Austrie-Ongjarie
![](http://178.128.105.246/content-http-upload.wikimedia.org/wikipedia/fur/thumb/7/7b/Oe_u_map.jpg/220px-Oe_u_map.jpg)
![](http://178.128.105.246/content-http-upload.wikimedia.org/wikipedia/fur/thumb/d/dc/Austria_hungary_1911big.jpg/220px-Austria_hungary_1911big.jpg)
![](http://178.128.105.246/content-http-upload.wikimedia.org/wikipedia/fur/thumb/c/c9/33oesterreichungarn.jpg/220px-33oesterreichungarn.jpg)
![](http://178.128.105.246/content-http-upload.wikimedia.org/wikipedia/fur/thumb/5/56/Vopna.jpg/100px-Vopna.jpg)
La monarchie austro-ongjariche, ancje cognossude come monarchie dal Danau o monarchie dualistiche o monarchie duâl (e clamade ancje Kakanien di Robert Musil, cuntun riferiment ale abreviazion austriache "k. k." par la zone de Cisleitanie) e jere un stât multietnic dale Europe centro- sud-orientâl. Al nassè daspò il cambiament dal Imperi austriac intune monarchie dualistiche secont l'Ausgleich (ven a stâi compromès) austro-ongjaric. Al esistè dal 8 di Jugn dal 1867 al 31 di Otubar dal 1918 (cuant, ale fin dale Prime vuere mondiâl, la Ongjarie a si ritirà de union monarchiche).
E si componeve di doi stâts: dai "reams e i paîs rapresentâts tal Parlament dal ream (tod. Reichsrat), ufizialmentri Cisleitanie" (dome dal 1915 clamade aministrativamentri Austrie), e dai "paîs dale sante corone ongjarese di Scjefin (tod. heilige ungarische Stephanskrone)". Tal 1878 e fo anetude ancje la Bosgne-Erzegovine, aministrade insiemit des dôs entitâts statâls.
I acuardis juridics costituzionâi dal Ausgleich a siguravin (intal sens di une union reâl) la paritât juridiche tra i doi stâts components, in rapuart l'un cun chel altri. Il comun cjâf di stât al ere "l'Imperadôr d'Austrie e re apostolic di Ongjarie'" (tod. Kaiser von Österreich und Apostolische König von Ungarn), dale cjasade dai Asburc-Lorene.
La Austrie-Ongjarie e fo cussì governade di:
Cuntune superficie di 676.715 km² e 52.800.000 abitants cirche (1914), la Austrie-Ongjarie e jere in Europe il secont stât par estension (daûr la Russie) e il tierç par numar di abitants (daûr la Russie e la Gjermanie di chê volte).
Teritorialmentri e comprendeve i atuâi stâts de Austrie, Bosgne-Erzegovine, Cechie, Cravuazie, Slovachie, Slovenie, e part dai odiernis Romanie, Montnere, Polonie, Ucraine, Italie e Serbie.
Nons
[cambie | modifiche il codiç]Come za dit, la Austrie-Ongjarie e ven clamade in plui mûts. Di seguit al è un piçul elenc dalis denominazions, culis relativis spiegazions.
- Tal 1868 l'imperadôr e re Francesc Josef I al stabilis formalmentri il non inmò doprât "monarchie austro-ongjariche" (tod. Österreichisch-Ungarische Monarchie).
![](http://178.128.105.246/content-http-upload.wikimedia.org/wikipedia/commons/thumb/6/62/DonauknieVisegrad.jpg/220px-DonauknieVisegrad.jpg)
- Cuntune conotazion plui gjeografiche, mediant che il Danau al traviersave il stât dualistic par une lungjece di 1.300 km e al costituive il sô flum principâl, a si fevele ancje di "monarchie dal Danau" (tod. Donaumonarchie).
- Parvie dale costruzion su derit costituzionâl di dutis dôs lis parts dal ream, si pues invezit doprâ la definizion "monarchie dualistiche" (tod. Doppelmonarchie). Cheste definizion no à nuie a ce fâ cul simbul imperiâl austriac de acuile a doi becs, che il popul ongjarês nol puartave.
- In aree gjermanofone, la Austrie-Ongjarie e ven ancje definide k. u. k. Monarchie (scurtadure di kaiserliche und königliche Monarchie), che par furlan al si pues voltâ "monarchie imperiâl e regâl".
- Inte leterature si fevele ancje di "Kakanien" - une espression che e ven dal romanç di Robert Musil "L'om cence cualitâts" e che e derive simpri dale abreviazion "k. u. k.".
I nons dai stâts components
[cambie | modifiche il codiç]Cuant che intal passât si fevelave di un dai doi stâts components, a esistevin denominazions specifichis.
- La Austrie imperiâl - fintremai il 1915 - e fo ufizialmentri clamade "i reams e i pais rapresentâts tal Parlament dal ream" (tod. die im Reichsrat vertretenen Königreiche und Länder); te sfere politiche e juridiche, a nivel inufiziâl, si doprave ancje il tiermin "Cisleitanie" (tod. Cisleithanien).
- La Ongjarie regâl e vignive invezit ufizialmentri definide "i paîs dale sante corone ongjarese di Scjefin" (tod. die Länder der heiligen ungarischen Stephanskrone), inufizialmentri ancje "Transleitanie" (tod. Transleithanien).
Storie
[cambie | modifiche il codiç]La vie viers l'Ausgleich austro-ongjarês (1848–1867)
[cambie | modifiche il codiç]Lis lidrîs dale monarchie austro-ongjariche a si cjatin tale contraposizion fra l'Imperi austriac e il ream di Prussie par la supremazie inte Confederazion todescje, che e jere stade impastanade il 8 di Jugn dal 1815 cule Austrie come potence presidenziâl. La Austrie e jere par la Prussie l'ingredei principâl tale Soluzion piçul-todescje (tod. Kleindeutsche Lösung), puartade de Lighe nazionâl todescje (tod. Deutscher Nationalverein): cheste soluzion e proviodeve une fusion dai paîs dale Confederazion todescje sot la egjemonie dale Prussie, cun la contemporanie esclusion de Austrie.
