Louvre
![](http://178.128.105.246/content-http-upload.wikimedia.org/wikipedia/commons/thumb/e/ec/Mona_Lisa%2C_by_Leonardo_da_Vinci%2C_from_C2RMF_retouched.jpg/200px-Mona_Lisa%2C_by_Leonardo_da_Vinci%2C_from_C2RMF_retouched.jpg)
An Museo kan Louvre (Pranses: Musée du Louvre) sa Paris, Pransya, sarong monumento historiko asin ini sarong museo nasyonal kan nasyon na ini. Namumugtak an museo sa Walang Pampang kan Seine na sakop kan enot na arrondissement (Enot na distrito administratibo). Haros 35,000 na mga obheto gikan pa periodong ika-6 na B.K. hanggan ika-19 na siglo A.D. an nakaeksibit. Ikinaag an museo kan taon 1793, nagookupar nin hiwas na 60,000 m² asin 9.26 milyon katawo an nagbisita igdi kan taon 2014.[1] Linalaoman na pagtongtong kan taon 2025, mga 12 milyon na bisita na an magdadalaw igdi taon-taon. [2]
An museong ini nakakaag sa Palasyo nin Louvre (Palais du Louvre). Dati an palasyong ini sarong kota na pinatindog ni Felipe II. Mala ta igwa pang mga tada' kan kota na ini an naririsa. Pirang beses na pigpadakula an edipisyo. Kan taon 1674, si Louis XIV pinili na erokan an Palasyo nin Versailles asin an Louvre ginibong primeramente sarayan kan mga gamit kan hade. Kan Rebulosyon Pranses, ipinagboot na kan Asamblea Nasyonal na an Louvre tuyo nang sarong museo na kun saen itipon asin i-eksibit an mga pamanang yaman kan nasyon.
Sa museo kan Louvre nasasaray asin makikita an kwadro kan Mona Lisa, an Kodigo ni Hammurabi, Venus nin Milo, An Birhen asin an Aki Kasaro si Sta. Ana, an Pinakpakan na Kapangganahan kan Samothrace.
Ika-21ng Siglo
[baguhon | baguhon an source]An Musee de Louvre may saray na 380,000 na mga obheto asin pinapadalan an 35,000 na mga obra nin arte sa walong departamento curatorial asin an 60,600 metro kwadradong (652,000 pye kwadrado) hiwas kaini itinalaga sa mga permanenteng kuleksyon.[3] An museo pig'eeksibit mga iskultor, objets d'art, mga pinintura, mga drawing asin mga artifak arkeolohiko. Ini na daa an pinakadinadalaw na museo, mala ta mga 15,000 na bisita an aro'aldaw na'igdi, 65 porsyento kaini mga turistang dayo.
Kan taon 2012, hinaman an mga bagong galeriya para sana sa Arte Islamiko na may hiwas na 3,000 metro kwadrado sa bandang sur na kabtang kan museo Louvre. [4]
![](http://178.128.105.246/content-http-upload.wikimedia.org/wikipedia/commons/thumb/6/66/Louvre_Museum_Wikimedia_Commons.jpg/600px-Louvre_Museum_Wikimedia_Commons.jpg)
Mga Panluwas na Takod
[baguhon | baguhon an source]- An opisyal na websayt kan Louvre- http://www.louvre.fr/llv/commun/home.jsp?bmLocale=en Archived 2011-11-24 at the Wayback Machine.
Toltolan
[baguhon | baguhon an source]- ↑ http://www.statista.com/statistics/247419/yearly-visitors-to-the-louvre-in-paris/ Kinua 5-1-16
- ↑ https://news.artnet.com/art-world/louvre-expects-12-million-visitors-per-year-by-2025-69408 Kinua 5-1-15
- ↑ https://web.archive.org/web/20080415081952/http://www.louvre.fr:80/llv/oeuvres/alaune.jsp?bmLocale=fr_FR Kinua 5-1-16
- ↑ http://www.ft.com/cms/s/2/ad9c2ff2-f5bf-11e1-bf76-00144feabdc0.html#axzz26xYVPBmB Kinua 5-1-16