Anglikaanse Gemeenskap
![](http://178.128.105.246/content-http-upload.wikimedia.org/wikipedia/commons/thumb/a/ab/Archbishop_of_Canterbury_arms.svg/220px-Archbishop_of_Canterbury_arms.svg.png)
Die Anglikaanse Gemeenskap (Anglican Communion) is 'n groep kerke, veral in Engelssprekende lande, wat uit die Kerk van Engeland ontstaan het en steeds nou daaraan verwant is.[1] Dit kan gesien word as 'n internasionale vereniging van Anglikaanse kerke, bestaande uit die Kerk van Engeland en die nasionale Anglikaanse lands- en streekskerke wat volle kommunie met die Engelse Moederkerk en in besonder met sy primaat, die Aartsbiskop van Canterbury, het. Daar bestaan nogtans geen enkele "Anglikaanse Kerk" wat universele juridiese gesag oor Anglikaanse gelowiges uitoefen nie aangesien elke nasionale of streekskerk outonomie geniet.
Die status van volle kommunie beteken idealerwys dat onder alle Anglikaanse kerke enigheid oor godsdienstige leerstellings heers en alle praktiserende lidmate aan die sakrementale lewe van elke kerk mag deelhê. Met sowat 80 miljoen lidmate wêreldwyd is die Anglikaanse Gemeenskap die derde grootste Christelike denominasie in die wêreld na die Rooms-Katolieke en Oosters-Ortodokse Kerke. Sommige kerke staan vanweë hul historiese bande met Engeland bekend as Anglikaans, soos die Anglikaanse Kerk van Suider-Afrika. Ander, soos byvoorbeeld die Kerk van Ierland en die Episkopale Kerke van Skotland en Amerika, verskil hiervan en dra hul eie name. Elke kerk het sy eie leerstellings en liturgie wat in die meeste gevalle op dié van die Kerk van Engeland baseer, asook sy eie organisasiestruktuur en regtelike prosedure onder leiding van 'n plaaslike primaat.
Verwysings
[wysig | wysig bron]- ↑ HAT Taal-en-feitegids, Pearson, Desember 2013, ISBN 978-1-77578-243-8
Eksterne skakels
[wysig | wysig bron]Wikimedia Commons het meer media in die kategorie Anglikaanse Gemeenskap.