Isula d'Elba
![](http://178.128.105.246/cars-http-upload.wikimedia.org/wikipedia/commons/thumb/d/de/Elba_isl.jpg/240px-Elba_isl.jpg)
![](http://178.128.105.246/cars-http-upload.wikimedia.org/wikipedia/commons/thumb/c/c7/Bandiera_Elba.svg/240px-Bandiera_Elba.svg.png)
L'isula d'Elba o, simpliciamenti, Elba, hè un'isula situata trà u mari Liguru à u nordu, u canali di Piumbinu à livanti, u mari Tirrenu à u sudu è u canali di Corsica à punenti, posta à circa 10 chilomitri da a costa. Hè a più grandi di l'isuli di l'Arcipelagu Tuscanu, è a terza più grandi d'Italia (223 km²). Hè longa 29 km è larga 18,5 km. Hè pupulata di 32000 abitanti (2016). L'Elba, incù l'altri isuli di l'arcipelagu (Pianosa, Capraia, Gurgona, Monticristu, Gigliu è Giannutri) faci parti di u Parcu Naziunali di l'Arcipelagu Tuscanu.L'isula era chjamata à u tempu di l'Etruschi Aethalia.
L'isula era chjamata da i grechi Aithàle (Αιθάλη)[1][2][3], Aithàleia (Αιθάλεια)[4] è Aithalìa (Αιθαλία)[5], tutti noma derivanti da u terminu grecu aithàle ("fulighjina") in rifirimentu à l'attività di lavurazioni di u farru estrattu in i mineri elbani. Par i Latini era inveci Ilva[6], tuponimu di prubabili urighjina prirumana da i Liguri Ilvates, chì duranti u Medievu si trasfurmò in Ilba[7] è Helba.[8]
![](http://178.128.105.246/cars-http-upload.wikimedia.org/wikipedia/commons/thumb/1/10/Monte_Capanne_%28isola_d%27Elba%29.jpeg/240px-Monte_Capanne_%28isola_d%27Elba%29.jpeg)
Giugrafia
[mudificà | edità a fonte]![](http://178.128.105.246/cars-http-upload.wikimedia.org/wikipedia/commons/thumb/1/1b/Pietra_Murata_%28isola_d%27Elba%29.jpg/240px-Pietra_Murata_%28isola_d%27Elba%29.jpg)
L'isula d'Elba hè a più purzioni stesa chì ferma di l'anticu trattu di terra emersa chì culligava a penisula italica à a Corsica, dopu l'altri isuli di l'Arcipelagu Tuscanu. I costi sittintriunali sò bagnati da u mari Liguru, quiddi uriintali da u canali di Piumbinu, quiddi miridiunali da u mari Tirrenu è quiddi uccidintali da u canali di Corsica. U tarrenu hè moltu variu, è divisu in parechji parti sicondu a so cunfurmazioni è l'era giulogica in a quali s'hè furmatu:
- A parti muntosa è più ricenti, à punenti, hè duminata à u centru da u Monti Capanni (1018 m s.l.m.), di u quali faci parti a Costa di u Soli.
- à u centru si stendi un trattu spartu par u più, è a larghezza si riduci à soli quattru chilomitri. Hè probbiu in sta parti di l'isula ch'eddi si trovani i centri maiò : Portufarraiu, Campu in l'Elba.
- À livanti si trova inveci a parti più antica di l'isula, chì s'hè furmata più di 400 milioni d'anni fà. In quidd'aria cuddinari, duminata à u sudu da u Monti Calamita (413 s.l.m.) è à u nordu da a Cima di u Monti (516 s.l.m.), si trovani i ghjacimenti di farru chì resini famosa l'isula d'Elba.
L'isula hè distinta da a prisenza d'ampii inziccaturi rinosi, trà i quali i golfi di Lacona, Marina di Campu, Procchio è Biodola.
Suddivisioni amministrativa
[mudificà | edità a fonte]L'isula hè divisa in ottu cumuni, tutti afferenti à a pruvincia di Livornu par un tutali di circa trenta milla abitanti, chì aumentani nutevulamenti duranti l'istati.
Cumuna | Pupulazioni |
---|---|
File:Capraia Isola-Stemma.png Campu in l'Elba | 4 651 |
File:Capoliveri-Stemma.png Capoliveri | 3 887 |
File:Marciana (Italia)-Stemma.png Marciana | 2 217 |
File:Marciana Marina-Stemma.png Marciana Marina | 1 993 |
File:Porto Azzurro-Stemma.png Portu Turchinu | 3 578 |
File:Portoferraio-Stemma.png Portufarraiu | 12 224 |
File:Rio Marina-Stemma.png Riu Marina | 2 274 |
File:Rio nell'Elba-Stemma.png Riu in l'Elba | 1 244 |
A costa sudu-uccidintali di l'isula, chjamata Costa di u Soli, hè, in a so parti più miridiunali, una di i zoni più friquintati da i turisti par a biddezza di i spiaghji, mentri u virsanti uriintali, dinuminatu Costa luccicanti, hè carattarizatu da a prisenza di l'exi mineri di farru, incù particulari è unichi carattarischi di luccicori è di culori in tuttu l'ambienti circustanti, è in particulari à i spiaghji, biddissimi in quantu sempri pocu friquintati da turisimu di massa.
