Baldr
![](http://178.128.105.246/cars-http-upload.wikimedia.org/wikipedia/commons/thumb/c/c8/Baldr_dead_by_Eckersberg.jpg/220px-Baldr_dead_by_Eckersberg.jpg)
Baldr is de twidde zeune van Odin en Frigg. Der was gin schondre god die mêer geirn gezien wierd of Baldr. In de Poëtische Edda stoat der over em: ...ok er frá honum gott at segja. Hann er svá fagr álitum ok bjartr svá at lýsir af honum... (...over em is 't er juste moa goeds te zeggen. J'is den bestn en j'is deur iedrêen gepreezn...) Baldr was de god van de schôoneid, de zuvereid en van 't licht. Je trouwde me Nanna en z'aan een zeuntje t'ope, Forseti, de god van de gerechtigeid. Under uus stound in Breidablik (brêe glans).
De dôod van Baldr
[bewerkn | brontekst bewerken]Zô'n twa schôons, da kan nie bluuvn, en azo was 't ook me Baldr. Ip een nacht kreegt y styf slichte droomn en je begost oengrust te wordn. Je vertelde da an z'n ouders, die omdan ze em styf gêêrn zaagn, drikt ol de Asen (de goodn die afstamden van Odin) t'ope riepn en der wer beslootn da Odin me z'n peird Sleipnir no den ounderweireld goenk ryen vo do te vroagn wa dan die droomn wildigen zegn. Do kwamt Odin te weetn dan ze dor ol olles greid an 't maakn woarn vo Baldr te ountvangn omdat y goenk vermôord wordn deur z'n blinde broere Höder.
Os ze da oorde liet Frigg 't vier en 't woater, 't yzer en ol d'andre ertsen, de stêenn en d'eirde, de boomn en ol de plantn, de ziektn en de vergiftn en ol de vierpôtige bêestn, de veugels en de worms zweirn dan ze Baldr noois zoun kwoad doen. Ol d'Asen woarn content, mor omdan ze oltyd wel speelveugels woarn begostn ze me van olles no Baldr te smytn: ol under wapens, stêenn, noem mor ip, mo niet kost em zêer doen. Iedrêen vound da styf gêestig, behalve Loki, die no Frigg goenk en vroeg of da echt olles en iederêen dien eed gezwoorn aad. Frigg zei dorip van ja, behalve een styf jounk plantje, de mistelplante, da nog te jounk was vo een eed te zweirn. Loki zocht da plantje en makte der een pyle van. Die pyle gaft y an den blinden Höder en je zei dat y em ook e ki mocht amuseern lik ol d'andre en dat y ook e ki moest schietn no Baldr. Os de pyle em rakte vielt Baldr drikt dôod ip de ground. Olle pogingn vor em were levend te krygn an gin resultoat en ze maktn der een styf schône begravinge van. Bist die begravinge stuuktege ook Nanna dôod en ze wier by em ip den brandstapel geleid, die Thor me z'n amer anstak. De dôod van Baldr wier deur de Asen gezien ols een êeste têekn van de Ragnarök, den oundergank van de weireld.