Kgalagadi-vredespark
Kgalagadi-vredespark is 'n uitgestrekte wildernis- en bewaringsarea in Suider-Afrika. Kgalagadi beteken plek van dors. Die park lê grotendeels in die suidelike Kalahariwoestyn. Die landskap bestaan uit rooi sandduine, yl plantegroei, hier-en-daar 'n boom, en die droë rivierbeddings van die Nossob- en Auobriviere. Die riviere vloei volgens oorlewering slegs eenkeer in 'n eeu. Water vloei egter ondergronds en verskaf lewe aan gras en kameeldoringbome wat in die rivierbeddings gedy. Die rivier mag gering vloei na groot donderstorms, terwyl die wild feesvier en na die rivierlopies stroom om hulle ewige dors te les.
Kgalagadi-vredespark (Kgalagadi Transfrontier Park) | |
---|---|
Land | Suid-Afrika en Botswana |
Provinsie | Noord-Kaap |
Naaste dorp | Upington |
Koördinate: 25°46′0″S 20°23′0″O / 25.76667°S 20.38333°O | |
Oppervlak | 38 000 ha |
Openingsjaar | 31 Julie 1931 (Kalahari Gemsbok Park) 12 Mei 2000 (Kgalagadi-vredespark) |
Bestuursliggaam | SANParke en Botswana Wildlife and National Parks |
Webblad | http://www.sanparks.org/parks/kgalagadi/ |
![](http://178.128.105.246/content-http-upload.wikimedia.org/wikipedia/commons/thumb/4/43/Kgalagadi-0001.jpg/220px-Kgalagadi-0001.jpg)
![](http://178.128.105.246/content-http-upload.wikimedia.org/wikipedia/commons/thumb/3/3e/Kgalagadi-0005.jpg/220px-Kgalagadi-0005.jpg)
Ligging
wysigDie park omsoom die grens tussen Suid-Afrika en Botswana en bestaan uit twee aangrensende nasionale parke:
- Kalahari Gemsbok Nasionale Park in Suid-Afrika
- Gemsbok Nasionale Park in Botswana
Die totale oppervlak van die park is 38 000 km². Ongeveer driekwart van die park lê in Botswana en 'n kwart in Suid-Afrika. Die hoofkamp van die wildtuin is by Twee Rivieren 26°28′20.6″S 20°36′41″O / 26.472389°S 20.61139°O, ongeveer 270 km van Upington en 950 km per pad vanaf Pretoria.
Wildlewe
wysigDie park het 'n wye verskeidenheid natuurlewe. Dit is die tuiste van groot soogdierpredatore, soos die swartmaanhaar Kalaharileeus, jagluiperds, luiperds en hiënas. Troppe plantvreters soos blouwildebeeste, springbokke, elande en rooihartbeeste woon en trek in die park rond na gelang van die seisoen, en verskaf daarmee genoeg voedsel aan vleisetende diere. Meer as 200 verskillende spesies voëls kan in die park waargeneem word, onder andere aasvoëls, arende en sekretarisvoëls.
Klimaat
wysigDie weer in die Kalahari kan uiterstes bereik. Januarie is midde-somer in Suider-Afrika en die dagtemperatuur oorskry gemaklik 40 °C (104 °F). Winternagte kan bitterkoud word met temperature benede vriespunt. Ekstreme temperature van –11 °C en op tot 45 °C is al aangeteken. Reënneerslae is baie skaars in hierdie woestyngebied.
Geriewe
wysigDaar is slegs drie tradisionele ruskamp-lodges vir toeriste. Hulle is voldiens lodges en sluit bv. lugreëling, winkels en swembaddens in. Dan is daar ses wilderniskampe in die park, hulle verskaf slegs skuiling en vars water; besoekers moet hulle eie voedsel, drinkwater en vuurmaakhout verskaf.
Geskiedenis
wysigDie Kalahari Gemsbok Nasionale Park in Suid Afrika is op 31 Julie 1931 gevestig, om migrerende wild, veral gemsbokke, teen wilddiefstal, te beskerm. In 1948 is daar 'n informele, mondelinge ooreenkoms tussen die Betsjoeanaland Protektoraat en die Unie van Suid-Afrika gemaak om 'n aaneenlopende bewaringsgebied te skep.
Die Suid-Afrikaanse Nasionale Parke (SANParke) en die Departement van Wildlewe & Nasionale Parke van Botswana het in Junie 1992 'n bestuurskommitee gestig om die parke te bestuur as 'n ekologiese eenheid. 'n Bestuursplan is opgestel, aangepas en in 1997 goedgekeur. Die partye deel gelykop aan die parke se ingangsfooie. Op 7 April 1999 het Suid Afrika en Botswana 'n historiese bilaterale ooreenkoms geteken waarin hulle beloof om die Gemsbok Nasionale Park (Botswana) en die Gemsbok Nasionale Park (Suid-Afrika) as 'n enkele ekologiese eenheid te bestuur. Alhoewel die grens tussen die parke 'n internasionale grens is, is daar nie fisiese heinings nie. Op 12 Mei 2000, loods Presidente Festus Mogae (Botswana) en Thabo Mbeki (Suid-Afrika) die eerste vredespark, die Kgalagadi Oorgrens Park.
Sien ook
wysigEksterne skakels
wysig- Wikimedia Commons het meer media in die kategorie Kgalagadi-vredespark.
- Kgalagadi-vredespark op Sanparke se webblad
- Departement van Omgewingssake en Toerisme se webblad Geargiveer 6 Januarie 2006 op Wayback Machine
- Foto's en Safarigids vir die Kgalagadi-vredespark
- !Xaus Lodge – besit en bedryf deur die Khomani San- en Mier-gemeenskappe