Seo Jae-pil
![](http://178.128.105.246/cars-http-upload.wikimedia.org/wikipedia/commons/thumb/d/db/Young_Philip_Jaisohn.jpg/220px-Young_Philip_Jaisohn.jpg)
Dr Seo Jae-pil (änglisch Philip Jaisohn, koreanisch 서재필, hanja 徐載弼; 7. Januar 1864 z Bosung, denn in Korea, hüte in Südkorea; † 5. Januar 1951 z Philadelphia, USA) isch e koreanische Unabhängikäitsaktivist, Politiker, Liberale, Arzt, und Journalist gsi.[1]
Lääbe und Wärk
Noch em abverheite Gapsin-Putsch vo 1884, won e Gruppe vo koreanische Reformer aazettlet het, isch dr Seo Jae-pil 1885 in die Veräinigte Staate gflüchdet und het z Pennsylvanie Medizin studiert. 1890 isch er amerikanische Staatsbürger worde. 1894 het er d Muriel Armstrong ghürootet, e Niesse vom ehemoolige Bresidänt vo de Veräinigte Staate, James Buchanan. Si häi zwäi Döchder ghaa.
1896 het dr Jaisohn The Independent (Doknip Shinmun) gründet, wo uf Änglisch und Hangul druckt worde isch. In dr Zitig het er d Korrupzioon in Korea aabrangeret. Er het z Philadelphia en Informazionsbüro vo dr Republik Korea gründet und für d "Korea Review" gschriibe. Er het au für s Wistar Institut vo dr Universidäät Pennsylvanie gschafft.
Dr Jaisohn isch noch em Zwäite Wältchrieg zrugg uf Korea as Berooter vo dr amerikanische Milidäärregierig. 1946 isch er ins südkoreanische Interimparlamänt gweelt worde. 1948 isch er zrugg in d USA, won er drei Joor spööter gstorbe isch.
Literatur
- Se-ŭng O: Dr. Philip Jaisohn's Reform Movement, 1896-1898: A Critical Appraisal of the Independence Club, University Press of America, 1995, ISBN 0819199141
Weblingg
- Literatur vu un iber Seo Jae-pil in dr bibliografische Datebank WorldCat
- Seo Jae-pil Memorial Museum (koreanisch)
- Seo Jae-pil (Site cha nüme abgrüeft wärde; Suche im Webarchiv) (koreanisch)
- Seo Jae-pil (Site cha nüme abgrüeft wärde; Suche im Webarchiv) (koreanisch)
Fuessnoote
- ↑ Seo Jae-pil (Site cha nüme abgrüeft wärde; Suche im Webarchiv) (koreanisch)