Podgorica
Podgorica | ||
![]() | ||
Kelk imaji pri Podgorica. | ||
![]() |
![]() | |
Standardo | Blazono | |
Lando: | ![]() | |
Informo:
| ||
Latitudo: | 42°26'28" N | |
Longitudo: | 19°15'46"E | |
Altitudo: | 48 til 56 m | |
Surfaco: | 108 km² | |
Habitanti: | 187 085[1] (2011) | |
Denseso di habitantaro: | 1.700 hab./km² | |
Horala zono: | UTC+1 | |
Urbestro: | Ivan Vuković (DPS) | |
Mapo:
| ||
Oficala retosituo:
| ||
podgorica.me |
Podgorica esas chef-urbo e maxim populoza urbo di Montenegro. Ol havis 187 085 habitanti en 2011. Dum la Mezepoko til 1326 l'urbo konocesis kom Ribnica (pronuncez Ribnitsa), e de 1946 til 1992 la nomo dil urbo esis Titograd.
![](http://178.128.105.246/content-http-upload.wikimedia.org/wikipedia/commons/thumb/e/e2/Urban_Podgorica.jpg/250px-Urban_Podgorica.jpg)
La sideyi di la maxim importanta universitati e fakultati di Montenegro, exemple l'Universitato di Montenegro (Универзитет Црнe Горe, Univerzitet Crna Gora) e l'Universitato Mediteranea (Универзитет Медитеран, Univerzitet Mediteran) jacas en la urbo. Ol ank esas la centro industriala, komercala e financala di la lando.
La nuna urbestro di Podgorica esas Ivan Vuković.
Historio
redaktarLa maxim anciena restaji pri homala habitado en la regiono evas de la petroepoko. Du tribui Iliriana, le Labeatae e le Dokleatai habitis la regiono e mantenis komerco kun Romani.
Podgorica propre fondesis pos l'arivo dil populo Avar de Panonia, e dil Slavi dum la 5ma yarcento, pos la krulo dil Romana imperio. L'unesma nomo dil urbo esis Birziminium, pose chanjita a Ribnica. La nomo "Podgorica" unesmafoye mencionesis en 1326.
Otomani kaptis l'urbo en 1474, ed ol divenis parto dil Sanjak (provinco) Shkodra en 1479. L'Otomani konstruktis granda fortreso en la urbo, qua divenis importanta bastiono di lua imperio.
Ye la 7ma di oktobro 1874, kom violentoza reakto a la mortigo di Juso Mučin Krnić, Otomana trupi mortigis adminime 15 personi en Podgorica. La masakro divulgesis exter Montenegro, e fine enduktis milito Montenegrana-Otomana, de 1876 til 1878.
Pos la kongreso di Berlin, de la 13ma di junio til la 13ma di julio 1878, l'urbo divenis parto dil rejio Montenegro. To reprezentis la komenco di nova epoko di prospero por Podgorica: en 1902, nova chosei konstruktesis por ligar ol a vicina urbi, e tabako divenis la maxim importanta produkturo por exportaco di la lando. En 1904 kreesis banko Zetska, l'unesma di Montenegro, qua pose divenis Banko Podgorička.
L'unesma mondomilito haltis la prospero di Podgorica, lor la maxim granda urbo di Montenegro. Ye la 10ma di agosto 1914, l'urbo subisis bombardo da avioni de Austria-Hungaria e 9 militisti e plusa 13 civili mortis. L'urbo bombardesis tri altra foyi en 1915. De 1916 til 1918 l'urbo e tota la lando okupesis da Austria-Hungaria. Pos la liberigo da Federita trupi, kontroversa asemblo finis la nedependo di Montenegro, ed aceptis fuzar la lando kun rejio Serbia ed altra regioni, por formacar la Rejio di Serbi, Kroati e Sloveni. Lor, la habitantaro di Podgorica esis cirkume 14 mil personi.[2]
Geografio
redaktarLa reliefo di Podgorica esas precipue plana, distante 15 km norde de la lago Skadar e cirkume 35 km de Adriatiko. La fluvii Morača e Ribnica trairas l'urbo, dum ke la fluvii Zeta, Cijevna, Sitnica e Mareza fluas proxim ol. Lua precipua fluvio esas Morača, qua esas larja de cirkume 70 metri proxim la centro dil urbo, dum ke l'altra esas rivereti.
La maxim alta punto di Podgorica jacas 130 metri super la marala nivelo. Altra kolini esas Malo brdo (altitudo di 205,4 metri) e Velje brdo (altitudo di 283 metri). Tamen, li esas tre abrupta por urbala okupo.
La klimato dil urbo esas an la limito inter la mediteranea e la subtropikala (Csa e Cfa segun la klimatala klasifikuro da Köppen). La mezavalora temperaturo en julio (somero) esas 26°C, dum ke la temperaturo en januaro (vintro) esas 5°C.
La mezavalora yarala pluvo-quanto esas 1.658 mm, e la maxim pluvoza monato esas novembro, kun mezavalore 238 mm.
Referi
redaktar- ↑ Montenegrin 2011 census - Publikigita da Monstat. Dato di publikigo: 2011.
- ↑ "Imperijal" bio najljepši - Dato di publikigo: 5ma di agosto 2013. Idiomo: Serba.