Waychu

Waychu jan ukax qaqa waychux mä pata qullunak pampan jakasir jamach'iwa, (Zool. mf. Cientifico suti: black.billed Shrike, tama: agriornis montana)^[1].

Phuyunakapax janq'u ch'umphiwa. Ch'iyar chhuruñapax jach'awa.

Waychux qullu warankh manqhanakan jakapxi, juk'ampis kawkintix umillk'awjaki, ukawjanakanpun juk'ampis utjnuqasipxixa.

Jisk'a pampa laq'unak thaqhasipxi, achu jathanakx manq'apxakirakiwa, yaqhippachanakax jararankhunaks katusipxarakiwa.

Jaruchir uñtataw tapapaxa, jisk'a lawanakat pajanaka, ukhamarak tapa manqharux ch'ankhanakrak jant'ukrantasipxi.

Qachu waychux paya jan ukax kimsa k'awn k'awnantañ yatitayna. K'awnapax q'illumpit janq'umpitawa. Ukhamarak jan jaqin makhatañawjanakaruw k'awnapxi.

Kunawsatix aka jamach'ix utarus jan ukax uta pirqa patanakans khuyusk ukhax mayniw utan jiwan sañ muni. Ukhamarak kunawsatix waychux uta qhipax nayrax muysux ukax uka utan jakirinakaw sarxan sañ muni. Ukatx kunawsatix satapachanx uñtank ukhax suma maraniw satawa.

1. ↑ Flores, C. M. (2008).Variación dialectal del léxico de las aves de Qurpa, Qurumata Alta y Pujräwi. La Paz: Instituto de Estudios Bolivianos.