Martin Lutero

Martin Lutero (Eisleben, Zermania,10 de novembre del 1483 – Eisleben, Zermania, 18 de febraro del 1546) el xe stà un monego agostinian e atuador de la Reforma Protestante al scumizio del VI secolo. Nassuo a Eisleben inte'l 1483 da na famegia de orizene modeste ma in forte sensa inte na società che la gera drio conossar grande trasformazion a l'epoca, el frequenta la Università de Erfurt, par deventar zudegao, dal 1501. Inte l'ano 1507, ai 12 de Lugio, su la via da Erfurt in deretura de Eisleben, el vien folgorà da na vision, par cause che lu stesso no'l ga mai schiarà, fasendo cussì un vodo a Santa Ana e, ei 17 del stesso mese el intra inte'l monastier agostinian de Erfurt. Intel 1512 el vien chiama a coverzar na catedra de esezese a l'Università de Wittenberg. Xe qua che el madura na forte conossenza de le Scriture Sagre rivando a la conclusion che, la dotrina che la Chiesa Catolega la impone no la sia quela che el Signor su l'Evanzelo el ga ordenà. Dopo gaver proà a intrar in contato co l'arzevesco de Magonza Alberto da Colonia, senza resultà, grazie a alguni so amighi, el taca na opara de proselitisemo in torno par la Zermania. El processo par eresia el parte inte'l 1518, ma l'ano drio el vien fermà parché el papa Lion X el sperava inte na elezion a Imperador, dopo la morte del Massimilian I, del Pricipe Eletor de Sassonia Federigo el Savio, forte sostegnidor del Catedratego de Wittenberg oltra che figura infruente inte'l panorama politego de l'Impero. Imperador vegnarà però nomenà Carlo V, zà re de Spagna e desso a cavo del pì grando Impero del mondo, che el chiapava rento quasi tuta l'Europa e gran parte de la Merica Latina. El processo par eresia el riparte, concludendose inte'l 1520 co la condana, che la gavarà valor dal 1521. Ano che el vien rapio propio dal Principe Eletor de Sassonia Federigo el Savio al scovo de salvarghe la vita. Dal 1520, de fati, gera in valor anca la Dieta de Worms, co la qual Lutero el gera desso bandio no solo da la Chiesa Catolega ma anca da l'Impero. El Reformador el podarà cussì sevitar la so opara de Reforma, che al scumizio no la prevedeva un destaco da Roma(da lu considerà proprio un so falimento), ma na reforma interna a la Chiesa Catolega. El more a Eisleben inte'l 1546, a l'età de 63 ani.