Belgorodan agj
| |||||
![]() | |||||
Pälidn | Belgorod | ||||
Pind - Ühtes |
67-nz' 27 134 km² | ||||
Eläjiden lugu - Kaik |
30-nz' 1,549,876 ristitud (2018) | ||||
Regionaline KSP - Kaik, nügüdläižiš arvoiš |
27-nz' 730,6 mlrd rub. (2016) | ||||
Federaline ümbrik | Keskuzline | ||||
Venäman ekonomine region | Keskuzliž-Mustmaine | ||||
Valdkundkel' (-keled) | venäkel' | ||||
Gubernator | Jevgenii Savčenko | ||||
Ohjastusen pämez' | hän-žo | ||||
Agjan Duman ezimez' | Vasilii Poträsajev | ||||
Avtokod | 31 | ||||
Aigvöd | UTC+3 (MSK+0) |
Belgorodan agj (ven.: Белгородская область) om Venälaižen Federacijan subjekt.
Se mülüb Federaližhe keskuzümbrikho.
Agjan administrativine keskuz da kaikiš suremb lidn om Belgorod.
Keled
[vajehta | vajehtada lähtetekst]Valdkundkel' om üks'jäine — venäkel'.
Istorii
[vajehta | vajehtada lähtetekst]Belgorodan agj om olmas vs 1954 vilukun 6. päiväspäi.
Belgorodan agjan Päkäskuz[1] om vahvištadud vn 2003 24. päiväl tal'vkud Agjan Duman ezitajil, om allekirjutadud gubernatoral sen-žo voden 31. päiväl tal'vkud da om väges nügüd' äiluguižidenke vajehtusidenke. Se vajehti endišt Päkäskust, kudamb oli vahvištadud vn 1995 20. päiväl sulakud.
Geografijan andmused
[vajehta | vajehtada lähtetekst]![](http://178.128.105.246/cars-http-upload.wikimedia.org/wikipedia/commons/thumb/4/41/Relief_Map_of_Belgorod_Oblast.png/250px-Relief_Map_of_Belgorod_Oblast.png)
Agj röunatab Voronežan agjanke päivnouzmas, Ukrainanke suves da päivlaskmas (sen Luganskan, Har'kovan da Sumin agjoidenke), Kurskan agjanke pohjoižes. Belgorodan agj om mererandatoi.
Pind om 27 134 km², sidä kesken mustma otab 77% territorijad, mec — läz kümnendest. Znamasižed joged oma Severskii Donc da Oskol. Agjan päivnouzmaižed joged mülüdas Don-jogen da Azovmeren basseinha, päivlaskmaižed joged — Dnepranjogen da Mustmeren basseinha.
Reljef om kukhikaz da vanoikaz. Kaikiš ülähaižemb nimetoi čokkoim sijadase agjan pohjoižes (277 m). Kaikiš alahaižembad čokkoimed oma jogiden kendäkod agjan suves.
Klimat om ven kontinentaline. Tal'v om hobed, keza om pit'k. Heinkun keskmäine lämuz om +21..+23 C°, vilukun lämuz — −5..−7 C°. Paneb sadegid 500..600 mm vodes.
Londuseližed varad oma raudkivend, boksitad, apatitad, sauvondmaterialad (letked, saved, mouckivi), mustma.
Tobmuz
[vajehta | vajehtada lähtetekst]Agjan pämez' om gubernator. Kaik rahvaz valičeb händast videks vodeks. Jevgenii Savčenko radab gubernatoran vs 1993 tal'vkun 18. päiväspäi. Gubernator om mugažo agjan Ohjastusen pämez', hän märičeb sen strukturad da paneb Ohjastusen ühtnijoid radnikusile. Üks' ezmäine varagubernator da seičeme muite varagubernatorad oma hänele abhu.
Käskusenandai tobmuz om üks'kodine parlament. Se om Belgorodan agjan Dum 50 deputatanke viž vot valdatusen strokunke, rahvaz valičeb heid kaikid mugažo. Vasilii Poträsajev radab Agjan Duman ezimeheks vs 2015 vilukun 22. päiväspäi. Hän om valitud tošti vn 2015 valičendoiden jäl'ghe.
Radonoigendai tobmuz om Belgorodan agjan Ohjastuz. Agjan departamentad, ohjandused da laudkundad alištudas Ohjastusele.
Gubernatoran järgenduseližed valičendad oliba vn 2017 10. päiväl sügüz'kud. Nügüdläine gubernator sai vägestust ezmäižel tural (69,29%) da radab seičemenden strokun jäl'geten. Agjan Duman ühtnijoiden järgenduseližed valičendad oliba vn 2015 13. päiväl sügüz'kud.
Eläjad
[vajehta | vajehtada lähtetekst]Vn 2010 Venäman rahvahanlugemižen mödhe eläjiden lugu oli 1 532 526 ristitud[2]. Kaikutte kahtenz' ristit koumespäi om lidnalaine.
Kaik om üks'toštkümne lidnad agjas da 18 lidnanvuittušt žilod. Toižed järedad lidnad (enamba 85 tuh. ristituid vl 2010) oma Vanh Oskol i Gubkin. Vl 2017 kaik oli 15 eländpunktad enamba mi 10 tuh. eläjidenke.
Rahvahad (enamba 0,5% vl 2010): venälaižed — 91,7%, ukrainalaižed — 2,7%, armenijalaižed — 0,5%, toižed rahvahad — 2,2%, rahvahuden ozutandata — 2,9%.
Homaičendad
[vajehta | vajehtada lähtetekst]- ↑ Belgorodan agjan Päkäskusen tekst. — Constitution.garant.ru. (ven.)
- ↑ Venäman kaikenaigaine ristitišt vl 2010. — Rosstat (gks.ru). (ven.)
Irdkosketused
[vajehta | vajehtada lähtetekst]- Belgorodan agjan gubernatoran oficialine sait (savchenko.ru). (ven.)
- Belgorodan agjan gubernatoran da Ohjastusen oficialine portal (belregion.ru). (ven.)
- Belgorodan agjan Duman oficialine sait (belduma.ru). (ven.)
Belgorodan agjan lidnad | ||
Aleksejevk | Belgorod | Birüč | Graivoron | Gubkin | Koroč | Stroitel' | Šebekino | Uz' Oskol | Valuikad | Vanh Oskol | ||