Fabian Gottlieb von Bellingshausen
Fabian Gottlieb von Bellingshausen (20 de setembre de 1778, Ösel - 25 de genier de 1852, Kronstadt) es un amirau e un explorator rus de la premiera mitat dau sègle XIX. Es famós per aver menat una importanta expedicion d'exploracion dins l'Ocean Austrau en 1819-1821 que permetèt de confiermar l'existéncia d'Antartida lo 27 de genier de 1820. Durant aqueu viatge, descurbiguèt plusors illas antarticas coma l'Illa Alexandre Ièr ò l'Illa Pèira Ièr. Après aquelei missions, participèt a la Guèrra Russoturca de 1828-1829. Venguèt vice-amirau en 1830 e prenguèt lo comandament d'una esquadra de la flòta de la Mar Baltica. En 1839, foguèt nomat governador militar de Kronstadt e amirau de la Marina Imperiala. En parallèl, recebèt divèrsei guierdons scientifics e foguèt nomat sòci de la Societat de Geografia en 1845.
![](http://178.128.105.246/host-http-upload.wikimedia.org/wikipedia/commons/8/8c/Fabian_Gottlieb_von_Bellingshausen.jpg)
En onor de sei descubèrtas, son nom es estat donat a un nombre important de luòcs ò d'estructuras geograficas coma la Mar de Bellingshausen dins l'Ocean Austrau, l'Illa Bellingshausen dins leis Illas Sandwich dau Sud, lo Glacier Bellingshausen en Antartida, la Placa Bellingshausen (una placa tectonica fusionada amb la Placa Antartica), un atòl en Polinesia Francesa ò lo cratèr lunar Bellingshausen.