ബിരുദം നേടിയതിന് ശേഷം സ്വന്തം കമ്പനി ആരംഭിക്കാനാണ് അങ്കുഷ് തീരുമാനിക്കുന്നത്. തുടക്കത്തിൽ വലിയ ബിസിനസ് നേടാൻ സാധിച്ചില്ലെങ്കിലും പിന്മാറാൻ അങ്കുഷ് തയ്യാറായില്ല. കൂടുതൽ ഉയരങ്ങളായിരുന്നു ആ യുവാവ് അപ്പോഴും സ്വപ്നം കണ്ടത്. പിന്നീട് മറ്റൊരു കമ്പനി ആരംഭിച്ചെങ്കിലും അതും പരാജയപ്പെട്ടു. പിന്നീട് വീണ്ടും ഒരു കമ്പനി, അങ്ങനെ തുടരെ 18 സ്റ്റാർട്ടപ്പ് സംരംഭങ്ങൾ പരാജയപ്പെട്ടു.
ആരും മനസ്സ് മടുത്തു പിന്മാറുന്നിടത്ത് അങ്കുഷ് തന്റെ 18ാം സംരംഭം ആരംഭിക്കുകയാണ്. തുടരെ പരിശ്രമിക്കുന്നവർക്കു മുന്നിൽ പിന്മാറാതിരിക്കാൻ പരാജയത്തിനാവില്ല എന്ന തത്ത്വം ഇവിടെ യാഥാർത്ഥ്യമായി. തന്റെ പതിനെട്ടാമത്തെ ബിസിനസ് വിജയിപ്പിച്ചെടുക്കാൻ അങ്കുഷ് എന്ന പോരാളിക്ക് സാധിച്ചു. ഇവിടെ വിജയം ചെറുതായിരുന്നില്ല. 40000 കോടി രൂപ മൂല്യമുള്ള സംരംഭമായി ഈ ബിസിനസ് മാറി. ആ സംരംഭത്തിന്റെ പേരാണ് സോഷ്യൽ മീഡിയ പ്ലാറ്റ്ഫോമായ ഷെയർ ചാറ്റ്.
ഇന്ത്യൻ ഓഡിയൻസിനു വേണ്ടി ഡിസൈൻ ചെയ്തെടുത്ത സോഷ്യൽ നെറ്റ് വർക്കിങ് പ്ലാറ്റ്ഫോമാണ് ഷെയർ ചാറ്റ്. നിലവിൽ ഹിന്ദി, മലയാളം, ഗുജറാത്തി, മറാത്തി, പഞ്ചാബി, തെലുങ്ക്, തമിഴ്, ബെംഗാളി, ഒഡിയ, കന്നഡ, ആസാമീസ്, ഹര്യാൻവി, രാജസ്ഥാനി, ഭോജ്പുരി, ഇംഗ്ലീഷ് എന്നിങ്ങനെ 15 ഭാഷകളിൽ ഈ പ്ലാറ്റ്ഫോം ലഭ്യമാണ്. ഇന്ത്യയിലെ ചെറിയ നഗരങ്ങളിലെ ആളുകളെ തമ്മിൽ കണക്ട് ചെയ്യുന്ന ഒരു പ്ലാറ്റ്ഫോമിന്റെ ആവശ്യകത അങ്കുഷ് തിരിച്ചറിഞ്ഞതാണ് വിജയമായി മാറുന്നത്.
കമ്പ്യൂട്ടർ സയൻസിൽ ബിരുദധാരിയായ അങ്കുഷ് ഐ.ഐ.ടി കാൺപൂരിൽ നിന്ന് ബി.ടെക് ബിരുദം നേടി. 2015 വർഷത്തിലാണ് ഷെയർ ചാറ്റ്, അദ്ദേഹം തന്റെ രണ്ട് സുഹൃത്തുക്കളോടൊപ്പം ലോഞ്ച് ചെയ്യുന്നത്. 2022 ജൂലൈയിലെ കണക്കുകൾ പ്രകാരം ഈ കമ്പനിയുടെ മൂല്യം ഏകദേശം 5 ബില്യൺ ഡോളർ അഥവാ 40,000 കോടി രൂപയാണ്. ഒന്നോ, രണ്ടോ തവണ ചെറിയ പ്രതിസന്ധികൾ വരുമ്പോൾ പകച്ചു പോകുന്നവർക്ക് മുന്നിൽ ഒരു വഴിവിളക്കായി അങ്കുഷ് എന്ന ചെറുപ്പക്കാരൻ നില കൊള്ളുന്നു.
Variety Farmer: കൃഷിയിലൂടെ ലക്ഷങ്ങൾ സമ്പാദിക്കുന്ന യുവ കർഷകൻ
