx sìndig ad Lóndra, 'l éra da cl'atra banda acsè cuma Nigel Farage dal Partî par l'Indipendénsa dal Régn Unî, aleâ dal Muimènt Sinc Stéli a 'l parlamènt européo. Al leader di laburìsta Jeremy Corbyn invéci 'l éra par 'l armàgnar ma in na manéra tévda. Al 16 ad Śugn, in dal mèś dla campàgna referendària, la parlamentàra laburìsta Jo Cox, durànt un cumìsi par 'l armàgnar, l'è stada masàda in dal West Yorkshire ad òpra 'd 'n óm ad sinquànta-dū an dal pòst ciamâ Thomas Mair ch'a dita di testimòni al gh sigàva adrē «Prima i britànic!» mént'r al la scurtlàva e a gh sparàva adòs[1].
Riśultâ
Gl'eletōr dal Régn Unî ciamâ a vutàr p'r al referéndum i èṅ stâ 46.501.241. Ad qvist chè 33.578.016 (72,2%) i èṅ andâ a vutàr. I vōt vàlid i èṅ stâ 33.551.983 mént'r i vōt nul/schédi biànchi i èṅ stâ 26.033 (0,08%).
Sarnìda | Vōt | Persentuàla |
---|---|---|
Armàgnar mémbar dl'Ugnòṅ Européa | 16.141.241 | 48,1% |
Lasàr l'Ugnòṅ Européa | 17.410.742 | 51,9% |
Tutàl di vōt vàlid | 33.551.983 | 100,0% |
Di quàtar stat dal Régn Unî, dū i aṅ vutâ par lasàr (Gàles e Inghiltèra anc s'la regiòṅ ad Lóndra l'éra p'r armàgn'r p'r al 59,93%) méntar gl'àtar dū p'r armàgnar (Scòsia e Irlànda da Nòrd). La sità 'd Gibiltèra, ch'la s cata in dla penìśula ibèrica e ch'l'è stada cuntàda insém a i vōt dl'Inghiltèra, l'à vutâ p'r armàgn'r a 'l 95,9%. Al regiòṅ ch'i éran più da la banda dal lasàr, tuti cun dagnóra 'l 60%, i èṅ stadi al Midlands Urientàli, al Midlands Usientàli e l'Inghiltèra dal Nòrd-Èst.
Nasiòṅ dal Régn Unî | Partecipasiòṅ | Remain (Armàgnar) | Leave (Lasàr) |
---|---|---|---|
Gàles | 71,7% | 772.347 (47,5%) | 854.372 (52,5%) |
Inghiltèra + Gibiltèra | 73,0% | 13.266.996 (46,6%) | 15.188.406 (53,4%) |
Irlànda dal Nòrd | 62,7% | 440.707 (55,8%) | 349.442 (44,2%) |
Scòsia | 67,2% | 1.661.191 (62,0%) | 1.018.322 (38,0%) |
Nòti
- ↑ Cupàda na deputàda laburìsta anti-Brexit Cox: Al gh'à dâ adòs sigànd «Britain first!» Adnkronos, 16 ad Śugn dal 2016