Cuarta Croxada
Crociade ![]() | |
---|---|
![]() ![]() | |
Tipo | guerra di religione (it) ![]() ![]() |
Data | 1202-1204 |
Liogo | Balcani ![]() |
Consevense | Byzantine–Latin wars (en) ![]() ![]() |
Cronołozia |
La Cuarta Crozada la ze stà bandìa da papa Innocenzo III inte el 1198, e la gavea da verghe come obietivo la riconcuista de Gerusalemme tramite l'invasion de l'Egito. Inveçe ora de la fin l'esercito crozado el sà direto verso Costantinopoli, che inte el 1204 la ze stà concuistà e sachegià. L'Inpero bizantin el ze stà cuindi spartìo tra i crociati, e un cuarto e mezo de i so posedimenti i ghe ze ndà a venesia, che la gavea messo le so navi a disposision dei crociati.
Antefato
[canbia | canbia el còdaxe]La sità de Gerusaleme, concuistà durante la Prima Crozada inte el 1099, la zera stà riciapà dai mori de Saladin inte el 1187, e durante la Terza Crozada (1189–1192) i cristiani no i era stà boni de riconcuistarla. Inte el 1199, dopo che el papa Innocenzo III el gavea invità la cristianità a far na nova crozada, sà radunà n'esercito, fato sora-de-tuto da zente de la Francia, ma anca un póchi da Germania e Fiandre, soto el comando de Bonifacio I marchese del Monferrato.
La presa de Zara
[canbia | canbia el còdaxe]![](http://178.128.105.246/cars-http-upload.wikimedia.org/wikipedia/commons/thumb/1/11/Gustave_dore_crusades_dandolo_preaching_the_crusade.jpg/220px-Gustave_dore_crusades_dandolo_preaching_the_crusade.jpg)
I crociati i s'avea conbinà coi venesiani par farse trasportar par mar fin in Egito, dove i volea sbarcar e atacar el Cairo. Parò na olta che l'esercito el ze rivà a venesia (in soli 12 000 òmeni cuando se ghe ne spetava 33 500), i sa incorto de no verghe mìa schei in bisogno par pagar le navi: i venesiani i domandava 85 000 marchi d'arzento, ma i crociati i podea rivar solo fin a 51 000. Elora i venesiani i sa spaentà, parché lori i gavea zà fato dei investimenti, interonpendo parfin el comercio con l'Oriente, par preparar la spedision, e desso i ris-ciava de rimétarghe na barca de schei.
Donca el vecio doze Enrico Dandolo, che anca se l'era orbo dal tuto, in realtà el ghe vedea distante, el ga fato na proposta: sicome inte el 1181 la sità de Zara la s'avea ribelà ai venesiani, se i crociati i la riconcuistava i so debiti i sarìa stà scancelà. I crociati i ga acetà, e ne l'autuno 1202 la flota la ze partìa verso Zara, che in zincue giòrni la ze stà concuistà e sachegià. cuando el papa el ga savùo che i crociati i gavea alsà le mane contro altri cristiani, el ze ndà in bestia, e el volea scomunicarli tuti; ma a la fin el sà contentà de scomunicar solo i venesiani, e lassar che la crozada la continuese.
El dirotamento su Costantinopoli
[canbia | canbia el còdaxe]![](http://178.128.105.246/cars-http-upload.wikimedia.org/wikipedia/commons/thumb/c/c9/Eug%C3%A8ne_Ferdinand_Victor_Delacroix_012.jpg/220px-Eug%C3%A8ne_Ferdinand_Victor_Delacroix_012.jpg)
Intanto a Costantinopoli inte el 1185 l'inperador Isacco II l'era stà deposto e messo in preson da so fradel Alessio III, che el gavea fato anca cavar i oci. Inte el 1202 so fiol de Isacco, Alessio IV, l'era riussìo a scapar via e rifugarse in Germania; dopodiché el sà messo in contato coi crociati e con venesia prometendo schei, juto militar e parfin la riunion de la Ceza Ortodossa con cuela Catolica, a conto che i crociati i metesse lu sul trono de Bisanzio al posto de so zio Alessio III. El papa no ghe parea vèra de poder riunir le do Cese, e cuindi el sa fato convìnzar a dirotar la crozada su Costantinopoli, cavandoghe la scomunica ai venesiani.
El 25 de avril 1203 i crociati i ze ripartìi da Zara, e a fin zugno i ze rivà ne la sità de Galata (na olta dita Pera) proprio de fronte a Costantinopoli. Ma mentre Alessio IV el gavea garantìo che i sarìa stà ben ricevùi, no ze mia stà cussita, e ghe ze volù calche giòrno de batalia prima che el 17 de lujo i crociati i podesse sfondar le mura e entrar in sità. Elora l'usurpador Alessio III, vedendo che la 'ndava a finir mal, el ze scapà via da la sità portandose drio el tesoro inperial. Isacco II el ze stà liberà e rimesso sul trono, con so fiol Alessio IV come coreggente.
