Cerceta albela
Cerceta albela | |||||||||||||||||
---|---|---|---|---|---|---|---|---|---|---|---|---|---|---|---|---|---|
![]() Macho | |||||||||||||||||
Estado de conservación | |||||||||||||||||
![]() Pouco preocupante[1] | |||||||||||||||||
Clasificación científica | |||||||||||||||||
| |||||||||||||||||
Nome binomial | |||||||||||||||||
'Anas querquedula' Linnaeus, 1758 |
![](http://178.128.105.246/host-http-upload.wikimedia.org/wikipedia/commons/thumb/d/d8/Spatula_querquedula_MHNT.ZOO.2010.11.18.1.jpg/220px-Spatula_querquedula_MHNT.ZOO.2010.11.18.1.jpg)
A cerceta albela ou cerceta do estío[2] (Anas querquedula) e unha anátida de tamaño pequeno que habita na maior parte de Europa e oeste de Asia. É estritamente migratoria e desprázase no inverno a África, onde poden xuntarse bandos de moitos individuos. É unha das aves incluídas no "Acordo de conservación das aves acuáticas migratorias de África e Eurasia" AEWA.
Descrición
[editar | editar a fonte]O corpo mide de 37 a 41 cm ó longo. As ás miden nos machos de 18,7 a 21,1 cm, e nas femias entre 18,2 e 19,6 cm. O peteiro mide de 3,5 a 4,5 cm. Os machos pesan de 250 a 600 g, mentres que as femias non pasan dos 550. Coa plumaxe invernal é fácil de confundir con outras especies do xénero Anas. As femias diferénciase das femias doutras especies semellantes polo debuxo da cabeza: na parte superior ten unha "pucha" de cor castaña escura, unha faixa máis escura cá cor de fondo da plumaxe e visible sobre dos ollos e as meixelas son tamén algo máis escuros có resto da cabeza. A plumaxe do macho na época de aparellamento é moi característica: unha faixa branca en forma de arco vaille dos ollos á caluga, o resto da cabeza e de cor castaña avermellada. O lombo e o peito teñen un fondo gris cheo de pencas castañas. Os costados son brancos cubertos de liñas finas grises. Plumas longas en forma de lanceta de cor branca e negra cáenlle dos "ombreiros" sobre do lombo. Ó voar son visibles nos dous sexos as plumas interiores de cor gris abrancazada e o espello de cor azul pálido. O bico e as patas son grises.
Distribución e hábitat
[editar | editar a fonte]Está espallada pola zona paleártica: vive en case todo o leste de Europa e, esporadicamente, aparece no oeste e en Europa central. En Escandinavia atópase ó redor do mar Báltico. Ó leste aparece nunha faixa ancha que chega ata a illa de Sakhalin. Pasa o inverno en África, o norte da India e o sueste de Asia.
Crían nas beiras cubertas de herba de estanques, lagos pouco fondos e zonas pantanosas. No inverno viven a carón de lagos e zonas de cheas.
Reprodución
[editar | editar a fonte]O niño, en forma de cunca e cuberto de herbas e penuxe, está construído entre a vexetación mesta á beira da auga. A femia pon de oito a once ovos de cor beixe que incuba de 21 a 23 días. Os polos están preparados para o voo ó cumpriren entre os 35 a 42 días de idade.
Alimentación
[editar | editar a fonte]Comen insectos, crustáceos, sementes e plantas acuáticas. En xeral, prefiren alimentarse de animais, que son capturados na tona da auga ou poucos centímetros por debaixo. Capturan o alimento nadando co pescozo estricado e a cabeza parcialmente dentro da auga.
Notas
[editar | editar a fonte]- ↑ BirdLife International (2012). "Anas querquedula". Lista Vermella de especies ameazadas. Versión 2013.2 (en inglés). Unión Internacional para a Conservación da Natureza. Consultado o 26 November 2013.
- ↑ Diccionario das ciencias da natureza e da saúde, A Coruña, Deputación da Coruña, 2000
Véxase tamén
[editar | editar a fonte]Ligazóns externas
[editar | editar a fonte]- BirdLife Species Factsheet Arquivado 04 de xaneiro de 2009 en Wayback Machine.
- IUCN Red List
- RSPB A to Z of UK Birds
- Vídeos da ceceta albela
- Vídeos da cerceta albela en Internet Bird Collection