Gregòri II
![](http://178.128.105.246/cars-http-upload.wikimedia.org/wikipedia/commons/6/66/GregoryII.jpg)
Gregòri II (mòrt lo 11 de febrier de 731) foguèt lo 89en papa de la Glèisa Catolica Romana dau 19 de mai de 715 ò dau 21 de març de 716 au 11 de febrier de 731. Succediguèt a Constantin (708-715) e foguèt remplaçat per Gregòri III (731-741).
Bibliotecari de la Glèisa Romana, venguèt prèire lo 19 de mai de 715. Pasmens, la data precisa de son eleccion es pas coneguda. Son pontificat foguèt marcat per divèrseis afaires regardant lei glèisas occidentalas e lei relacions entre Roma, Constantinòple e lei Lombards. Premier, en 718, ordonèt a Petronax de restaurar l'Abadiá dau Mont Cassin qu'èra estat destruch per lei Lombards vèrs 580. Puei, s'ocupèt d'organizar l'evangelizacion d'Èssa e de Turíngia en 719.
Regardant lei relacions ambé lei Bizantins e lei Lombards, Gregòri II deguèt faciar un contèxte malaisat en causa deis avançadas dau rèi lombard, de la revòuta d'una partida de l'aristocracia lombarda còntra son sobeiran e de temptativas de còntra-ofensivas bizantinas. De mai, lei relacions teologicas ambé Consantinòple foguèron conflictualas en causa de desacòrdis prefonds entre lo papa e l'emperaire. En particular, en 728, lei Lombards conquistèron Ravena entraïnant una còntra-ataca bizantina sostenguda per la flòta veneciana. En 729, la vila èra reconquistada. Après una tiera de negociacions diplomaticas complèxas, lo papa se trobèt dins lo camp dei senhors lombards en revòuta en fàcia d'una aliança gropant lo rèi lombard Luitprand e lei Bizantins. Per s'aparar còntra aquela menaça, lo papa foguèt obligit de demandar l'ajuda dei Francs. Aquò obligiguèt lei Bizantins e Luitprand d'arrestar lo sètge de Roma mai la situacion demorèt malaisada per la papautat.