Vacuna
Vacuna | |
---|---|
Remedio (es) ![]() | |
medicamento biológico (es) ![]() | |
![]() | |
![]() |
Les vacunes (del llatín vaccinus-a-um, vacunu; de vacca-ae, vaca). son preparaos d'antíxenos qu'una vegada dientro del organismu prevoquen una rempuesta d'ataque, denomada anticuerpu (qu'esanicia l'antíxenu). Esta rempuesta xenera memoria inmunolóxica produciendo, na mayoría los casos inmunidá permanente frente a la malura. La vacuna foi inventada por Edward Jenner.
Les vacunes clasifíquense en dos grandes grupos:
- vacunes vives o amenorgaes
- vacunes muertes o inactivaes
Esisten delles maneres d'obtención:
- Vacunes avirulentes preparaes a partir de formes non peligroses del microorganismu patóxenu.
- Vacunes posificaes a partir d'organismos muertos o inactivos
- Antíxenos purificaos
- Vacunes xenétiques
Les vacunes alminístrense per duana d'una inyeición, o per vía oral (tanto con llíquidos como con pastielles).
Orixe de les vacunes
[editar | editar la fonte]![](http://178.128.105.246/content-http-upload.wikimedia.org/wikipedia/commons/thumb/2/2e/Vaccination-polio-india.jpg/210px-Vaccination-polio-india.jpg)
La belleya o viruela foi la primera malura que'l ser humanu intentó prevenir inoculándola en sí mesmu con otra mena d'enfermedá. Créese que la inoculación ñació na India o en China alrodiu del 200 e.C.. Na China, a los pacientes que sofríen menes amenorgaes de belleya, recoyíen-yos les postielles ensugaes, pa mazales hasta algamar un entemezu con aspeutu de polvu que llueu s'introducía pela nariz, col envís d'inmunizase.
En 1718 Lady Mary Wortley Montague informó de que los turcos teníen el vezu d'inoculase con fluyíos tomaos tamién de casos leves de viruela. Lady Montague inoculó a los sos propios fíos d'esta miente. En 1796 demientres l'andaz de la belleya n'Europa, un médicu rural d'Inglaterra, Edward Jenner, adicó que les recolleutores de lleche adquiríen ocasionalmente una mena de "viruela de vaca" o "viruela vacuna" (cowpox) per aciu del contautu continu con estos animales, y que llueu quedaben a salvu d'amalicar de belleya común. Efeutivamente, tiense comprobao y afitao qu'esta viruela vacuna ye una variante leve de la mortífera viruela humana. Trabayando sobro esti casu d'inoculación, Jenner tomó lleche vacuna de la mano de la graxera Sarah Nelmes. Insertó esti fluyíu a traviés d'inyeición nel brazu d'un neñu d'ocho años, James Phipps. El pequeñu amosó síntomes de la infeición de viruela vacuna. Cuarenta y ocho díes más tarde, tres de recuperase'l neñu, Jenner inyeutó-y al neñu infeición de viruela humana, pero esta vegada el neñu nun amosó nengún síntoma del mal.
Cronoloxía de les vacunes
[editar | editar la fonte]Namái la belleya se tien desaniciao nel mundu. La poliomielitis y el sarapicu alcuéntrense en campañes de desaniciu.
- 1879: Primer vacuna pa la cirria o foria;
- 1881: Primer vacuna pal cabruncu o pernera;
- 1882: Primer vacuna pa la rabia;
- 1890: Primer vacuna pal tétanu;
- 1890: Primer vacuna pa la difteria o garrotiyu;
- 1897: Primer vacuna pa la peste o .
- 1926: Primer vacuna pa la llandra;
- 1927: Primer vacuna pa la tisis;
- 1935: Primer vacuna pa la fiebre mariella;
- 1937: Primer vacuna pal tifus;
- 1945: Primer vacuna pal gripe o zangarria;
- 1952: Primer vacuna pa la poliomielitis;
- 1954: Primer vacuna pa la encefalitis xaponesa;
- 1962: Primer vacuna oral pa la poliomielitis;
- 1964: Primer vacuna palsarapicu;
- 1967: Primer vacuna pa les paperes;
- 1970: Primer vacuna pa la rubeola;
- 1974: Primer vacuna pa la varicela;
- 1977: Primer vacuna pa la neumonía (Streptococcus pneumoniae);
- 1978: Primer vacuna pa la meninxitis (Neisseria meningitidis);
- 1981: Primer vacuna pa la hepatitis B;
- 1985: Primer vacuna pa la haemophilus influenzae tipu b (HiB);
- 1992: Primer vacuna pa la hepatitis A;
- 1998: Primer vacuna pa la malura de Lyme;
- 1998: Primer vacuna pal rotavirus.
- 2006: Primer vacuna pal Cáncer d'úteru
Referencies
[editar | editar la fonte]Enllaces esternos
[editar | editar la fonte]
Wikimedia Commons tien conteníu multimedia tocante a Vacuna.