Mein Kampf
Mein Kampf
| |
---|---|
![]() | |
Skrywer | Adolf Hitler |
Land | ![]() |
Taal | Duits |
Onderwerp | outobiografie |
Uitgewer | Eher Verlag |
Uitgegee | 18 Julie 1925 |
Medium | Druk (gebind & sagteband) |
Bladsye | 720 |
ISBN | 978-1495333347 |
Vervolg | 'Zweites Buch' |
Mein Kampf (Afrikaans: My stryd) is die grondleggende politieke werk van Adolf Hitler, waarin hy teen die agtergrond van sy outobiografie die grondbeginsels van sy ideologie en partypolitieke agenda uiteensit.
Ontstaan
![](http://178.128.105.246/cars-http-upload.wikimedia.org/wikipedia/commons/thumb/d/d2/Minha_Luta_-_Mein_Kampf_-_Adolf_Hitler.jpg/220px-Minha_Luta_-_Mein_Kampf_-_Adolf_Hitler.jpg)
![](http://178.128.105.246/cars-http-upload.wikimedia.org/wikipedia/commons/thumb/c/c9/Erstausgabe_von_Mein_Kampf.jpg/220px-Erstausgabe_von_Mein_Kampf.jpg)
![](http://178.128.105.246/cars-http-upload.wikimedia.org/wikipedia/commons/thumb/0/00/FrMeinKampf20050214.jpg/220px-FrMeinKampf20050214.jpg)
Hitler het Mein Kampf in 1924 tydens sy vestingstraf in die gevangenis van Landsberg in Opper-Beiere geskryf. Alhoewel Rudolf Hess die mede-outeur was, het sy naam nie op die omslag verskyn nie.
Hitler het in die werk die ontwikkeling en politieke doeleindes van die destydse Nasionaal-Sosialisme beskryf en onder meer die Protokolle van die Wyses van Sion as bron gebruik. Hierdie anti-Semitiese werk behandel 'n beweerde wêreldwye komplot van Joodse kringe en was destyds lankal as 'n onwaarheid ontmasker.
"Mein Kampf" sou oorspronklik onder die titel Viereinhalb Jahre [des Kampfes] gegen Lüge, Dummheit und Feigheit ("Vier en 'n half jaar [se stryd] teen leuens, dommigheid en lafhartigheid") verskyn het. Terwyl die eerste deel deur Hitler tydens sy tronkstraf vir sy medegevangenes Emil Maurice en Rudolf Heß gedikteer is, het die tweede deel ná Hitler se voortydige vrylating in Desember 1924 in 'n villa op die bergspits Obersalzberg ontstaan. Die eerste boekdeel (Eine Abrechnung) het in Julie 1925 verskyn, die tweede (Die nationalsozialistische Bewegung) is in Desember 1926 gepubliseer. Tot 1930 was Mein Kampf in twee boekdele teen 'n prys van 12 Reichsmark elk beskikbaar en is daarna in een boekdeel gepubliseer, wat dieselfde formaat soos die meeste Bybeluitgawes gehad het.
Die oorspronklike teks is gedurende sy twintigjarige wysigingsgeskiedenis tussen 1925 en 1945 verskeie kere verander en uitgebrei. 'n Aantal teksdele, wat op stilistiese en inhoudelike vlak as verwarrend beskou kon word, is blykbaar deur anonieme redigeerders verwerk.
Otto Strasser, wat saam met sy broer Gregor Strasser en Hitler in Landsberg in die tronk was, het in sy boek Hitler und ich ("Hitler en ek") die eerste uitgawe van Mein Kampf as 'n konglomeraat van "sleg verwerkte politieke lektuur" beskryf, wat onder meer die beskouings van Karl Lueger, Georg von Schönerer, Houston Stewart Chamberlain, Paul de Lagarde en Alfred Rosenberg ten opsigte van buitelandse beleid, asook "antisemitiese woedeuitbarstings van Julius Streicher" bevat.
By 'n tekskritiese of historiografiese ontleding van Mein Kampf moet dus rekening gehou word met die feit dat Hitler se politieke en literêre opvattings van die 1920's teen die veertigerjare moontlik verander het.
Inhoudelike oorsig
- Hitler pleit vir die aansluiting van Oostenryk by die Duitse Ryk.
- Die Nasionaal-Sosialisme se kenmerkende antisemitisme word breedvoerig behandel. Hitler pleit vir die uitwissing van - volgens sy bewering - "Joodse" marxisme en ontwerp die ideologie van 'n sogenaamde "nasionale sosialisme", waarin "rassestyd" die "klassestryd" sou vervang. Hierdie ideologie sou ook gebruik word om die Hitler-beweging vir Duitse arbeiders aantreklik te maak.
- Hitler lê daarnaas die klem op die politieke stelsel van die destydse Sowjetunie, wat hy as "bolsjewisme" beskryf en deur middel van 'n militêre veldtog (wat ook rasseoorlog genoem word) wil verpletter.
