مطبخ مصرى
يشتهر المطبخ المصرى بمذاقه المصرى الخاص.
| ||||
---|---|---|---|---|
البلد | مصر | |||
تعديل |
يستخدم المطبخ المصرى الدواجن والبقوليات والخضروات والفواكه من وادى النيل والدلتا الغنيين بمصر. ومن الأمثلة على الأطباق المصريه الخضروات المحشيه بالأرز زى محش ورق العنب والحمص و الطعميه والشاورما والكباب والكفته. ،كمان الفول المدمس المهروس؛ و الكشرى والعدس والمكرونة؛ و الملوخيه ومرق الباميه. مع نوع محلى من الخبز المعروف بالعيش البلدى.
ينقسم المطبخ المصرى لمطابخ فرعية ينتشر فيها الأكل المصرى العادى و أكلات خاصة بيها زى:
- المطبخ الاسكندرانى (البحرى)
- المطبخ الصعيدى (القبلي)
- المطبخ الفلاحى (ريفى)
- المطبخ البدوى (متأثر بأكلات الخليج العربي)
- المطبخ الشعبى
- أما عن العاصمة فهى مزيج من المطابخ السابقة و المطبخ الايطالى والهندى والخليجى والشامى ، وقليل من أكلات المطابخ الفرنسية أو الشرق آسيوية.
أثر المطبخ المصرى على الدول المجاورة فنقلت أكلات زى الفول والطعمية والشكشوكة وام على والكحك و غيرها للدول المجاوره.
اكل مصرى
- ملوخيه
- باميه
- ويكه
- فريك
- خبيزه
- سريس
- فطير مشلتت
- فول مدمس
- فول حيراتى
- شوربة فول نابت
- بصاره
- طعميه ( فلافل)
- جبنه مقليه
- حمام محشى بالفريك
- رز مفلفل
- مكرونه باشميل
- كوسه بشاميل
- كشرى
- طاجن عكاوى
- مخروطه
- مسقعه
- تورلى
- كفته مصرى
- كفته الحاتى
- شوربة لسان عصفور
- عدس بجبه
- عدس اصفر
- شلولو
- قلقاس بالسلق
- سلطة خضراء بالجرجير
- كبده اسكندرانى
- فته بالخل والثوم
- خبيزه
- كشك
- كوارع
- سبانخ بالصلصه
- ارنبيط بالصلصله و الحمه المفرومه
- رز معمر
- حمص الشام " الحلبسة"
- بليله
- كرشه
- ممبار
- محشى (كرنب ، كوسه ، بتنجان اسود ، بتنجان ابيض ، فلفل ، طماطم )
- ورق عنب
- فتة كوارع
- الحواوشى
- كباب
- كباب حله
- صياديه
- شركسيه
- شكشوكه
- بسيسه
- قرنبيط مقلى
- مديده
- رقاق
- كفته بالبطاطس
- سمك طجين
- سمك بلطى مقلى و مشوى
- بسطرمه بالبيض
- عسل اسود و طحينه
عيش و مخبوزات
منتجات ألبان
- الجبنة القريش
- جبنه رومى
- جبنه دمياطى
- الجبنه القديمه
- الجبنه الضانى
- الزبدة
- السمنة
- المورتة
- القشطة
- مش
أسماك مملحة
مخللات مصريه
- تورشى
- اللمون بالعصفر
- بتنجان مخلل
- بصل مخلل
- مخلل خضار مشكل
- مخلل خيار
- مخلل لفت
- مخلل قرنبيط
- مخلل جزر
- مخلل فلفل
- مخلل زتون
- بصل مخلل
حلويات مصرى
- ام على
- بسبوسه ( هريسه )
- بقلاوه
- قطايف
- كنافه
- شعريه باللبن
- زلابيه ( لقمة القاضى )
- مهلبيه
- رز بلبن
- بليله
- عاشوره
- كحك العيد
- بسكوت العيد
- مشبك
- عيش السرايا
- مفتقه
- عجميه
- معموله
- غُريبه
- بسيمه
- فريسكا
- حلاوة المولد
- عرايس الموالد
- حلاوه شعر
- سمسميه
- كوز سكر
- جلاب
- خشاف
- مهلبية قمر الدين
مشاريب مصرى
- عصير قصب
- عصير الكركديه
- عصيرالعرقسوس
- عصيرالخروب
- عصير التمر الهندي
- عصيرالسوبيا
- شاى كشرى
- العناب
- سحلب
- مغات
- سوبيا
- بوظه
اكل المصريين زمان
عادات وتقاليد المصريين فى الأكل اختلفت تماما واتغيرت عن زمان. في كتاب وصف مصر، اللى كتبه علماء الحمله الفرنسيه، أكتر حاجة لفتت نظرهم إن الفلاحين (90% من المصريين) كانوا شديدى القناعة في الأكل بشكل لافت للنظر جدا، ووصفوا غذاؤهم بإنه بالغ السوء والفقر، لدرجة إن العلماء أبدوا في أكثر من موضع استغرابهم من قلة الطعام، وسوء التغذية العام اللى بيضرب مصر.
