2024లో ఇప్పటివరకు మొత్తం 110 ఎస్ఎంఈ ఐపీఓలు లిస్ట్ అయ్యాయి. వీటిలో 87 ఐపీఓలు ఇన్వెస్టర్లకు లాభాలు అందించాయి. 43 ఐపీఓలు అయితే లిస్టింగ్ రోజే ఇన్వెస్టర్ల సంపదను రెట్టింపు చేసి భారీ లాభాలు అందించాయి. ప్రైమ్ డేటా బేస్ ఈ గణాంకాలను వెల్లడించింది. సింపుల్ గా చెప్పాలంటే ప్రతి నాలుగు ఎస్ఎంఈ ఐపీఓలలో మూడు ఐపీఓలు ఇన్వెస్టర్లను దనవంతులను చేశాయి. మల్టీబ్యాగర్ రిటర్నులు ఇచ్చిన ఐపీఓలు 40 శాతంగా ఉన్నాయి. మొత్తంగా ఈ ఏడాది లిస్ట్ అయిన ఎస్ఎంఈ ఐపీఓలలో కేవలం 22 ఐపీఓలు మాత్రమే నష్టాలను మిగిల్చాయి.
ఈ ఏడాది అత్యధిక లాభాలు అందించిన ఎస్ఎంఈ ఐపీఓలలో ఒవైస్ మెటల్ అండ్ మినరల్ ప్రాసెసింగ్ మొదటి స్థానంలో నిలిచింది. లిస్టింగ్ నుంచి ఇప్పటివరకు ఈ ఐపీఓ ఏకంగా 1,542 శాతం రిటర్నులు ఇచ్చి ఇన్వెస్టర్లపై కాసుల వర్షం కురిపించింది. ఇక ఆస్ట్రేలియన్ ప్రీమియం సోలార్, ఆల్పెక్స్ సోలార్, రీఫ్రాక్టరీ షేప్స్, విన్ సోల్ ఇంజినీర్స్ ఐపీఓలు 500 శాతం వరకు లాభాలు అందించాయి.
టీఏసీ ఇన్ఫోసెక్, ప్రాథం ఈపీసీ ప్రాజెక్ట్స్, వృద్ధి ఇంజినీరింగ్ వర్క్స్, కాయ్ సీ ఎనర్జీ అండ్ ఇన్ఫ్రా, తీర్థ్ గోపీకాన్ ఐపీఓలు కూడా మంచి లాభాలు అందించాయి. ఫలితంగా ఈ ఏడాది బీఎస్ఈ ఎస్ఎంఈ ఐపీఓ 90 శాతం వృద్ధి నమోదు చేసింది.
ఎస్ఎంఈ ప్లాట్ ఫారం కంపెనీలు విజయం సాధంచడానికి ముఖ్యమైన కారణాన్ని బీలైన్ క్యాపిటల్ అడ్వైజర్స్ కు చెందిన నెవిల్ సవ్జానీ తెలిపారు. ఐపీఓకు వచ్చిన ఎస్ఎంఈల వాల్యూయేషన్ ఇప్పటికే లిస్ట్ అయిన కంపెనీల కంటే ఆకర్షణీయంగా ఉండటంతో ఇన్వెస్టర్లు ఎక్కువ ఆసక్తి కనబరిచారని తెలిపారు. అలాగే ఎస్ఎంఈలకు మేక్ ఇన్ ఇండియాలో భాగంగా భారత ప్రభుత్వం ప్రోత్సాహకాలు అందిస్తుడం, చైనా తర్వాత ఆప్షన్ గా భారత్ ను చూస్తున్న ఇతర దేశాలు వీటిలో ఇన్వెస్ట్ చేస్తుండటం, రాబోయే రోజుల్లో మంచి వృద్ధి నమోదు చేసే అవకాశాలు కన్పిస్తుండటంతో ఇన్వెస్టర్లు పెద్ద సంఖ్యలో బిడ్డింగ్ లో పాల్గొంటున్నట్లు వివరించారు.