Sénégal (ony)
I Sénégal dia ony ao Afrika Andrefana manana halava 1 750 km, mipoitra any Ginea amin' ny haavo 750 m. Manondraka an' i Maly izy, avy eo mamakivaky an' i Maoritania sy i Senegaly, sady manasaraka ireo firenena roa ireo, alohan' ny hidirana ao amin' ny Ranomasimbe Atlantika ao Saint-Louis.
Jeôgrafia
[hanova | hanova ny fango]Ny ony Sénégal dia miforona ao Bafoulabé, any Maly raha ny marina, avy amin' ny fihaonan' ny renirano roa izay midina avy any amin' ny tagorom-bohitra Fouta-Djalon, dia ny renirano Bafing sy Bakoye (mihalehibe noho ny fanampian ny renirano Baoulé). I Bafing, izay mitondra ny antsasaky ny ranon' ilay ony, dia heverina ho sampana lehibe indrindra.
Sahan-drano
[hanova | hanova ny fango]![](http://178.128.105.246/content-http-upload.wikimedia.org/wikipedia/commons/thumb/3/3d/S%C3%A9n%C3%A9gal_drainage_basin_map-fr.svg/220px-S%C3%A9n%C3%A9gal_drainage_basin_map-fr.svg.png)
Manodidina ny 337 000 km2 ny velaran' ny sahan-dranony ary mahazo firenena efatra. Faritra telo miavaka tsara no azo avahana: ny sahan-drano ambony ka hatrany Bakel (tanàna any Senegaly, tsy lavitra ny sisin-tanin' i Maly), ny lohasaha manomboka any Bakel ka hatrany Saint-Louis (816 km) ary ny faritry ny hefaka.
Sakelidrano
[hanova | hanova ny fango]Mirotsaka aminy eo amin' ny morony havia ny renirano Falémé, izay sakeliny lehibe sy farany manan-danja ary mandrafitra ny sisintany manasaraka an' i Maly sy i Senegaly, ary eo amin' ny morony havanana i Colimbiné, i Karakoro, i Ghorfa ary i Gorgol, izay samy renirano tsy dia manan-danja loatra.
Habetsahan-dranony
[hanova | hanova ny fango]Miovaova ny hebetsahan-drano entiny ary miankina tanteraka amin’ ny rotsak' orana. Ny sahan-dranon' ilay ony dia ampahany amin' ny faritr' i Sahel ka noho izany dia mahazo tombony amin' ny toetany tsy dia karankaina loatra miaraka amin' ny rotsak' orana miovaova eo anelanelan' ny 300 sy 1 000 mm isan-taona. Ny faritra atsimon' ny sahany mifanitsy amin' ny fikorianany amin' ny faritra ambony ihany no mahazo tombony amin' ny toetany trôpikaly mando ka noho izany dia mahazo rotsak' orana betsaka kokoa eo anelanelan' ny 1 000 sy 2 000 mm isan-taona sady voatsinjara tsara kokoa mandritra ny taona.
Ny ony Sénégal ao Dagana
[hanova | hanova ny fango]Ny salanisan' ny fikorianan' ny renirano isan-taona dia 640 m3/s eo am-pivarinany any an-dranomasina saingy mety miovaova amin' ny 3 m3/s mandritra ny vanim-potoanan' ny rano iva ka hatramin' ny 5 000 m3/s mandritra ny tondra-drano be. Ny vanim-potoanan' ny rano avo dia ny volana Jolay ka hatramin' ny Nôvambra ary ny vanim-potoana maha ambany indrindra ny rano dia ny Marsa ka hatramin' ny Jona. Amin' ny vanim-potoanan' ny hain-tany lehibe, ny fikorianan' ny rano dia mahatonga azy ho azo itsahana.