المصريين ما كانوش بيفطروا!، سواء من أهل المدن أو الريف، ووجباتهم الأساسية هما وجبتين بس الأولى "الغداء" قبل الظهر بساعة، والتانية "العشاء" قبل المغرب بساعة..
والأكلة الأكثر محبة بين المصريين والوجبة اللى بيحلم بيها الجميع هي اللحم الضاني، لكن بطبيعة الحال فالفقراء ما كانوش بيقدروا ياكلوها غير في المناسبات بس، المصريين ما كانوش بيحبوا لحوم الأبقار والجاموس وبيعتبروها لحوم الفقراء، حسب ما بيقول كلوت بك الطبيب الفرنسي اللى أسس الطب الحديث في مصر في عصر محمد علي في كتابه "لمحة عامة إلى مصر".
المصريين كانوا بياكلوا السمك وكانوا بيقلوه في "الزيت" وما كانش بيتم "شوي" السمك فى الفترة دي، أو الطريقة التانية إنهم بيستنوا بعد الفيضان علشان يجمعوه ويملحوه خاصة فى الريف، لكن كلوت بك كان بيستغرب إنهم ما يعرفوش من خيرات البحر حاجة غير السمك العادي، لا بيعرفوا المحار ولا الأصداف، ولا الجمبري، ولا كل الأنواع الأخرى.. من الحاجات اللى المصريين ما كانوش بيحبوها أبدا عكس الوضع الحالي، هو "البطاطس" اللى بيقول "كلوت بك" إن للأسف إن المصريين بيسيئوا الظن فيها وبيتجاهلوها.
المطبخ المصري لم يكن متنوع.. فهو بيضم شكلين اتنين بس من الأكل.. الأولاني بقوليات بيتم غليها في قدور، زي "اللوبيا" و "الفاصوليا" و "الفول" و "الترمس" ( كانوا بيطبخوا الترمس).. !، وغالبا ما بيطبخهوش بنفسهم، بيشتروه من بياعين متخصصين بيستغلوا نار "الدماس" وهي المخلفات اللى بتحرق علشان تسخن مياه الحمامات العمومية، في تسوية البقوليات دي، ومن هنا جه اسم "الفول المدمس"..
والنوع التاني من الوجبات فهو الخضار النيء، زي البنجر، والخيار، والبصل المنقوع في الخل، وبيشتروها برضه جاهزة من بياعين بيمروا في الشوارع..
في كتاب وصف مصر للحملة الفرنسية، بيقولوا إن أشهر الوجبات في مصر هي خليط من "الخس، والخيار، مع البطيخ أو الشمام"، وغالبا بتكون في الصيف نتيجة حرارة الطقس، لكن في كتاب وصف مصر الفرنسيين عزوا ده إلى ما قالوا عنه إنه الكسل الفطري للمصريين اللى ما بيحبوش يطبخوا.
