Rerum novarum
Edission original: |
Olindo Guerrini, Le Ciàcole de Bepi, Roma, 1908 |
Fonte: |
← Terribile | Edission e fonte ▼ | Sempre interviste → |
![](http://178.128.105.246/cars-http-upload.wikimedia.org/wikipedia/commons/thumb/3/3e/Le_Ci%C3%A0cole_de_Bepi%2C_Roma_1908_%28page_98_crop%29.jpg/400px-Le_Ci%C3%A0cole_de_Bepi%2C_Roma_1908_%28page_98_crop%29.jpg)
Terra aulem sgabellum pedum meorum.
Is. LXVI, 1.
GALO visto? Mi son placido e pio,
Ma se i me toca gnente in Israele,
Devento un drago che nemanco Dio,
E trema el mondo, el diàscone e le stele.
Gàlo visto, paron, gàlo sentio
Quel che go dito al popolo ribele
E ch'enciclica go petà de drio?
Roba da farghe saltar via la pele!
Questo xe gnente! Go petà de più
Una squadra de vescovi, de queli
Che faria danar l'anema a Gesù
E gò dito in francese ― Alon, fradeli,
Oeil a la plume e qui s'è vu, s'è vu!
Che oci! Lustri che i parea corteli!
Viva l'Italia! Questo xe el paese!
Questo xe el Paradiso e la cucagna,
Semenà de conventi e pien de chiese,
Indove i preti gode e i frati magna!
El Governo xe bon e xe cortese.
Comandèmo in cità come in campagna,
El nostro Pantolon paga le spese
E i ne còcola qua megio che in Spagna.
L'eredità le piove ogni momento,
I Gesuiti insegna e nei colegi
I ga i putei de mezo Parlamento.
Passa i ministri e resta i privilegi,
E i liberai me fa tanto spavento
Che iscartozzo el rapè ne le so legi!
E adesso i pensa ― e mi ghe supio soto ―
Furbi! de dar el voto anca a le done,
L'unico seso ancora un fià devoto
E che crede a le strighe e a le Madone!
Questa la xe un'idea! Questo xe un moto
Da incoragiar sott'acqua e co le bone,
Che quasi tute le darà el so voto
Secondo el cofessor dise e ghe impone.
Cussì, co la paura dell'inferno,
De la nostra scomunica e del veto,
Le carampane monterà al Governo.
E alora, in forza d'un Real Decreto,
So Zelenza el Ministro de l'Interno
Sarà, de jure, un scopator segreto.