Hans van Heerden
Hans van Heerden (23 November 1935 – 9 September 2023) was ‘n Suid-Afrikaanse bariton.
Van Heerden is in 1935 in Pretoria gebore. Op grond van sy sangtalent verwerf hy die Mimi Coertse-beurs om in Wene sang te studeer. Daar maak hy vinnig opgang en tree in verskeie operahuise op. Hy het hoofbariton geword by die operahuise van Ulm, Bonn, Wiesbaden en Frankfurt, asook gasoptredes regoor Duitsland gemaak. Hy het saam met beroemde sangers soos Mario del Monaco, Rudolf Schock, Renato Cioni, Johan Botha, René Kollo, Kim Borg, Ileana Corubas, Edda Moser, Anneliese Rothenberger, Marina Arroyo, Agnes Baltsa en Helga Dernesch opgetree.
Hy het in die vroeë 1970's na Suid-Afrika teruggekeer. Hy was agt jaar lank ‘n voltydse sanger van Kruik (Kaaplandse Raad vir Uitvoerende Kunste, die voorganger van Kunstekaap) en in 1978 administratiewe en artistieke direkteur van opera by Sukovs (destydse Streeksraad vir die Uitvoerende Kunste van die Oranje-Vrystaat) in Bloemfontein. In 1991 word hy aangestel as hoof van die Operaskool van die Tshwane-Universiteit vir Tegnologie. In sy loopbaan het hy in 110 operarolle opgetree. Die rol van Scarpia in Tosca het hy 134 keer gesing en dié van Rigoletto 116 keer. Hy het ook ‘n boek ”More about opera” in 2021 gepubliseer.
Bronne
[wysig | wysig bron]- Holtzhausen, K. LitNet Lesersindrukke, More about opera deur Hans van Heerden: ’n lesersindruk 2021-07-21 https://www.litnet.co.za/more-about-opera-deur-hans-van-heerden-n-lesersindruk/
- Opperman, J.J. 11 September 2023, Sanger Hans van Heerden sterf op 87. Netwerk24.
- PACT Operateaterprogram vir Les Contes d'Hoffmann, Oktober-November 1995