A sto punto Alessio IV el gavaria dovù mantegner le promesse, ma schei no ghe n'era e la riunion de le do Ceze no la ghe 'ndasea a genio né al popolo né ai preti. Alessio el ga zercà de tirarla in longo, ma intanto i crociati i restavà acanpà pena fora la sità e la popolasion la scuminsiava a ruzar e brontolar par le scoribande dei crociati. Durante un scontro tra alcuni crociati e i greci ze s-ciopà parfin un incendio, che el ga brusà un toco de la sità. A un çerto punto ghe ze stà na rivolta comandà da so cusin de Alessio IV, Alessio V dito Murzuflo, che el ga fato strangolar Alessio IV, mentre Isacco II el ze morto anca lu poco dopo, no se sa ben el parché. Alessio V, ciapà el potere, el sa rifiutà de pagar i crociati, e anzi el ga ordinà che i 'ndesse via da Costantinopoli.
El sachejo
[canbia | canbia el còdaxe]![](http://178.128.105.246/cars-http-upload.wikimedia.org/wikipedia/commons/thumb/6/65/Venice_-_St._Marc%27s_Basilica_10.jpg/220px-Venice_-_St._Marc%27s_Basilica_10.jpg)
I crociati naturalmente no i gavea la minima intension de 'ndar via, e i sa parecià par concuistar la sità. El 12 de avril 1204, dopo póchi giòrni de conbatimento, i crociati i ze sta boni de scalar le mura, grazie a un stratagemma inventà dai venesiani: cuesti i ga costruìo dele piataforme in zima ai àlbari de le navi, e dopo i ga fato inclinar le navi da na parte in maniera che le piataforme le rivesse a tocar le mura. Un grupeto de soldà i ga podù cuindi ocupar le mura e verzar le porte de la sità fasendo entrar el grosso de l'esercito. L'inperador Alessio V el ze scapà via anca lu, e durante la note gà ciapà el potere Costantino XI Lascaris, che el ga zercà inutilmente de fermar i crociati.
El 13 de avril ze tacà el grande sacco de Costantinopoli. I crociati i ga scuminsià a entrar in tute le case e le Ceze portandose via le opere d'arte e tuta la roba de valor. Tuto cuel che no se podea portar via el vegnea fuso o distruto. I sitadini i vegnea torturà parché i disese dove i gavea sconto i so tesori, e un mucio de zente la ze stà copà o violentà. A la fine, dopo 14 giòrni de inferno, i comandanti dei crociati i ga finalmente fermà el sachegio, i ga fato muciar tuto el bottino in tre Ceze e i ga provedù a spartirselo. I venesiani i sa portà via i cuatro cavai de bronzo che desso se pol vedar su la bazełega de San Marco a venesia, e un mucio de relicuie che desso le fa parte del Tesoro de San Marco.
Concluzion
[canbia | canbia el còdaxe]L'Inpero bizantin el se ga desfà, e i so teritori i ze spartìi tra i crociati, che i ga fondà al so posto l'Inpero latin d'Oriente. El primo inperador el ze stà Baldovino IX de Fiandra. Un cuarto de le tere concuistà el ghe ze ndà a l'Inpero, el resto el ze stà spartìo a metà tra i crociati, che i ga fondà vari Stati, e la Republica Veneta, che la ze stà la vera vincitrice. Difati i venesiani i gà guadagnà un mucio de posedimenti: la costa osidental de la Grecia, tuta la Morea, Nasso, Andros, Negroponte, Gallipoli, Adrianopoli e i porti de la Tracia sul mar de Marmara, oltre ai tre otavi de la sità de Costantinopoli, e in seguito anca l'isola de Candia. Da de lora el Doze el ga asunto el titolo de “Dominus cuartae partis et dimidiae totius Imperii Romaniae”, cioè Signor de un cuarto e mezo de l’Inpero Roman d’Oriente.
In çerte zone la nobiltà bizantina la ze comuncue riussìa a restar indipendente e a fondar dei Stati bizantini, come l'Inpero de Nicea e cuel de Trebisonda. L'Inpero latin comuncue nol ze mia 'ndà vanti tanto, parché zà inte el 1261 Michele VIII Paleologo inperador de Nicea el ga riconcuistà Costantinopoli.
El papa Innocenzo III, cuando el ga savù del sachegio, el ze restà inoridìo, anca parché el so legato, Pietro de San Marcello, el gavea siolto i crociati da la promessa de libarar Gerusalemme. La crozada cuindi la se ga fermà cua, e solo pochissimi crociati i ga continuà par conto suo fin in Terasanta. La Ceza Ortodossa e cuela Catolica le ze restà divise.
Wikimedia Commons el detien imàjini o altri file so Quarta Crociata
Controło de autorità | LCCN (EN) sh85034385 · GND (DE) 4139115-9 · BNF (FR) cb11943362s (data) |
---|