Cockscomb Range
Cockscomb Mountains | ||
---|---|---|
![]() | ||
höögst Topp: | Victoria Peak | |
Hööchd: | 1.120 m över de See | |
Land: | Belize | |
Laag: | Stann Creek | |
Kuntinent: | Amerika | |
Koordinaten: | Koordinaten:16° 48′ N, 88° 36′ W16° 48′ N, 88° 36′ W | |
|
De Cockscomb Range oder ok Cockscomb Mountains (oder kort Cockscombs) sünd en Bargkeed von de Maya-Bargen in’n Distrikt Stann Creek von Belize (reckt bet an de Grenz na’n Distrikt Cayo).
De höögste Barg is de Victoria Peak (1.120 m över de See).
Geografie
De Cockscomb Range reckt sik över knapp 20 Kilometer von Oost na West un billt de Waterscheed twüschen Sittee Branch (flütt in’n South Stann Creek) un Raspaculo South Branch (flütt över’n Raspaculo in’n Macal River) in’n Noorden un Cockscomb Branch (flütt in’n South Stann Creek) un Middle Branch un Cockscomb Branch (fleet all beid in’n Mare’s Nest Branch) in’n Süden.
Historie
Bi gode Sicht is de Cockscomb Range von de Küst von de Karibische See ut to sehn. De Bargen weren also bekannt, aver dör dat swore Gelänn temlich untogänglich. De Naam Cockscomb Range weer al begäng, as de Bargen noch nich genauer ünnersöcht weren. De Naam kummt von dat Utsehn as en Hahnenkamm. 1872 hebbt to’n Bispeel de Landvermeters Mechling un Warner in en Bericht schreven: it presented much the appearance of a Cockscomb.[1]
De Barg is toeerst 1888 von en brietsche Expeditschoon ünner Leid von’n Guvernör von Brietsch-Honduras, Roger Goldsworthy, kartografeert un bestegen worrn.[1] To de Expeditschoon hebbt ok de Koloniaalsekretär Hubert Jerningham, de Surveyor General Gordon Allen, de Briten J. Bellamy, Wickham, Gabb un Blockley un 22 inheemsche Helpers tohöört.[1]
1896 hett Karl Sapper op en Forschungsreis von El Cayo na de Küst de Cockscomb Range besöcht.[1] In’n Mai 1927 hett denn Herbert T. Grant de Bargen besöcht un dor in’n Dezember 1927 en Bericht to in The Geographical Journal schreven (The Cockscombs Revisited). In’n März 1928 hebbt J. N. Oliphant un Duncan Stevenson en Reis in de Bargen maakt un dor en Bericht to in The Geographical Journal von 1928 bröcht (An Expedition to the Cockscomb Mountains, British Honduras in March 1928).
De Cockscomb Range is siet 2. Mai 1998 as Deel von dat Victoria Peak Natural Monument schuult. Dat Rebeed in’n Noorden is as Sittee River Forest Reserve un dat in’n Süden as Cockscomb Basin Wildlife Sanctuary schuult. De Westen höört to’n Chiquibul-Natschonaalpark.
Victoria Peak is lange Tied as höögsten Barg von Belize ansehn worrn, aver bi Meetarbeiden in jüngere Tied is rutkamen, dat de Doyle’s Delight noch veer Meter höger is.
Bargen
Barg | Höögd in m |
---|---|
Victoria Peak | 1120 |
Copetilla | 931 |
The Molar | 781 |
Allen Peak | |
Bellamy Peak | |
Goldsworthy Peak | |
Holland Peak | |
Jerningham Peak |
Footnoten
- ↑ a b c d Charles Henry Godden: Trespassers Forgiven: Memoirs of Imperial Service in an Age of Independence. The Radcliffe Press, 2009, Sied 278ff.