Idrugrafia
[mudificà | edità a fonte]Da i rilievi maiò di l'isula falani numarosi corsi d'acqua à rigimu di turrenti, chì subraneghjani raramenti i 3 km. Duranti l'istatina, quandu i pricipitazioni si riducini à u minimu, ni risulta à spessu chì quiddi di minori lunghezza è purtata si n'assecchini, lascendu u lettu asciuttu. I più impurtanti, urdinati par lunghezza, sò:
- Fossu di San Francescu, 6,5 km;
- Fossu Barione, 5,1 km;
- Fossu di Redinoce, 2 km
À i peda di u Monti Capanni, in una vaddi vicinu à u paesi di Poggio, hè prisenti una surghjenti chjamata Fonti di Nabulionu (un tempu Fonti di l'Acquaviva) chì hè imprudata da i citatini è imbuttigliata da a fabbrica umonima incù u logu di u Parcu Naziunali di l'Arcipelagu Tuscanu.
Clima
[mudificà | edità a fonte]U clima di l'isula prisenta par u più carattaristichi meditirranii, eccituatu par u Monti Capanni induva l'inguerni tendini à essa mudaratamenti freti. I pricipitazioni sò cuncintrati in u periodu vaghjimali. I valori medii chì si righjistrani à Portufarraiu sò ripurtati quì sottu.
Mesi | Ghji | Feb | Mar | Apr | Mag | Ghju | Lug | Aos | Set | Ott | Nuv | Dic | Annu |
---|---|---|---|---|---|---|---|---|---|---|---|---|---|
Tampiratura massima media (°C) | 12 | 13 | 14 | 16 | 21 | 24 | 27 | 27 | 25 | 20 | 15 | 13 | 18,9 |
Tampiratura minima media (°C) | 8 | 9 | 10 | 12 | 16 | 19 | 22 | 21 | 19 | 15 | 10 | 8 | 14,1 |
Piuviti (mm) | 61 | 53 | 51 | 47 | 28 | 24 | 13 | 30 | 51 | 82 | 86 | 69 | 595 |
Storia
[mudificà | edità a fonte]![](http://178.128.105.246/cars-http-upload.wikimedia.org/wikipedia/commons/thumb/b/b6/Testa_in_terracotta_da_Monte_Castello_%28Elba%29.jpg/240px-Testa_in_terracotta_da_Monte_Castello_%28Elba%29.jpg)
L'isula era dighjà abitata duranti u Paleuliticu, com'eddi a dimostrani i ritruvamenti di strumenti litichi (Lacona è Procchio). U Niuliticu hè attistatu da manufatti in petra è ussidiana (pioli, punti di freccia è lami) ritruvati annantu à u Massicciu di u Monti Capanni (Cantonu à a Guata, Cantonu di l'Acula, Serraventosa, A Stretta, Piana di Moncione, Chjusa Borsella), Marciana Marina, Procchio, Lacona, Biodola, Portufarraiu, Cavo, Riu in l'Elba. Nutevuli tracci di l'Ità di u Ramu è di l'Ità di u Bronzu sò stati nutati in parechji sittori di l'isula; di grandi intaressu sò a Necropoli rupestra di Riu Marina, eneulitica, l'insidiamenti protustorichi di u Monti Capanni è di u sittori uriintali (Cima di u Monti, Volterraio) è i siti megalitichi di i Sassa Ritti, di i Piani à a Sughera, di Monti Còcchero, Monte Ghjovi, Cantonu di l'Acula, Serraventosa, Petra Murata è Cima di u Monti. Sicondu a tradizioni litteraria, in ebbica protustorica l'Elba era abitata da i Ilvati, una pupulazioni appartinenti à l'etnia di i Liguri, com'è sembra attistatu da i tuponimi Borandasco, Soleasco è Marserasca incù u suffissu tipicu in "-asco"; da quì, sicondu parechji, u nomu anticu di l'isula: Ilva.
Ricchissima di ghjacimenti di farru, l'isula d'Elba resi pussibuli u sorghja di a civiltà etrusca, a quali custruì parechji paesi furtificati (Monti Casteddu, Castiglione di San Martinu è Castiglione di Campu) incù a Necropoli ellenistica di Capoliveri è a Necropoli di Casa di u Duca. In 453 a.C. l'isula fù sacchighjata da a flotta siracusana cummandata da Apelles è Phayllos.
Più dopu, incù u duminiu di Roma, annantu à l'isula funi edificati almenu trè villi marittimi (Villa di a Linguella, Villa di i Grotte è Villa di Capu Casteddu). Sempri à l'ità rumana ricoddani parechji impurtanti relitti subacquei (Relitti di Sant'Andrea, Relittu di u Nasuto, Relittu di Chiessi, Relittu di Procchio è Relittu di Punta Cera). Un' intarissanti traccia tupunumastica d'ità rumana hè custituita da a lucalità Remmiano vicinu à Cavoli, chì dirivaria da u pussidimentu di un Remmius.