من الوجبات المحببة للمصريين كمان، البيض، واللبن، والجبن القديم والسمك المملح في الريف. ورغم إن العيش كان أساسي فى أكل أغنياء المدن، لكنه كان مهجور بالكامل ومش مستحب في الريف، علشان الفلاحين بيفضلوا يبيعوا القمح لأغنياء المدن علشان يستفيدوا بتمنه وبياكلوا بداله الخضروات النيئة، أو الدرنيات والجذور زي القلقاس، وبيحط المصريين الكتير من الليمون على كل أكلهم تقريبا..
المصريين ما كانوش بيستخدموا الزيوت إلا فيما ندر، وكانوا بيستخدموا الزبدة لأنها خفيفة، وكمان علشان الزيوت فى مصر الفترة دي كانت رديئة للغاية، بيقول كلوت بك إنها زيوت لا تصلح إلا لتشغيل المصانع فى أوروبا، وغالبا كانت بتستخرج من "بذور الخس"!!، أما زيت الزيتون فكان منتشر بين الأقباط فقط.
من الوجبات برضه اللى كان بيقبل عليها "أغنياء مصر" هو الرز المفلفل اللى بيعتبره كلوت بك "طعام وطني"، وذكر كمان إن المصريين بدأوا يعملوا "محشي ورق العنب" بخليط من الرز واللحمة المفرومة، ودي غالبا هتكون وجبة نقلوها من الحملة المصرية على "الشام" 1832-1840 ، زي ما الشوام عرفوا "الفول" من الجنود المصريين فى نفس الحملة..
أما في صعيد مصر فواحده من الوجبات الأساسية كان البلح المجفف وادوارد لين في كتابه "عادات المصريين المحدثين" بيقول إن هناك قرى بأكملها في الصعيد لا تعيش إلا على البلح لمدة تزيد عن شهر كامل..
بالنسبة لـ"الشاي" فالمصريين من 200 سنة ما كانوش يعرفوا الشاي!!، وكان مشروبهم الرئيسي هو "القهوة"، اللى قال كلوت بك إن المصريين بيشربوها في الصباح والمساء، زي ما بيشرب الأوربيين النبيذ، والمصري الواحد ممكن يشرب يوميا 15 فنجان قهوة..
أما الحلو فهو غالبا "الكنافة"، أو البطيخ اللى المصريين بيعشقوه بشكل كبير، وكانوا بيبردوه عن طريق تركه في الهواء الطلق حتى يجف السائل اللى فيه، لكن لازم ينتبهوا أثناء التبريد في الهواء الطلق، علشان كان عندهم إعتقاد إن ريحة البطيخ بتجذب التعابين..
أما عادات المصريين في الأكل والشرب فهي مازالت كما هي تقريبا، وبيسجلها إداورد لين فبيقول إن المصريين عموما كانوا مشهورين بسرعة الأكل، وعدم شرب الماء تقريبا أثناء الأكل مع الإكثار منه بعد الأكل، وقلة الكلام على الأكل، وإنهم بياكلوا تقريبا الوجبة في تلت ساعة فقط، واللى بيخلص أكل ما بيستناش الباقيين وبيقوم على طول..
أما الطماطم اللى بتدخل فى أغلب أكلنا النهاردة، فهي ما كانتش معروفة إطلاقا في أكل المصريين، وبتعتبر من أواخر المحاصيل اللى دخلت لمصر، وأدخلها الإنجليز تحديدا في منتصف القرن التسعتاشر في العراق والشام أولا، ومنها انتقلت إلى مصر، علشان كده مافيش أي ذكر ليها فى كتب الفترة دى.
لينكات برانيه
- مطبخ مصرى – صور وتسجيلات صوتيه و مرئيه على ويكيميديا كومونز
- مطبخ مصرى معرف مخطط فريبيس للمعارف الحره
- مطبخ مصرى معرف النظام الجامعى للتوثيق
- مطبخ مصرى معرف المكتبه الوطنيه الفرنسيه (BnF)
- مطبخ مصرى معرف مكتبه الكونجرس (LCAuth)
- https://www.youtube.com/egyptfood -
- https://www.egyptfood.com Archived 2019-06-29 at the Wayback Machine
- اماكن بيع ادوات المطبخ بالجملة Archived 2019-01-07 at the Wayback Machine
مصادر
- صور و ملفات صوتيه من كومنز