A la neve

O neve bianca e bela che a cascar
     te vedo pian pianin sora la tera,
     e i to fiocheti mete el cuor in fiera
     a quei che ga ben poco da pensar,

se ti gavessi mai da sbianchisar
     l'estremo Oriente, andove gh'è la guera
     e dove, povareti, a miera a miera
     fradei contro fradei se fa massar,

fame sto bel piaçer, sii ben leziera
     su quele fresche fosse e su quel mar
     de sangue spanto in barbara maniera;

e soto el bianco to niziol quietar
     se possa i morti, che dai vivi spera
     che un dì la guera gabia de cessar.