Isidor Gunsberg
![](http://178.128.105.246/cars-http-upload.wikimedia.org/wikipedia/commons/thumb/5/5b/Isidor_Arthur_Gunsberg.jpg/220px-Isidor_Arthur_Gunsberg.jpg)
Isidor Arthur Gunsberg (* 2. November 1854 in Pest, Kaiserdom Öösterriek; † 2. Mai 1930 in London) weer en bedüüden engelsch Schachspeler vun jöödsch-ungarsch Herkunft.
As Gunsberg sien jöödsch Öllern 1863 utwannern deen, keem he in dat Öller vun negen Johren nah England. Dree Johr later hett he sien Vader up en Geschäftsreis nah Paris begleit. Hier sörg he in dat Café de la Régence för Upsehn. Mit 25 Johren hett he sück dorto entslooten, sien lehrt Berop as Koopmann uptogeven un Schachprofi to wurrn.
Tonächst hett he mit Charles Godfrey Gumpel tosommen arbeit, de en Schachautomaten mit Naam Mephisto entwickelt harr. Gunsberg weer lütt an Gestalt un kunn sück somit in den Schachautomaten versteeken. De Speelstärkt van den Automaten wurr bald bekannt.
In de 1880er Johren kunn he de Turniere in Hamborg 1885 (vör Joseph Henry Blackburne), London 1885, Bradford 1888 (vör George Henry Mackenzie un Curt von Bardeleben) un London 1888 winnen. In dat Turnier vun New York 1889, bi dat 20 Deelnehmer düppelrundig spelen deen, wurr he Dart achter Michail Tschigorin un Miksa Weiß aber vör Blackburne, Amos Burn, Samuel Lipschütz, James Mason usw. un wunn todem en Pries för sien Partie gegen Mason.
Ok in Tweekämpen weer he spoodriek: 1886 wunn he gegen Henry E. Bird (5:1 bi dree Remisen), 1887 gegen Joseph Henry Blackburne (5:2 bi söss Remisen). 1890 hett he dat schafft, en Wettkamp in Havanna gegen den starken russischen Speler Michail Tschigorin unentscheeden to hollen (9:9 bi 5 Remisen).
Sien Erfolge hemm dorto führt, dat he de Mögelkeit kreeg, den amteeren Schachweltmeester Wilhelm Steinitz heruttofordern. De Wettkamp funn van‘ 9. Dezember 1890 bit to’n 22. Januar 1891 in New York statt un gung nah harten Kamp mit en 8,5:10,5-Nedderlaag (veer Siege, söss Nedderlagen un negen Remis) to Enn‘.
Gunsberg nehm dornah noch an mehreren bedüüden Turnieren deel, wobi sien best Platzeeren de mit Mason deelt tweet Platz achter Richard Teichmann in London 1900 weer. De letzt bericht Turnierdeelnahm weer in Chester 1914, wo Gunsberg up den darten Platz keem.
He weer ok Schachjournalist un schreev för mehrere Zeitungen, so dat he nich blots up Priesgeld ut Turnieren anwiest weer. He hett ok sülvst Turniere organiseert, to’n Bispeel in Ostende 1906, un jung Talente fördert.
Gunsberg gull as wesselhaft un unstetig, sowohl in sien Speel as ok in sien Leven. Alexander Aljechin schreev 1930 in en Nahroop över Gunsberg, dat de kien besünners origineller, dorför aber flexibler Speler ween weer, de sück bannig good up dat Utnutzen van Swaakheiten van sien Gegner verstahn harr. Sien best Historsch Elo-Tall weer 2744 in‘ Juli 1889.