Luna
![](http://178.128.105.246/content-http-upload.wikimedia.org/wikipedia/commons/thumb/b/b2/The_Bangkok_Supermoon_Photographs_by_Peak_Hora_10.jpg/220px-The_Bangkok_Supermoon_Photographs_by_Peak_Hora_10.jpg)
Luna (latin: luna)[1] ta e di cinco luna mas grandi den e sistema solar y e unico satelite natural di e planeta Tera.[2] Na aña 1610, e conocemento di otro luna a bira realidad te ora Galileo Galilei a descubri cuater otro luna ta orbita Jupiter.[3]
E formacion di Luna a tuma luga na e momento cu un obheto astronomico, probablemente tamaño di Mars, a dal den Tera un par di biyon aña pasa. Luna ta 27% e tamaño di Tera y su superficie ta di piedra solido.[3] Luna ta orbita Tera na un distancia promedia di mas o menos 385.000 kilometer.[4] E rotacion di Luna rond su mesun as ta sincronisa cu e orbita di Luna rond di Tera. Asina, e mesun banda di Luna ta semper punta den direccion di Tera.[5]
Luna no ta crea su mesun luz, e luna di luz ta en realidad e reflexion di luz di Solo. For di perspectiva di Tera, e parti lusa di Luna ta mustra briyante, casi blanco. Esaki ta un illucion. E briyo di Solo cu ta refleha for di Luna, ta haci'e dificil pa por mira e color actual di Luna for di un distancia. Un bista mas profundo ta revela cu gran parti di e paisahe di Luna ta den tono greis scur, similar na piedranan haya cerca di volkan na Tera. En general, solamente un di dies parti di luz di Solo cu ta dal riba Luna ta ser refleha bek den espacio, e resto ta ser absorba. E porcion aki di luz refleha ta yama albedo. Pa compara, Tera, cual ta contene awa, ta refleha mas o menos tres di dies parti di rayonan di luz di Solo.[4]
![]() |
Mira tambe e kategoria Moon di Wikimedia Commons pa mas dato mediatiko tokante di e tema aki. |
Fuente, nota i/òf referensia
|