व्यवहाराचा तपशील
नझारा टेक्नॉलॉजीकडे फ्रीक्स 4U मध्ये आधीपासूनच 13.51 टक्के भागभांडवल आहे आणि व्यवहार पूर्ण झाल्यानंतर 57 टक्के भांडवल असेल, असे कंपनीने एका निवेदनात म्हटले आहे. जर्मनीस्थित कंपनीकडून उर्वरित 43 टक्के भागभांडवल घेण्याचा विशेष अधिकार या कंपनीला असेल.
नझारा टेक्नॉलॉजीजचीच एक कंपनी असलेल्या नॉडविन गेमिंग प्रायव्हेट लिमिटेडची पूर्ण मालकीची उपकंपनी, नॉडविन गेमिंग इंटरनॅशनलद्वारे हे अधिग्रहण केले जाईल, असे स्टॉक एक्स्चेंज फाइलिंगमध्ये म्हटले आहे.
कंपनीने म्हटले की या करारामुळे नॉडविनला विकसित बाजारपेठांमध्ये त्यांचा व्यवसाय आणि महसूल वाढवण्यास मदत होईल. फ्रीक्स 4U गेमिंगची सुरुवात 2011 मध्ये झाली होती. ही बर्लिन-आधारित कंपनी आहे जी गेमिंग आणि ईस्पोर्ट्सवर लक्ष केंद्रित करते. डिसेंबर 2023 च्या तिमाहीत 240 कोटी रुपयांची उलाढाल झाली.
अधिग्रहण कधी होणार पूर्ण?
कंपनीच्या निवेदनानुसार पीसी गेमिंग आणि गेम प्रकाशन समर्थन सेवांमध्ये अंमलबजावणी आणि नियोजन क्षमता जोडून विकसित बाजारपेठांमध्ये नॉडविनची पोहोच मजबूत करण्यासाठी हे अधिग्रहण निश्चित केले आहे. नियामक अटींच्या अधीन राहून हा करार 15 जुलै 2024 पर्यंत पूर्ण होण्याची शक्यता आहे.
दिग्गज गुंतवणूकदारांची गुंतवणूक
शेअर बाजारातील दिवंगत राकेश झुनझुनवाला यांच्या पत्नी रेखा झुनझुनवाला यांच्याकडे नाझारा टेक्नॉलॉजीज या गेमिंग कंपनीचे 65.18 लाख शेअर्स आहेत. ही 8.52 टक्के हिस्सेदारी आहे.
