Nintendo Switch
![](http://178.128.105.246/cars-http-upload.wikimedia.org/wikipedia/commons/thumb/7/76/Nintendo-Switch-Console-Docked-wJoyConRB.jpg/220px-Nintendo-Switch-Console-Docked-wJoyConRB.jpg)
El Nintendo Switch a l'è 'na console ibrida venduda de la Nintendo dal 2017 e nonziada in del 2015 cont el nomm "NX". A l'è portatil, ma la se pò mett in d'ona docking station per recaregàlla e giugà in su la TV. La dopera la cartoccia, bandonada in di console fiss di temp del Nintendo 64 ma doperada in di console portatil.
Storia
I primm notizi del successor del Wii U a hinn sortii in del 2015, cont el nomm in codes "NX". El 13 de genar del 2017 a l'è offizialment nonziada per el 3 de marz 2017. L'ha venduu 1.5 milion in di primm settiman e a fin 2017 l'ha venduu i 10 milion.
Hardware e fonzionament
![](http://178.128.105.246/cars-http-upload.wikimedia.org/wikipedia/commons/thumb/b/bc/Nintendo-Switch-wJoyCons-BlRd-Standing-FL.png/220px-Nintendo-Switch-wJoyCons-BlRd-Standing-FL.png)
El sistema a l'è faa de 'na specie de tablet e de du joy-con, di controller essenziai. Per giugà in mobilità el tablet a l'è taccaa ai joy-con, per formà on sistema arent al Wii U GamePad. Per giugà in cà, inveci, la console a l'è mittuda dent de la soa docking station e i joy-con a hinn taccaa insemma per fà on controller, o anca separaa per i gioeugh che 'l supporten. A l'è disponibil anca el Nintendo Switch Pro Controller, on controller giontiv a stil classich.
I gioeugh a hinn memorizzaa in su cartocc, assee piscininn e che pòden memorizzà finna a 32 GB. Hinn recovert de 'na sostanza che la fa schivi al gust, per evità che sien mangiaa di fiolitt. I gioeugh hinn region-free, e 'n quaj gioeugh el necessita anca de 'na MicroSD indova salvà i dacc.
A gh'è di servizzi online che permetten sia de giugà in multiplayer sia de crompà di gioeugh.