Fríðrikur X
Frederik X ella Fríðrikur X (Frederik André Henrik Christian, føddur 26. mai 1968 í Keypmannahavn) er kongur av Danmark frá 14. januar 2024, sonur Margrethu II Drotning og Heindrik prins. Fríðrikur X er giftur við Mary drotning og saman eiga tey fýra børn, tann elsti er Kristian krúnprinsur.
![](http://178.128.105.246/cars-http-upload.wikimedia.org/wikipedia/commons/thumb/e/e5/Crown_prince_Frederik_of_Danmark_in_V%C3%A1gur%2C_Faroe_Islands.jpg/280px-Crown_prince_Frederik_of_Danmark_in_V%C3%A1gur%2C_Faroe_Islands.jpg)
Týðandi partur av arbeiðnum hjá konginum er at umboða Danmark og at virka til frama fyri donsk áhugamál í útlondum. Tað ger hann á almennum vitjanum hjá útlendskum statsleiðarum og tá hann tekur lut í donskum vinnuátøkum í útlondum og í tiltøkum innan ítrótt og mentan.
Lívssøga
rættaSum eldri sonur Margretu drotningar og Heindriks prins er Fríðrikur danskur ríkisarvingi. Hann er í móðurætt fimti maður frá Kristjani kongi 9., fyrstikongurin av Glücksborg-ættini. Hann er tí sætta úr hesi ætt á Danmarkar trónu. Hann er somuleiðis fimmti maður frá Viktoriu drotning.
Útbúgvingar
rættaHann varð útbúgvin Cand.scient.pol. í 1995 eftir at hava lisið á Århus Univeristet og á Harvard í USA. Harafturat hevur hann tænt í danska herinum, flogvápninum og í sjóverjuni. Hann hevur holla hernaðarliga útbúgving innan allar tríggjar greinirnar í donsku verjuni, seinast serútbúgving í froskmannaliðinum í sjóverjuni. Hann er offiserur í øllum trimum vernum. Í 2010 varð hann útnevndur kommandørur í Sjóverjuni og oberstur í Herinum og Flogvápninum.
Ítróttamaður
rættaAfturat bókliga lesnaðinum, umfatandi hernaðarligu yrkisbreytini og teim mongu almennu skyldunum hevur Fríðrikur X eisini givið sær stundir til at gera vart við seg sum fjølbroyttur ítóttar- og náttúrumaður. Hann er góður á skíðum og í tennis, hann hevur runnið maraton, siglt í HM fyri seglbátar, og so hevur hann ferðast fleiri túsund kilometrar á hundasleðu á tí stóru Sirius-rannsóknarferðini í ár 2000.
Hann íðkar kappsigling í bátasløgunum Dreki og Farr 40. Hann hevur luttikið við DM, EM og HM. Til EM í 2003 gjørdist hann nummar fýra, á DM 2011 lá hann á einum øðrum plássi nærum alla kappingina, men endaði tó á einum fjórðaplássi.
Krúnprinsurin tók saman við 6 vinmonnum lut í 4 mánaðar longu Sirius-sleðurannsóknarferðini norður um Grønland, úr Thule i í útnyrðingshorninum til Daneborg í ein landnyrðing. Túrurin var 2.795 km langur við 45 hundum, sleðum, tjøldum, matarskamti og 40 kuldastigum.