Dopu à a caduta di Roma, l'Elba divintò tarritoriu di l'Ostrogoti è dopu, in u 610, di i Longobardi; à quisti ultimi si devini numarosi tuponimi prisenti sempri oghji annantu à l'isula, com'è Gualdo (da wald, "boscu"), Cafaio (da gahagi, "ricintu") è Catro (da kater, "cancellu"). Cuntistualamenti l'Elba divintò locu d'arimitoriu par i primi anacureti cristiani, trà i quali San Cerbone in u 575. In 874 l'isula fù pisantamenti sacchighjata da i Saraceni, mentri in u 1003 è in u 1016 fù assaltata da Mujāhid à u- ʿĀmirī.
À parta da u prima millenniu dopu Cristu, l'isula divintò parti di u tarritoriu di a Ripublica di Pisa; funi edificati torri di surviglianza com'è a Torra di San Ghjuvanni, u paesi furtificatu di Montemarsale è a Furtezza di u Volterraio, situata annantu à un'altura inaccessibili par truvà rifughju da l'incursioni di i pirati; à listessu periodu ricoddani parechji impurtanti edifizii riligiosi com'è a Pievi di San Lorenzo, a Pievi di San Ghjuvanni è a Pievi di San Micheli. In u 1399 l'Elba passò sottu a signuria di l'Appiano di Piumbinu. L'isula subì impurtanti divastazioni da parti di cursari tunisiani in u 1442, è dopu par mani di Khayr à u-Din in u 1534 è 1544 è di Dragut in u 1553 è 1555. In 1548 u granduca di Tuscana Cosimu I fundò una cità furtificata simbulicamenti chjamata Cosmopoli (oghji Portufarraiu), cuncipita com'è un presidiu militaru incù u scopu di difenda i costi di u Granducatu è di l'Elba è ancu com'è sediu di i Cavalieri di Santu Stefanu.
L'imperatori Nabulionu Bonaparte fù esiliatu à l'Elba in 1814 è ci firmò 10 mesa. À tistimunianza di a so pirmanenza restani dui beddi villi ind'eddu sughjurnò: Villa di i Mulini in pusizioni duminanti à Portufarraiu, è Villa San Martinu risidenza estiva di u Corsu à a periferia di a piccula capitali elbana; da u 23 aostu à u 5 sittembri 1814 Bonaparte sughjurnò vicinu à u Santuariu di a Madonna di u Monti (Marciana). I dui guerri mundiali ani vistu mora cintunari di ghjovani elbani; è i dui dopuguerra ani vistu emigrà migliaii di lavuradori elbani. Più ricintamenti, grazia à u turisimu internaziunali, l'isula hè divintata famosa (ancu à u stranieri) par u so vinu, in particulari l'aleaticu, dolci vinu licurosu da dessert chì spessu accumpagna u dolci lucali, a schiaccia briaca. In u 2002 è in u 2011, parechji Cumuni di l'isula ani subitu catastrofi naturali di tipu alluviunali chì ani purtatu danni impurtanti annantu à i tarritorii culpiti; l'ultimu di quisti, successu u 7 nuvembri 2011, hà incausatu ancu una vittima à Marina di Campu.
Musei
[mudificà | edità a fonte]- Museiu civicu archiulogicu di Portufarraiu
- Museiu civicu archiulogicu di Marciana
- Museiu civicu archiulogicu di u Distrittu minerariu di Riu in l'Elba
- Museiu mineralogicu Alfeu Ricci di Capoliveri
- Museiu mineralogicu è gemmulogicu Luigi Celleri di San Piero in Campu
- Museiu minerariu di Riu Marina
- Museiu etnugraficu U Casalino di u Castagnu di Poggio
- Casa di u Parcu di Marciana
- Casa di u Parcu di Riu in l'Elba
Noti
[mudificà | edità a fonte]- ↑ Ecateo di Mileto, Periegesis, fr. 1F59
- ↑ Scilace, Periplo, VI, 1.
- ↑ Scilace, Periplo, VI, 1.
- ↑ Filone di Biblo, 573F13.
- ↑ Strabone, Geographika, III, 123.
- ↑ Gaio Pliniu Sicondu, Naturalis Historia, III, 81
Titu Liviu, Storii, XXX, 39, 1
Pomponio Mela, Chorographia, II, 122
Lucio Anneo Seneca, Epistole, II, 3
Caio Giulio Solino, Collectanea rerum memorabilium, III, 2. - ↑ Archiviu di Statu di Pisa, Cumuna di Pisa, divisioni A.
- ↑ Grigoriu Magnu, Dialoghi, III, 2.
Fonti
[mudificà | edità a fonte]'Ss'articulu pruveni in parti o in tutalità da l'articulu currispundenti di a wikipedia in talianu.