Cheste contraposizion a si disgredeà il 3 di Lui dal 1866 te bataie di Königgrätz (vuere austro-prussiane) a pro de Prussie. La consecuence plui pesante di cheste vuere par l'Imperi austriac e fo l'isolament par vie de separazion obleade dai stâts todescs. A chest indebiliment dal grop gjermanofon tal Imperi al corispondè un rinfuarciment dalis nazionalitâts non gjermanofonis dominantis demografichementri, che al faseve temê la colade di chest stât multietnic (belza periculât tal 1848).
![](http://178.128.105.246/content-http-upload.wikimedia.org/wikipedia/commons/thumb/5/55/Franzjosef.jpg/220px-Franzjosef.jpg)
Par limitâ chest pericul, la cjasade imperiâl e dovè prime di dut gjavâ tension al rapuart cul cêt dominant ongjarês. Dal pont di viste dai Asburc ribei tal 1849, i ongjarês a poderin vigni batûts dome cul jutori de Russie. Cule esecuzion di Lajos Batthyány - prim ministri ongjarês di chê volte - e di tros dai siei compagn di bataie, il vincjin Francesc Josef I al divierzè purpûr tal 1850 un abiss, che al deventà in mò plui grant cule separazion de Voivodine, Cravuazie, Slavonie e Transilvanie e cule sumission dal rest de Ongjarie par vie de fuarce militâr dal arciduche Albrecht.
Cule emancipazion dai contadins la cjasade dai Asburc e si cjatave definitivamentri cuintri la nobiltât ongjarese, che e reagì cuntune resistence passive, inte forme di refût dai funzionaris e de vuide. Chest al rindì necessarie une presince militâr permanente. Come lât positîf di cheste fase che e riduseve i privileçs de nobiltât e che e reprimeve i desideris di segregazion a son, insiemit ale emancipazion dai contadins, la modernizazion dal sistem scolastic, la fin de jurisdizion patrimoniâl e la introduzion dal codis penâl austriac.
Il confront al fò infin dismolât ancje par vie dal boom economic; tantetant un svizinament sustanziâl al fò compiût dome tal 1865 cule riconvocazion dal Parlament locâl ongjarês e cule promesse de amplie restituzion de Costituzion ongjarese dal 1848 de bande dal guviêr imperiâl. Altris pas a jerin urgentmentri necessaris.
Lis tratativis di compromes cui ongjarês a forin caraterizâts di posizions ongjaresis mâl rassegnadis. Lajos Kossuth (il cjâf spirituâl de rivoluzion ongjarese ch'al viveve in esili) e il so considerabil compagnatori a votarin pal distacament de Austrie; un compromes al sares stât (secont Kossuth) la «muart de nazion» e "al vares impuest al paîs la cuarde di trazion di interès forescj".
Ale fin tantetant a si imponè la opinion dal lidêr dai liberai Ferenc Deák. Tal incuintri al sustignì che par une Ongjarie libare, culis sôs fuartis minorancis slavis e todescje, al sares stât il pericul di isolâsi e di vegnî infin dividude tra la Russie e l'Imperi todesc. Une aleance cule Austrie indebilide dal problem interni dalis nazionalitâts, sot il guviêr di un monarcje ch'al si sares impegnât tal gjurament de incoronazion de nazion ongjarese, al sares stât par chest di preferî. Al convincè la nobiltât cundiplui cule osservazion che il compromes al vares ufiert la pussibilitât di mantignî la integritât territoriâl e politiche dai possediments latifondiaris e il primât sulis nazionalitâts non ongjaresis in Ongjarie.
Lis tratativis dal compromes austro-ongjarês a forin combinadis in prin dal agn 1867. Chest agn al vè une rie di acjadiments avonde impuartants, cussì riassumibii:
- 17 di Fevrâr - Francesc Josef I al instituì il gnûf guvier disot dal cont Gyula Andrássy; lis tratativis vienesis a forin combinadis invezit tal indoman.
- 27 di Fevrâr - Al si tornà a meti in vore il parlament dal ream ongjarês.
- 15 di Març - A Ofen, il cont Andrássy al gjurà fideltât cul so guvier al imperadôr. Tal timp istes a forin metudis in vigôr lis regolamentazions dal Ausgleich. Chest al à vâl come dì natalizi dale monarchie dualistiche, ancje se lis leçs dal Ausgleich a forin decidudis dai parlaments di ducj e doi i stâts dome par Dicembar dal stes agn.
- 8 di Jugn - Francesc Josef I al fò incoronât re di Ongjarie a Buda.
La monarchie dualistiche (1867–1914)
[cambie | modifiche il codiç]Francesc Josef I al ere formalmentri il cjâf di stât constituzionâl comun (union personâl); sot la sô direzion a vegnivin aministrâts in comun (union reâl):
- la politiche foreste;
- l'esercit comun (tod. k.u.k. Armee);
- la marine di vuere;
- lis financis ch'a coventavin par chestis ativitâts, intai corispondents ministeris dal ream (tod. k.u.k. Reichsministerien).
Austrie e Ongjarie a podevin di cumò indenant regolamentâ dutis lis altris cuistions ognidune par so cont, dutcâs a si rivà volontariamentri a une aree doanale, economiche e di valude comun.
Cule conclusion dal tratât di compromes a no forin comedadis dutis lis citis, cussì la Ongjarie e si ere notade un adatament ogni dîs agns.