Talakal ni Idek
Talakal ni Idek(彩虹) / tilo ni Idek
[mikawit | o yin-se-ma no pisinanot]Pitoay cengel a kiladom ratoh no to’as – ’Amis/Pangcah (阿美族-七彩布裙的傳說故事)
[mikawit | o yin-se-ma no pisinanot]Iti:ya ho, ira i niyaro’ ko tatosaay cipatelaway a kapah, ci Kolas ato ci Kacaw, o matereday, mafana’ay mi’adop, makeroay ato maradiway cangra a tatosa. Nikawrira, masasiromaay ko pinangan nangra, ni Kolas o kalaforiforay, nikawrira halidamaay to tamdaw cingra, oni Kacaw tomenekay, matemoyay, i nengneng no finawlan no niyaro’ o nga’ayay malakakitaan saan.
Cangra tatosa malecad ko kaolah ci Sawmahan kaying, nikawrira no to’asan a lekakawa caay ka nga’ay tosa ko fainay, samaanen hakini sato. Nanoya paini ci Kolas to saka lalifet to malocima ko matatodongay, itiya, mihayda ci Kacaw to nian, itiya mitahidang to kakitaan no niyaro, mamiliterong to nia demakan, nanoya, kafanaen to no niyaro, o matoasay kaemangay mapolong miki’araw to nia demakan.
Misatapang to kinalalifet, ano o cikay to ano eca o pipana to, malecad ko nika tadamaan nangra tatosa, saikoray to, matanengay a kakitaan no niyaro mahirateng ko kalalifetan, o picakod, cima ko pakacakoday miteroc to talolongay to ’alo, oya to ko cacifafahi ci Sawmahan. O mikiaraway sato a finawlan masasowasowal to o cimaay ko pakalifetay, nikawrira caay ko rahodayay ko nia demak, ano caay pakacakod i o cimapatayay ko ’orip, orasaka awaay ko patodongay o cima ko pakalaheciay to nian.
Itiya pasilaeno minengneng i talolongay ’alo ko finawlan, makoki’ mamirmir ko tamdaw, ci Kalas pasilaeno minengneng, hirateng saan caay pakacakod kako o sanay ningra, nanoya pasowal sa to kakitaan : “Kaenih ko tiyad toma’i ho kako, ci Kacaw ko ’ayaw micakod.” Saan. Caay ka hinapecen no kakitaan ko demak ningra, haydaen. ’Araw han o pilipalaw ni Kalas ko nian, hirateng sa: “Ano caay pakacakod a miteroc o mamapatay, ka ci Kacaw ko ’ayaw, mapatay to ci Kacaw, o akoay ko cacitodong malo fafahi ni Sawmah.” Nasa.
Oya maomoyay a Kacaw ko ’ayaw miala to ’aliwac, itiya pasikakarayan a kawas mitolon cingra: “Pafelien kako to tadamaan micakod to nia ’alo.” Sato, mato matengilay no kakarayan a kawas ko tolon ni Kacaw, oya caayay ko mamalaheci a demak, itiya, matiya iraay ko limaay a cengel a ’edil matedi ko co’ed no lotok, mapatedi ko tireng ni Kacaw, mato ira ko ’icel midamaay micikeroh cingraan, sakahemaw sa ko picaekod ni Kacaw toya co’ed a lotok, safaheka sato ko ’alomanay pakanengneng to nia demakan, o awaayay ko rarawraw, pakanengneng to nia demak itiya rarawraw sato a malipahak, pakanengneng ci Kolas to nianan, samaanen ako ya sato, kalokamaro’an hanto ko fokeloh, o paherek to ko nian sato ko hirateng ningra.
Paheci to ko kakitaan no niyaro’, pakacifainay han to ci Sawmah ci Kacawan, pasowal han Kacaw ci Sawmah: “So’elinay o nia kalalifetan, latek matengilay no kawas i kakarayan ko tolon no mako, madamaay kako to nian, saka mafilo ako micaekod kina co’ed a lotok, miahowid kako to pidama no kawas i kakarayan, padangen kako misanga’ to cecay pitoay ko cengel a kiladom, kalo pihiratengan.” Sato, nanoya salafiifii sato ci Sawmah a misanga’, i ’ayaw no kararamodan nangra malaheci ko nian a talakal ni Idek a talip.
I:kor to, o kasaniyaro’ to mikawit to malecaday a talip, matiyaay o talakal ni Idek “pitoay ko cengel” malofayfay no niyaro, ci Kacaw o kafana’en to no niyaro’ a kakitaan cingra.
Talakal ni Idek = tilo ni Idek = teker ni Idek(彩虹)
[mikawit | o yin-se-ma no pisinanot]O samakapahay no malaolahay kimad:
Itiyaay ho ratoh no to’as no ’Amis/Pangcah, i kakarayan a kawas ci Idek, tayni i hekal, ci fafahi to i hekalay a fafahiyan malo fafahi ningra. Ira ko cecay romi’ad, pasowalen ningra o papatiko kako minokay tayra kakarayan han ningra ko fafahi, o mamalakawal kako, pakayni tina kawal ko saka tayra i kakarayan han ningra ko fafahi, pasowal haca ni Idek ko fafahi ningra ano mikayakay to na kawal i akaa ceda’ah.
Ciriko’ ko fafahi to limaay a makapahay kiladom, o mamihakelong ci Idekan tayra i kakarayan, o pikayakay toya kawal, caay pina’on ko fafahi a coda’ah, nanoyaan sa a matefad koya kawal, matefad ko fafahi a mapatay to. Oya malakayakayay tireng ni Idek safelafelat sa matiya o riko no fifihi, matiya o talakal ni Idek, o nian koya nisowalan no ’Amis/Pangcah – “Talakal ni Idek” hananay.
Mifalicay to tilid(文字翻譯):
[mikawit | o yin-se-ma no pisinanot]Ci Masao Nikar