Krej Saary
Krej Saary (mjym.: Saarland, fr.: Sarre) je jedyn z mńyjszych zwjůnzkowych landůw Mjymcůw, położůny w połedńowo-zachodńij tajli kreju. Nazwa landu połazi uod rzeki Saary, kero przepływo bez jego połedńe. Mo 2570 km² wjyrchu a ůng. milijůn mjyszkańcůw. Stolicům a nojwjynkszym mjastym Kreju Saary je Saarbrücken. Na půłnocy mo grańica ino z jednym zwjůnzkowym landym, z Nadryńijům-Palatynatym, a na połedńu z Francyjům, skiż czygo tyn krej mjoł wielgi ajnflus na kultura a gyszichta landu. Jednak ludźe w Kreju Saary ńy godajům godkům francuskům, kej myśli wiela ludźi z inkszych tajlůw Mjymcůw, nale dialektami frankůńskimi godki mjymjeckiej.
Gyszichta przemysłowo Kreju Saary je fest powjůnzana z bergmaństwym, skiż czygo tukej można nojść wiela storych grubůw, hołdůw a hutůw. Nojbarźi znona ze storych hutůw je Völklinger Hütte, kero dźiś je muzeum i na liśće śwjatowygo dźedźictwa UNESCO.
W lotach 50ych Kraj Saary bůł jedyn z nojbogotszych landůw Mjymcůw, nale dziś skiż uobalyńa bergmaństwa mo wielgje bezroboće a gubi mjyszkańcůw. Jednak ze wszyskich landůw Mjymcůw mo nojsrogsza wielość autobanůw uod wjyrcha a nojsrogszo kwota domůw własnych.
