Capital
Capital nacional ye ua cidade que zampenha un papel relebante na cunduçon de la política dun paíç, ó dua de sues respetibas subdebisones. Ne l mais de ls causos la capital ye la cidade adonde stá la sede de l gobierno, habendo inda assi eiceçones. Alguns de ls fatores que detremínan q'ua cidade seia cunsidrada capital ancluen:
- La cidade ye sede de l gobierno ó de l xefe de stado;
- La cidade ye la sede de l poder judicial;
- La cidade ye sede de l parlamiento;
- Eisisten leis que detremínan la lhocalizaçon de la capital;
- La cidade ye un amportante centro d'atebidade pa l paíç;
- Nua monarquie ye frequente la capital ser l local adonde l monarca ten la corte, sendo normal que demude cun relatiba frequéncia.
![](http://178.128.105.246/host-http-upload.wikimedia.org/wikipedia/commons/thumb/e/ec/Lisbon_set_of_images.jpg/250px-Lisbon_set_of_images.jpg)
![](http://178.128.105.246/host-http-upload.wikimedia.org/wikipedia/commons/thumb/9/97/DCmontage2.jpg/230px-DCmontage2.jpg)
Un paíç (ó antidade política eiquibalente) puode tener mais de l q'ua capital oufecial a la par. Puode ser ó nun la sede de l gobierno i puode mesmo çlocar-se periodicamente.
Na África de l Sul, por eisemplo, la capital admenistratiba ye Pretória, la capital lhegislatiba ye la Cidade de l Cabo i la capital judicial ye Bloemfontein. Esta ye ua hardança deixada pul cumpromisso acordado antre la maiorie de las defrentes porbíncias quando fui criada la Ounion de la África de l Sul an 1910.
Ne l Chile, l cungresso nacional demudou-se pa la cidade de Balparaíso, mantenendo-se inda assi Santiago de l Chile cumo capital.
Na Houlanda, l gobierno, xefe de stado i supremo tribunal stan sediados an Haia, mas la custituiçon detremina que la capital oufecial seia Amsterdan.
Nauru ye l único paíç que nun ten oufecialmente ua capital, sendo Yaren ye la maior cidade i adonde se ancontra l'admenistraçon de l paíç.
Hai causos an q'ua mesma capital ye çputada por mais dun paíç cumo por eisemplo Jarusalen, reclamada cumo capital por Eisrael i puls Palestinos.
La cidade de Nicósia ye atualmente la única capital ouropeia q'inda esta debedida: al norte, la parte turca i al sul, la parte griega, apartadas pula linha berde, ua zona çmelitarizada acupada pulas Naciones Ounidas.