Pelaagsch Eilannen
De Pelaagschen Eilannen (ital.: Isole Pelagie) sünd en Inselgrupp in’t Middelmeer. Se is vulkaansch tostannen kamen un liggt twüschen Tunesien, Malta un Sizilien.
![](http://178.128.105.246/cars-http-upload.wikimedia.org/wikipedia/commons/thumb/2/2e/Pelagie_Islands_map.png/220px-Pelagie_Islands_map.png)
Na de Geografie höört de Eilannen to’n afrikaanschen Kontinent, politisch tellt se aver to de italieenschen Region Sizilien, nipp un nau to de Provinz Agrigent. De Eilannen leegt an’n 35. Bredengrad un stellt dormit de süüdlichste Steed vun Italien dor. De Naam kummt vun dat greeksche Woort pelaghia för „Eiland in de See“ .
To de Pelaagschen Eilannen höört drei Eilannen Lampedusa, Linosa un Lampione, de tohopen de Gemeen Lampedusa e Linosa billt. Dat lüttste Eiland Lampione is nich bewahnt. Op de annern beiden Eilannen leevt de Minschen vun de Fischeree un vun de Bueree, tonehemen aver ok vun’n Tourismus.
Vör allen in de Sommermaanden is dat Klima vun grote Hitt un wenig Nedderslag bestimmt. Dat Plantenriek is afrikaansch prägt. Op de Eilannen wasst vele Kaktusoorden, de dat in Europa nich geven deit. Eenige Strännen warrt vun de Karettschildkröten to’n Afleggen vun jemehr Eier nütt. Dele vun de Pelaagschen Eilannen sünd 2002 ünner Naturschuul stellt worrn, üm de vun’t Utstarven bedrauhte Deertenoort to schulen.Dat Rebeet warrt nu Naturreservat Riserva Marine Isole Pelagie nöömt.
De Eilannen Lampedusa un Linosa warrt jeden Dag vun de siziliaanschen Havenstadt Porto Empedocle ut mit en Fährschipp anstüert. Na Lampedusa gifft dat ok jeden Dag en Fleger vun Palermo ut. Wiel de Sommersaison warr ok vun annere italieensche Grootstäder Flöög anboden.