Marielle Franco
Marielle Franco (27 julio 1979 - 14 marto 2018) esis brazilana politikistino, sociologo, feministo ed aktivisto por homala yuri.
![](http://178.128.105.246/cars-http-upload.wikimedia.org/wikipedia/commons/thumb/6/68/Marielle_Franco.jpg/200px-Marielle_Franco.jpg)
El esis, de januaro 2017 til sua morto en marto 2018, konsilisto por la sinistrana partiso Partido Socialismo e Liberdade (PSOL) en la konsilistaro di Rio de Janeiro.
Franco naskis e kreskis en Maré, un ek le maxim granda "favela" (quarterachi) di Rio de Janeiro, ube el habitis til sua morto. En 2000, amikino elua mortis pro neintencita kuglo dum pafado inter la polico e kriminala bandi; elua morto esis por Franco motivo okupar su pri homala yuri. En 2002 el komencis studiar sociala cienco che la Katolika Universitato di Rio de Janeiro. El ganis grado pri publika administrado che la Federala Universitato di Fluminense.
Franco identifikis su kun la LGBT-komuneso. El laute kritikis la violentoza agado dal nacionala polico e la polico-asociita milici en le "favela" di Rio de Janeiro. Lor la municipala elekti di 2016 el recevis 46.500 prefero-voti ed esis tale un ek la kin maxim populara kandidati en Rio de Janeiro.
Ye 14 marto 2018, Franco ed elua automobilo-duktero, Anderson Pedro Gomes, pafesis tilmorte en la centro di Rio de Janeiro. Elua morto generale kondamnesis en Brazil e duktis a protesti en adminime dek brazilana urbi.