Terribile
Edission original: |
Olindo Guerrini, Le Ciàcole de Bepi, Roma, 1908 |
Fonte: |
← El retrato | Edission e fonte ▼ | Rerum novarum → |
![](http://178.128.105.246/cars-http-upload.wikimedia.org/wikipedia/commons/thumb/e/e8/Le_Ci%C3%A0cole_de_Bepi%2C_Roma_1908_%28page_95_crop%29.jpg/400px-Le_Ci%C3%A0cole_de_Bepi%2C_Roma_1908_%28page_95_crop%29.jpg)
Sì, vendetta, tremenda vendetta!
Rigoletto, Atto II, Scena III.
FISCHIÀ come un tenor Mery del Val
Segretario del Stato de la Chiesa
Stele che sento! Qual tremenda ofesa
Gà fato sti Albanesi a un Cardinal!
E ben canagie, cossa ghè de mal
S'el magna, el beve, e 'l dorme a la distesa?
L'Obolo, grazia a Dio, paga la spesa
E no quel che detiene al Quirinal.
Ah, i gà fischià in Alban, sti giacubini?
Ah, i gà fischià, polpete buzardone?
E alora a Roma gnente pelegrini,
Gnente mercà de Santi e de corone,
Gnente messe pei Padri Capuzzini,
Gnente bezi a chi tràfica in Madone!
No xela giusta? Chi la fa l'aspeta,
E po' che noi me rompa el tamburlan
Co la scusa de dir che per Alban
Castigo Roma co la mia vendeta.
I xe tutti una razza maledeta,
L'Albanese xe istesso del Roman..
Cossa diselo? I resta senza pan?
E a mi cossa m'importelo, ostregheta?
Co' gò vogia de pan e de’salame
Mi no fischio nissun, mi no importuno.
Che i fazza come mi, plebàgia infame!
Co' no gò vogia de magnar, dezuno.
Che i dezuna ancha lori e se i gà fame
E ben, che i vada da Giordano Bruno.
Giordano Bruno! Ah, quei gera tempi!
Quela la gera una gran bela età
Che i rispetava Dio, So Santità,
I beni de la Chiesa e i Sagri Tempi!
El mondo gera pien de boni esempi
E, qua a Roma, per tuta la cità,
Co' se sentiva spuzza de brusà,
Gera i fedeli che brusava i empi.
Ma adeso no ghè più gnente da far.
El mondo xe una tore de Babele
Che obedisse a la legge e no a l'altar;
E xe grazia de Dio se in Israele
Posso, ne l'ira mia boicotar
I osti, i alberghi, i bagarini e... quele!