- Die verowerde gebiede in die ooste sou as "lewensruimte" vir die Duitse volk benut word.
- Om 'n oorlog op twee fronte (soos gedurende die Eerste Wêreldoorlog) te vermy, pleit Hitler vir 'n politieke ooreenkoms met Engeland.
- Hitler kritiseer die westelike parlementêre stelsel op 'n polemiese manier en pleit vir die daarstelling van 'n Germaanse leierstaat (die demokratiese stelsel, wat teenstrydig met die ware belange van die "volksgemeenskap" sou wees, moet volgens Hitler afgeskaf word).
- In die tweede boekdeel word hierdie "gedagtes" vermeng tot die partypolitieke program van die Nasionaal-Sosialistiese Duitse Werkersparty (NSDAP).
- Die outobiografiese teksdele en 'n oorsig oor die geskiedenis van die NSDAP is ná 1924 uit die nuwe uitgawes van Mein Kampf verwyder.
(Bron: nationalsozialismus.de)
Verspreiding
Van die "volksuitgawe", wat in een boekdeel verskyn het, is tot by Hitler se magsoorname in Januarie 1933 287 000 eksemplare teen 'n prys van 12 Reichsmark verkoop. Hitler se tantieme daarop was tien persent. Die boek het daarna 'n blitsverkoper geword. In die tydperk tussen Februarie en 31 Desember 1933 is sowat 1,5 miljoen eksemplare verkoop. 'n Spesiale uitgawe in blindeskrif het in dieselfde jaar verskyn. Vanaf 1936 het Duitse pare by hulle bruilof Mein Kampf in plaas van die Bybel as huweliksgeskenk ontvang.[1] In 1939 het die totale oplaag 5,45 miljoen eksemplare beloop, in 1943 10,24 miljoen. Die boek is grotendeels as huweliksgeskenk deur die staat versprei. Om hierdie winsgewende verkope te beskerm, is danksy Hitler se invloed 'n wet verorden, waarvolgens die boek nie tweedehands verkoop moes word nie - anders sou huwelikspare hulle eksemplare moontlik aan antikwariate verkoop het.
Ná die einde van die Tweede Wêreldoorlog is daar vermoedelik enkele miljoene eksemplare saam met portrette van Hitler en ander herinnerings aan die NSDAP-bewind vernietig.
Kavgam, die Turkse vertaling van Mein Kampf, is in laat 2004 byna gelyktydig deur vyftien Turkse uitgewers gepubliseer en teen lae pryse verkoop. Na ramings is tussen 50 000 en 100 000 eksemplare verkoop. In 'n nawoord word die Koerde as 'n etniese groep beskryf wat nou verwant aan die Joodse volk sou wees.
Regtelike aspekte
Aangesien Adolf Hitler tot sy dood woonagtig was in Prinzregentenplatz, München, is sy fortuin ná die oorlog deur die geallieerde magte en uiteindelik deur die Duitse deelstaat Beiere gekonfiskeer. Volgens die Beierse owerhede is dié deelstaat ook die eienaar van alle outeursregte ten opsigte van Mein Kampf. Kopiereg op die werk het volgens Duitse en Europese kopieregwetgewing op 31 Desember 2015, sewentig jaar ná Hitler se dood, verval, en die oorspronklike teks is tans toeganklik vir uitgewers.[2] Die deelstaat Beiere het oorspronklik geregtelike stappe teen uitgewers geïnisieer wat volledige uitgawes of uitgawes sonder kommentaar gepubliseer het.
In Engelssprekende lande, in Israel en in Skandinawië het reeds voor die verval van kopiereg herdrukte uitgawes verskyn aangesien die deelstaat Beiere hier nie oor die outeursregte beskik het nie. Die verkoop van tweedehandse boeke en die privaatbesit van Mein Kampf was in Duitsland nogtans altyd wettig.
Nuwe publikasie in 2015
Die deelstaat Beiere het in 2012 aangekondig dat twee uitgawes van Mein Kampf in 2015 gepubliseer sal word - waarvan een uitgawe vir skole en 'n tweede wat van kommentare deur geskiedkundiges voorsien sal wees. Met hierdie stap probeer Beiere kommersiële uitgewers voorspring. Die Joodse gemeenskap in Duitsland het dié besluit verwelkom.[3]
Verwysings
- ↑ Der Tagesspiegel (Berlyn): Was erbt Hitlers Familie? (3 April 2003) Besoek op 25 Mei 2007
- ↑ BBC News, 1 Januarie 2016: Copyright of Adolf Hitler's Mein Kampf expires. Besoek op 1 Januarie 2016
- ↑ "www.rt.com: German Jews: Republishing Mein Kampf 'good idea', 26 April 2012". Geargiveer vanaf die oorspronklike op 29 April 2012. Besoek op 27 April 2012.
Eksterne skakels
Wikimedia Commons het meer media in die kategorie Mein Kampf.
- (de) Volledige inhoud van Mein Kampf