Batalha de Dien Bien Phu
La batalha de Dien Bien Phu se debanèt dau 20 de novembre de 1953 au 7 de mai de 1954 dins lo corrent de la Guèrra d'Indochina. Foguèt la consequéncia d'una temptativa francesa de blocar una ofensiva de la guerilha comunista dau Vietminh en direccion de Laos. L'objectiu dei Francés èra d'atraire un maximom de fòrças dau Vietminh per lei destrurre durant una batalha convencionala.
![](http://178.128.105.246/host-http-upload.wikimedia.org/wikipedia/commons/thumb/0/05/Dien_bien_phu_castor_or_siege_deinterlaced.png/220px-Dien_bien_phu_castor_or_siege_deinterlaced.png)
Pasmens, lo plan francés mau capitèt car lei Vietnamians capitèron de reünir de fòrças importantas, sostengudas per de pèças d'artilhariá pesuca, e d'enceuclar la basa francesa. Lo 13 de març, lo Vietminh acomencèt una lònga ofensiva per redurre la garnison. En despiech de bombardaments importants e dau largatge de renfòrç aeroportats, lei Francés mau capitèron de rompre lo sètge e foguèron finalament obligats de capitular. Lei pèrdas umanas foguèron de 14 000 òmes per lei Francés (2 293 tuats, 11 721 bleçats que la mitat moriguèt en captivitat) e de 13 000 a 23 000 tuats e bleçats per lei Vietnamians.
De còps considerada coma lo « Valmy de la descolonizacion »[1], la batalha de Dien Bien Phu aguèt de consequéncias politicas importantas. En Indochina, accelerèt lei negociacions regardant l'independéncia de la region que foguèron concludas lo 20 de julhet de 1954. Dins lo rèsta dau mond, encoratjèt lei movements anticoloniaus car l'eissida dau combat aviá demostrat la possibilitat per una guerilha de batre militarament una armada regulara.