Bogotol

Sibirin traktan Bogotol'skai-stancii oli olmas 18. voz'sadan kahtendes polespäi. Se om nügüd'-ki kuti erine Bogotol-külä (Čuliman oiktal randal). Külän (ende aulan) nimi libui hakasan kelen Паға тол-sanoišpäi «löcuiden äjüz» legendan mödhe. Bogotol-lidnan aluz om pandud vl 1893 žiloks Bogotol'skai-raudtestancijanno holitamha Transsibad. Žilo sai lidnan statusad vl 1911.

Bogotolan ižandusen päedheotandad oma sidodud raudten radonke (depod, vagonoiden kohenduztegim). Mugažo söndtavaroiden pästand sijaližes torhudespäi i instrumentan lukkolsepoiden da montažnikoiden täht tehmine oma lidnas.

Transsib-raudte läbitab lidnad. Bogotol sijadase mecstepin zonas, 290 m ü.m.t. keskmäižel korktusel. Reljef om kukhikaz. Matkad lidnan keskusespäi Čulim-jogehesai (Obin oiged ližajogi) om kuz' kilometrad suvhe, röunaspäi — kaks' kilometrad suvhe.

Matkad Krasnojarskhasai om 252 km päivnouzmha. Lähembaine järed lidn om Ačinsk 70 km päivnouzmha «Sibir'»-avtotedme (R255). Avtote mäneb lidnan i Bogotol-külän keskes, Čuliman oiktal randpolel.

Bogotol om lidnümbrikon üks'jäižeks eländpunktaks.

Lidnümbrikon tobmuden pämez' om sen Administracijan pämez'. Edeline lidnan pämez' om Andrei Artibäkin (eloku 2015 — kül'mku 2017). Lidnümbrikon Deputatoiden nevondkundan ezimez' om Aleksandr Räbčonok vn 2017 keväz'kuspäi. Edeližed nevondkundan ezimehed oma Vladimir Konovalov (reduku 2015 — keväz'ku 2017), Andrei Artibäkin (radoi vn 2015 redukuhusai).

Vn 2010 Venäman rahvahanlugemižen mödhe lidnan eläjiden lugu oli 21 051 ristitud, vn 2021 — 18 206 ristitud. Kaik 20 245 ristitud elihe lidnas vl 2017. Kaikiš suremb lidnan ristitišt oli 30 874 eläjad vl 1959 i 30 100 eläjad vl 1975.

Ortodoksižen hristanuskondan kaks' jumalanpertid^[1] oma sätud lidnas: ph. Mikulai-čudonsädajan (uz', om letud vll 1988−1991) i ph. Aleksandr Nevalaižen (om sauvomas vspäi 2010).

Lapsiden opendusen aluzkundad oma severz'-se päivkodid, viž keskškolad (nomerad 2..6), čomamahtoiden škol, sportškol. Bogotolan transportan tehnikum^[2] om lidnan professionaližen opendusen aluzkundaks.

•  
  Kanctavaroiden lauk (2015)
•  
  Škol nomer nell' (2015)
•  
  Teverižen holitajan kompleksan sauvomine «Sibir'»-avtotrassal lidnan röunal (2015)
•  
  Raudteradnikoiden läžundkodi (2015)
•  
  Bogotol-päraudtestancijan sauvuz vl 2008

1. ↑ Bogitolan pühäpertid sobory.ru-saital. (ven.)
2. ↑ Bogotolan transportan tehnikuman sait (b-tt.ru). (ven.)

• Lidnan tobmuden sait (bogotolcity.gosuslugi.ru). (ven.)