Clerkenwell
Clerkenwell | |
---|---|
Stadsbuurt | |
![]() Clerkenwell Green en St James's Church | |
Koördinate: 51°31′34″N 0°06′13″W / 51.52611°N 0.10361°W | |
Land | ![]() |
Land | ![]() |
Graafskap | Groter Londen |
Borough | Islington |
Bevolking | |
• Totaal | 11 490 |
Tydsone | UTC±00:00 (MGT) |
• Somertyd | UTC+01:00 (BST) |
Poskode | EC1 |
Skakelkodes | 020 |
Clerkenwell [ˈklɑrkənwɛl] is 'n buurt in Sentraal-Londen wat administratief onder die London Borough of Islington val. Clerkenwell behels twee historiese parogieë, St. James en St. John, en het tussen 1900 en 1965 deel uitgemaak van die Metropolitan Borough of Finsbury wat daarna met die aangrensende Islington saamgesmelt is om die nuwe Borough of Islington te vorm.
![](http://178.128.105.246/cars-http-upload.wikimedia.org/wikipedia/commons/thumb/9/98/%22The_Jerusalem_Tavern%22_public_house%2C_Britton_Street_%28geograph_4399585%29.jpg/220px-%22The_Jerusalem_Tavern%22_public_house%2C_Britton_Street_%28geograph_4399585%29.jpg)
![](http://178.128.105.246/cars-http-upload.wikimedia.org/wikipedia/commons/thumb/2/29/Panorama_of_City_of_London_from_Michael_Cliffe_House_%282015%29_-_panoramio.jpg/220px-Panorama_of_City_of_London_from_Michael_Cliffe_House_%282015%29_-_panoramio.jpg)
Die plaaslike ekonomie het vroeër - veral in die Georgiaanse tydperk - swaar op die horlosiebedryf en die herstel van horlosies gesteun.[1] Die naamgewende bron, wat van Clerkenwell in die 17de en 18de eeu 'n gewilde herstellingsoord gemaak het, is in 1924 in Farringdon Road herontdek. Na die suidwestelike gedeelte van Clerkenwell is vroeër as Little Italy verwys vanweë die groot aantal Italiaanse immigrante wat hulle hier tussen die 1850's en die 1960's gevestig het.
Die huidige buurt het baie van sy tradisies bewaar, waaronder die dorpsagtige karakter, en dien vandag met sy mengsel van residensiële geboue, werkswinkels, kroeë, restaurante en ander besighede as 'n woon- en sakekwartier vir die aangrensende City of London, die finansiële en sakesentrum van die Britse hoofstad.
Clerkenwell het tot een van die gunstelingbuurte vir Londense ontwerpers en ander jong professioneles ontwikkel, onder meer omdat werkplekke in die City of London van hier per voet bereik kan word, terwyl huurgelde en eiendomspryse die hoogte ingeskiet het.[2] Die buurt word gekenmerk deur 'n aantreklike mengsel van Georgiaanse, Victoriaanse en moderne argitektuur. Die kwartier se industriële boukuns is herontwikkel vir gebruik deur besighede uit die dienstesektor of as luukse eiendomme. Historiese stoorhuise is omgebou tot moderne kantore vir onder meer argitekte en advertensiemaatskappye en as redaksiekantore vir tydskrifte.[3]
Geskiedenis
[wysig | wysig bron]Middeleeue
[wysig | wysig bron]![](http://178.128.105.246/cars-http-upload.wikimedia.org/wikipedia/af/thumb/6/67/Die_hoofportaal_van_St_James-kerk_te_Clerkenwell%2C_Londen.jpg/220px-Die_hoofportaal_van_St_James-kerk_te_Clerkenwell%2C_Londen.jpg)
Clerkenwell was net buite die City of London (en sodoende ook buite sy jurisdiksie) geleë en deur 'n ietwat opdraande pad met die hoofstad verbind. Die nedersetting het oorspronklik rondom die nonneklooster St. Mary (wat in 1792 deur St. James in Clerkenwell Green vervang is) en die St. John of Jerusalem-klooster gegroei - twee godsdienstige instellings wat in die 12de eeu deur Jorden de Briset gestig is.
Die nedersetting se naam is afgelei van 'n bron, Clerk's well, wat naby die nonneklooster geleë was en waar sogenaamde mirakelspele opgevoer is - toneelstukke wat godsdienstige boodskappe op 'n eenvoudige manier aan die gewone bevolking oorgedra het.
Vroeë moderne tydperk
[wysig | wysig bron]Tot en met die ontbinding van kloosters in Engeland tydens die Reformasie tussen 1536 en 1539 het die St. John-klooster as die Engelse hoofkwartier van die Hospitaalorde van Sint Johannes van Jerusalem gedien. Van die kloostergebou het slegs die 16de eeuse St. John's-poort en die 12de eeuse kript bewaar gebly. Hierdie poort is tans in besit van die nuutgestigte Priory of England of the Order of St John wat hier, net soos St John Ambulance, sy hoofkwartier het. Nuwe museumgalerye, die Museum of the Order of St John, is in 2010 geopen.
