大台劇《溏心風暴3》今晚舉行煞科宴,主要演員黃宗澤(Bosco)、王浩信、岑麗香、陳敏之、李司棋、米雪、關菊英、夏雨等人均有現身,而喺今個月7號34歲生日嘅王浩信,就獲大會送上蛋糕,補祝生日,場面好熱鬧。王浩信話自己喺葡萄牙拍煞科戲時,收到岑麗香用通告包裝嘅禮物,令佢非常難忘。而香香就話老公有去葡萄牙探班,仲趁機遊當地。
而場內另一焦點人物,就係敏之個仔雷子樂(雷冬至),佢好乖,跟住媽咪滿場飛,又任抱,人人都想一親佢「香澤」。敏之話自己產後復工至今,都冇乜好好唞過,會趁住提早煞科,好好放一個月假,趁機同老公外遊,二人世界。Bosco又提到因為自己拍《溏心3》時,又有網劇《飛虎極戰》喺身,好彩劇組好幫手,安排佢拍完喺《溏心3》啲戲份,先至去拍《飛虎極戰》,等佢唔使劇疊劇。已經離巢嘅佢話無論係TVB定其他工作,佢都會考慮接,仲話已經排���到明年5月。講到佢咁忙,會唔會冇時間拍拖?佢話自己唔止感情,係連親情同友情都顧唔掂,仲話呢排見得最多就係「三哥」苗僑偉同吳卓羲,不過佢就話同日籍女友JUN嘅異地戀靠電話維繫感情,所以冇問題。另外,夏天到,正當人人嗌瘦身嘅時候,Bosco反行其道嗌增肥,認真玩嘢!佢坦言要長期健身keep fit的確唔容易,但佢覺得可以肥番少少,可以令佢身形更加好睇,所以家陣一起身就食。不過,講完佢又話自己想肥都肥唔到,即係點呀……![](http://178.128.105.246/cars-http-web.archive.org/web/20170714212002im_/http://staticlayout.apple.nextmedia.com/web_images/layout/art_end.gif)