苗僑偉(三哥)、張兆輝、吳岱融、王敏德、黃宗澤(Bosco)、吳卓羲、伍詠薇、王敏奕、陳凱琳、黃智雯、高海寧等今日喺將軍澳為邵氏與優酷合作網劇《飛虎極戰》舉行開鏡拜神。
呢部網劇好多型佬,雖然全部年過半百,但個個身形、樣貌都keep得好fit,三哥仲爆張兆輝最fit,已經練成六舊腹肌,八舊腹肌指日可待。三哥話:「佢係影帝級,我哋私下好老友,但從未合作過,講到拍劇佢都等咗我三十年。」而張兆輝就讚三哥係「宇宙最型」,佢話唔怕辛苦:「今次好多資源,大家輪流拍,應該唔會太辛苦。(酬勞好高?)三哥應該加唔少。」反而,36歲黃宗澤同37歲吳卓羲就未成功練成腹肌,話要再繼續努力。對於舊愛胡杏兒喺母親節宣佈懷孕,Bosco自認衰仔,未有傳短訊問候對方,但亦大方送上祝福,佢話:「恭喜晒,好戥佢開心,希望BB快高長大,三年抱兩。」Bosco被取笑落後好多,佢即耍太極話自己要日日開工,個人都未抽離,所以冇時間拍拖。