1941 (Film)
Filmdaten | |
---|---|
Plattdüütsch Titel: | — |
Originaltitel: | 1941 |
Düütsch Titel: | 1941 – Wo bitte geht’s nach Hollwood |
Produkschoonsland: | USA |
Johr vun’t Rutkamen: | 1979 |
Läng: | 113 Minuten |
Originalspraak: | Engelsch |
Öllersfreegaav in Düütschland: | FSK 12 |
Filmkru | |
Speelbaas: | Steven Spielberg |
Dreihbook: | Bob Gale John Milius Robert Zemeckis |
Produkschoon: | Buzz Feitshans John Milius |
Musik: | John Williams |
Kamera: | William A. Fraker |
Snitt: | Michael Kahn |
Szenenbild: | Dean Edward Mitzner |
Kledaasch: | Deborah Nadoolman |
Dorstellers | |
|
1941 (dt. Titel: 1941 – Wo bitte geht’s nach Hollywood) is de Titel vun en US-amerikaansche Filmkummedie ut dat Johr 1979. Speelbaas weer Steven Spielberg, de Höftrullen hebbt Dan Aykroyd, Ned Beatty un John Belushi speelt.
Inholt
Na den Angreep vun de Japaners op Pearl Harbor sünd de Inwahners vun Kalifornien in Panik, vunwegen dat de Lüüd glöövt, dat jemehr Bundsstaat dat nächste Teel vun de Japaners warrt. In Los Angeles kummt dat to chaootsche Tostännen, un in de Wööst in de Neeg vun de Stadt dreiht de paranoide Colonel Maddox dör un meent, he weer vun Japaners inkreist, de he sik aver blots inbillen deit. Nich minner dörknallt is de Army-Air-Forces-Fleger Captain ‚Wild Bill‘ Kelso, de sik vörnahmen hett, de Japaner mit sien Curtiss P-40 in’n Alleengang aftowehren.
För’t Deffenderen vun Süüdkalifornien is de General Joseph W. Stilwell tostännig. He lett mobil maken un verdeelt sien Lüüd an de Küst. So kriggt Sergeant Tree Order, en Stellung op dat Grundstück vun de Familie Douglas intorichten. Dor duukt wohrhaftig en japaansch U-Boot op, dat sik verföhrt hett. De Kummandant Akiro Mitamura kann aver nich eenfach ümkehren, dat lett sien Ehr nich to. Also nimmt he sik vör, Hollywood antogriepen un dor en Bedüden Bowark tonichten to maken. Toeerst aver mutt he sik gegen den düütschen Verbinnenoffizeer Kapitän von Kleinschmidt dörsetten, den he opletzt över Boord gahn lett. As dat U-Boot opdeckt warrt, kummt dat to en Hysterie. De General is aver jüst in’t Kino un dröff nich stört warrn.
Stilwell sien Adjutant Captain Birkhead is in de Twüschentiet mit den Opkloor-Fleger vun Colonel Maddox op’n Weg na Los Angeles. He kriggt aver nich veel mit, vunwegen dat he mehr mit de Regerensbeopdragte Sonna Stratton to doon hett, as mit dat Flegen. De Fleger hett aver keen Funkapparat, un so kann he sik nich mellen, as he op Los Angeles tokummt. Em achteran flüggt ‚Wild Bill‘ Kelso mit sien P-40. In de Stadt warrt dorophen Grootalarm utlööst un ok de Börgerwehr steiht praat. Ansteed vun de Japaners drapt de aver blots den Fleger vun ‚Wild Bill‘ Kelso, de afstörten deit. Dat jappaansch U-Boot nimmt in de Twüschentiet dat Resenrad in en Vergnögenspark op’t Koorn un schütt dat in’n Dutt. Dormit is de Ehr reddt un de Kummandant kann wedder torüch na Japan schippern. De Flak in Douglas Huus, versöcht ok den Angreep aftowehren, maakt dorbi aver blots dat egen Huus tonichten. Kenso „entert“ opletzt dat U-Boot, üm in Japan den Tennō in Haft to nehmen.
Kritik
Dat Lexikon vun’n internatschonalen Film beteken den Film as en överdreiht Spektakel mit en Reeg vun Filmzitaten, Gags un Klamaukeffekten, dat sik an dör de Hollywood-Traditschoon stiliseerten Musters hollt, üm to wiesen, dat de Filmindustrie un ehr Mythen nicht doodtokriegen sünd. Ofschoonst de grote Opwand mitünner rein för’n egenen Sinn deent un de satirische Afsicht överdecken deit, weer 1941 liekers över wiete Strecken to’n Smuustern.[1]
Utteken
De Film hett keen Priesen wunnen, weer aver in’t Johr 1980 in dree Kategorien för den Oscar nomineert: för den Besten Toon, de Besten Trickeffekten un de Beste Kamera.
Achtergrünnen
De Filmkritiken weern to de Tiet, as de Film aktuell weer, teemlich slecht. ok vundaag noch gellt 1941 as een vun de swächsten Arbeiten vun Spielberg. Finanziell weer de Film liekers en groten Spood. Bi Produkschoonskosten vun ruchweg 35 Millionen US-Dollar hett de Film weltwiet mehr as 90 Millionen US-Dollar wedder inspeelt.[2]
Vörbild för de Geschicht in’n Film weer de so nöömte „Slacht üm Los Angeles“ in de Nacht vun’n 24. op’n 25. Februar 1942.
De Filmrullen weern mit tallrieke beropene Schauspelers besett. De Hööftdorstellers Dan Aykroyd un John Belushi sünd een Johr later mit jemehrn Film The Blues Brothers groot rutkamen. John Landis, de Speelbaas vun The Blues Brothers harr in dissen Film ünner Speelbaas Spielberg en lütte Nevenrull. Steven Spielberg hett in The Blues Brothers ok en lütten Optritt hatt. Mickey Rourke hett mit sien lütte Nevenrull in dissen Film sien Loopbahn in Hollywood anfungen.
Borns
- ↑ Kritik to’n Film in’t Lexikon vun’n internatschonalen Film, afropen an’n 21. September 2013
- ↑ Box Office/Business op IMDb, afropen an’n 21. September 2013