Chrinou
Chrinou | |
---|---|
![]() | |
Basisdatä | |
Staat: | Schwiiz |
Kanton: | St. Galle (SG) |
Wahlchrais: | Toggeborg |
Gmeind | Wattwil |
PLZ | 9622 |
Koordinate: | 721822 / 241976 |
Höchi: | 803 m ü. M. |
Flächi: | 7,23 km² |
Iiwohner: | 254 (31. Dezämber 2012)[1] |
Website | www.krinau.ch |
Charte | |
![]() |
Chrinou (IPA: xrɪnɔu) isch e eemooligi politische Gmeind im Toggeborg und mit weniger as 300 Iiwooner di chlinnsti Gmeind vom Kantoo Sanggale gsi. Sit em 1. Jänner 2013 ghöört Chrinou politisch zo de Gmeind Wattwil.
Geografii
[ändere | Quälltäxt bearbeite]S Dorf Chrinou liit uf öpe 800 m ü. M. obe und het e guet erhaltnigs Dorfbild mit alte Buurehüser und ere reformierte Cherche. Zo de Gmeind händ no Wiiler und Höf wie Aaltschwil, Schufelbeerg und Chrinöüli ghöört. De höchst Punkt isch de Alplispitz (1'246 m) und de tüüfst litt am Diepfurter Bach (622 m) bi Dietsewiil. S Dorf litt imene Sittetaal zo de Tuur ond werd vom Chrinouer Bach entwässeret, usser im Norde wo e Bächli in Diepfurter Bach flüüsst. Nochburgmeinde sind Wattwil, Moslig und Bötschwil gsi.
Gschicht
[ändere | Quälltäxt bearbeite]Chrinou isch erscht ane 1357 as Krinnouw bizügt. Um 1510 hend sich d Börger vo allne Foidallaste freigchouft und en eigni Landsgmeind iigrichtet miteme eigne Gricht. Bis 1724 isch Chrinou zo Bötschwil cherchgnössig gsii und hett denn en eigni reformierti Cherche öbercho.
Wäred de Helvetik isch Chrinou zo Helffetschwil choo, aber bi de Gründig vom Kantoo Sangalle ane 1803 isch Chrinou zonere eigne Gmeind woore, us Röcksicht vo de alte Freiheit, wo da Dorf gnosse het.
Im April 2012 händ d Stimmbürger annere Zämelegig mit de Gmeind Wattwil uf de 1. Januar 2013 zuegstumme.
Wertschaft
[ändere | Quälltäxt bearbeite]Z Chrinou stoot d Weberei Graf AG, wo Vorhangstoff herstellt, aber weniger as zee Prozent vo de Bivölkerig isch im Gwerb täti. De Hoptteil lebt vo de Land- und Forstwertschaft ond öppe en Drittel isch ide Tienschtleistig tätig. Nume 3 % vo de Gmeindflächi sind bibout, 39 % sind Wald und de Rest werd landwertschaftlich gnutzt (Stand 2010). E Postauto verbindet Chrinou mitem Städtli Liestig.
Immer me a Bidüttig gwönnt de Turismus, well Chrinou rüebig glegen isch und ken Dorchgangsvercheer het. D Natur und d Landschaft sind no intakt mit seltnige Tier wie de Uurhaan (Tetrao tetrix) und Pflanze und drum ou e biliebts Wanderpiet. Vom Alplispitz cha wiit öber s Toggeborg glueget werde. Zo de turistische Ziil ghört ou s Brääggerhuus im Dreischlatt, wo de Näppis-Ueli (Ulrich Bräker) vo 1741 bis 1754 sini Chindheit verbrocht hett.
![](http://178.128.105.246/cars-http-upload.wikimedia.org/wikipedia/commons/thumb/7/7c/Ulrich_Br%C3%A4ker_-_Hof_Dreischlatt_%28Jugendzeit%29.jpg/280px-Ulrich_Br%C3%A4ker_-_Hof_Dreischlatt_%28Jugendzeit%29.jpg)
Iiwooner
[ändere | Quälltäxt bearbeite]Nebet em Näpper-Ueli (1735–1798), wo z Chrinou sini Chindheit verbroocht het, stammt us de Gmeind no de Johann Müller (1890–1970), wo onderem Name Giovanni Müller as Mooler und Holzschnetzer gwörkt hett.
Johr | 1750 | 1850 | 1900 | 1950 | 1980 | 1990 | 2000 | 2010 | 2012 |
Iiwohner | 180 | 452 | 381 | 320 | 240 | 266 | 278 | 255 | 254 |
Weblink
[ändere | Quälltäxt bearbeite]![](http://178.128.105.246/cars-http-upload.wikimedia.org/wikipedia/commons/thumb/4/4a/Commons-logo.svg/12px-Commons-logo.svg.png)
- Offizielli Website vo Chrinou
- Hans Büchler: Krinau. In: Historisches Lexikon vo dr Schwiiz.