由河正宇、車太鉉、朱智勛、金東旭、金香起、李政宰、EXO嘅D.O.等主演嘅人氣韓片《與神同行》,喺韓國、香港、台灣等地都創票房佳績。
《與神同行》上周四喺香港開畫,一直穩坐票房冠軍寶座,噚晚9時,票房更成功衝破2千萬,而噚日單日票房有$2,249,276,比上周五嘅票房高出26.7%,截至噚日累積票房有逾2,047萬港元,認真可喜可賀。而喺韓國方面,上月20號開畫嘅《與神同行》雖然已經上映1個月,但佢依然受觀眾歡迎,噚日單日仍吸引逾7.6萬觀眾入場,累計觀影人次逾1,325萬名觀眾,喺韓國歷代最高票房嘅排行榜上,正狙擊緊第四位嘅《阿凡達》(Avatar)(約有1,330萬人次),預計今日將可取代《阿凡達》,進佔韓國歷代最高票房嘅第四位。另外,由河正宇主演嘅《1987》喺韓國同樣受歡迎,噚日單日引91,401名觀眾捧場,累計觀影人次已達629萬名觀眾。更多韓流,喺晒《娛果》
http://fb.com/appledailyent