Clerkenwell het later as voorstad van Londen vinnige groei ervaar, onder meer omdat ambagsmanne hier nie aan die beperkinge onderworpe was wat die lede van gildes in die City of London hulle opgelê het nie. Teen die middel van die 17de eeu het Hugenote-vlugtelinge, onder wie talle ambagsmanne, en handelaars hulle hier gevestig, kort voordat die buurt deur die Groot Plaag getref is. Sedert 1613 is vars drinkwater uit die River Lea in Hertfordshire deur middel van 'n kunsmatige waterweg, die New River, na Clerkenwell vervoer waar die New River Head as waterreservoir ontstaan het.[4]
Victoriaanse en moderne tydperk
[wysig | wysig bron]Gedurende die 19de eeu het die plaaslike bevolking met die aankoms van Ierse en Italiaanse immigrante verdriedubbel. Baie inwoners is destyds in slegte higiëniese toestande gehuisves, sdonder toegang tot skoon water in hul omgewing. Die vuil water van Clerkenwell se riviere het gesondheidsgevare soos cholera ingehou, terwyl oorbevolking en krotbuurttoestande die buurt dieselfde slegte reputasie besorg soos die berugte East End van Londen. Victoriaanse stadsbeplanning, wat voorsiening vir die bou van nuwe strate gemaak het, die sloping van krotbuurte, die Duitse lugaanvalle van die Tweede Wêreldoorlog en ekonomiese agteruitgang het Clerkenwell se bevolking vervolgens merkbaar laat afneem.
Die nuwe museumgebou van The Postal Museum in Clerkenwell het sy deure op 28 Julie 2017 vir die publiek geopen.[5]
Little Italy
[wysig | wysig bron]![](http://178.128.105.246/cars-http-upload.wikimedia.org/wikipedia/commons/thumb/6/6c/St_Peters_Italian_Church.jpg/220px-St_Peters_Italian_Church.jpg)
In die tweede helfte van die 19de eeu het groot getalle Italiaanse immigrante na Londen begin stroom van wie baie hulle in die driehoekvormige gebied gevestig het wat tans deur Clerkenwell Road, Rosebery Avenue en Farringdon Road begrens word en as Little Italy bekend gestaan het. Baie van die vroegste immigrante was kunshandwerkers, ambagsmanne, musici en straatkunstenaars; later het roomysverkopers, restauranteienaars en politieke vlugtelinge by hulle aangesluit. Een van die bekendste persoonlikhede was Giuseppe Mazzini (1805–1872), 'n Italiaanse joernalis en politikus wat as aktivis en politieke teoretikus een van die sleutelfigure vir die proses van die vereniging van Italiaanse state in 'n gemeenskaplike koninkryk. As politieke balling in Londen, waar hy baie jare lank gebly het, het hy 'n aktiewe rol in Clerkenwell se Italiaanse gemeenskapslewe gespeel en onder meer 'n skool vir Italiaanse kinder in Hatton Garden gestig.[6]
Tussen die twee wêreldoorloë het die Italiaanse bevolking sy hoogtepunt van omstreeks 10 000 siele bereik van wie 'n groter persentasie nog in oorbevolkte krotbuurte gehuisves is. Hierdie kwartiere moes ná die Tweede Wêreldoorlog plek maak vir munisipale behuisingsprojekte en ander woongeriewe vir laer inkomstegroepe. Tans is net kleiner groepe inwoners van Italiaanse afkoms hier woonagtig. Nogtans is die buurt - onder mer danksy die Italiaanse Sint Pieterskerk in Holborn Road - 'n fokuspunt vir Italiaanse inwoners uit die hele hoofstad.
Verwysings
[wysig | wysig bron]- ↑ W. G. Moore: The Penguin Encyclopedia of Places. Hammondsworth: Penguin Books 1971, bl. 178
- ↑ Good Migrations: Clerkenwell Neighborhood Guide. Besoek op 6 September 2020
- ↑ Alexandra Pett: London Walks. London: LondonOnFoot.com 2011, bl. 26-27
- ↑ The Encylopædia Britannica. Dictionary of Arts, Sciences, and General Literature. Ninth edition. Volume XVI. Edinburgh: Adam and Charles Black 1876, bl. 279
- ↑ "The Postal Museum - Our History. Besoek op 23 Oktober 2017". Geargiveer vanaf die oorspronklike op 29 November 2017. Besoek op 23 Oktober 2017.
- ↑ Rob Humphreys: The Rough Guide to London. New York • London • Delhi: Rough Guides 2003, bl. 224
Eksterne skakels
[wysig | wysig bron]- Geskiedenis
- Toerisme
- Besienswaardighede
- Ontwerpkuns
- Kroeë | Pubs
- St Peter's Brewery: The Jerusalem Tavern (14de eeu)
- Martyn Cornell's Zytophile: The Jerusalem Tavern, Clerkenwell: a short history
- Museum of the Order of St John
![](http://178.128.105.246/cars-http-upload.wikimedia.org/wikipedia/af/thumb/0/05/Vertoonsaal_in_die_Museum_of_the_Order_of_St_John%2C_Clerkenwell%2C_Londen.jpeg/220px-Vertoonsaal_in_die_Museum_of_the_Order_of_St_John%2C_Clerkenwell%2C_Londen.jpeg)
![](http://178.128.105.246/cars-http-upload.wikimedia.org/wikipedia/af/thumb/3/34/Uitstalling_%22Caravaggio_-_Fashion_%26_Fabrics%22%2C_Museum_of_the_Order_of_St_John%2C_Clerkenwell%2C_Londen.jpeg/220px-Uitstalling_%22Caravaggio_-_Fashion_%26_Fabrics%22%2C_Museum_of_the_Order_of_St_John%2C_Clerkenwell%2C_Londen.jpeg)
- Museum of the Order of St John Geargiveer 19 Maart 2020 op Wayback Machine
- Priory of Clerkenwell
- Clerkenwell Green