Palaciu de Ceis
Esti artículu o seición necesita referencies qu'apaezan nuna publicación acreitada, como revistes especializaes, monografíes, prensa diaria o páxines d'Internet fiables. |
Palaciu de Ceis | |
---|---|
mansión (es) ![]() | |
![]() | |
Llocalización | |
País | ![]() |
Autonomía | ![]() |
Provincia | ![]() |
Conceyu | ![]() |
Parroquia | Ceis |
Casería | Llavandera |
Coordenaes | 43°24′36″N 5°40′34″W / 43.41°N 5.676°O |
Patrimoniu | |
![]() |
El palaciu del Torruxón de Ceis, tamién conocíu como palaciu d'El Torruxón de Llavandera y palaciu d'Argüelles-Ceis, ye una construcción palaciega barroca rural d'Asturies allugáu nel llugar de Llavandera, na parroquia de Ceis, nel conceyu asturianu de Siero; a 2,5 km de La Pola Siero, capital del mesmu.
![](http://178.128.105.246/cars-http-upload.wikimedia.org/wikipedia/commons/thumb/4/43/Palaciu_de_Ceis.jpg/275px-Palaciu_de_Ceis.jpg)
![](http://178.128.105.246/cars-http-upload.wikimedia.org/wikipedia/commons/thumb/a/ad/Escudu_d%27armes_de_los_Arg%C3%BCelles-Ceis_y_Navia.jpg/275px-Escudu_d%27armes_de_los_Arg%C3%BCelles-Ceis_y_Navia.jpg)
L'accesu'l palaciu faise dende La Pola Siero, pel Camín de La Pola a Ceis y el Camín d'Oteru a La Pola. Con fecha 10 d'avientu de 2003 foi declaráu Bien d'Interés Cultural cola categoría de Monumentu del Principáu d'Asturies.
Historia
[editar | editar la fonte]El Palaciu de Ceis ye una gran construcción palaciega barroca rural. Foi construyíu, sobre los restos d'un torruxón baxumedieval. La so construcción entamose probablemente nel sieglu XVI, foi ampliáu y reedificáu a fines del sieglu XVII por don Pedro Argüelles Quirós y Valdés, deán De la Ilesia Catedral de Santiago de Compostela, quien, alrodiu 1668-1673, encargo so reconstrucción al arquiteutu cántabru Diego González de Gajano. Aínda asina so fachada meridional podría debese a l'arquiteutu gallegu Domingo de Andrade. Tres la muerte del deán, el palaciu pasó a manes de los Navia y más sero a los Marqueses de Santa Cruz de Marcenado, los propietarios d'anguaño.
Descripción
[editar | editar la fonte]El Palaciu de Ceis amuesa la tipoloxía carauterística de los palacios barrocos asturianos: estructura cúbica, articulada alrodiu un patiu central cuadráu, dos plantes y cubos de torruxón en sos esquines. La fachada sur, de caráuter monumental y apariencia urbana, ta fecha con sillares. Sos dos torruxones quedaron inconcluses, nun teniendo más que dos pisos y avanzando en planta sobre la muria. Una llinia d' imposta marca la separtación ente los dos pisos. La planta baxa acueye vanos adintelaos, cuasi ensin molduración, y el pisu noble balcones, que sofiten sos voladizos sobre la imposta y tan moldurados con abultaes oreyes barroques.
Baxu la cornisa del cuerpu central d'esta fachada percuerre un frisu con estríes verticales, a xeitu de triglifos, puntes de diamantes y espeyos semiesféricos.
Na planta baxa d'esti cuerpu central abrese la portada, un vanu adinteláu y recercáu con oreyes planes, qu'enmarcen dos columnes de fuste entorcháu, con capiteles pseudotoscanos. Afáyen en plintos decoraos con flores de llis y sobro elles descansa un entablamentu, con un frisu clásicu de triglifos y puntes de diamante y medies esferes nes metopes. Fai de sofitu al voladizu del balcón central del pisu noble, y na fastera inferior ornen billetes y rosetes. El balcón ta molduráu con grueses oreyes y flanquiáu per dos pilastres estries d'orde corintiu, que frayen la llinia de la cornisa y sostenten un frisu de roleos, sobro'l que esnala un frontón triangular. Embaxu'l frontón asitia l'escudu coles armes de los Argüelles-Celles y los Navia, ente dos lleones rampantes.
Les restantes fachaes, de fautura más probe, siguen los vezos constructivos de l'arquiteutura tradicional, con apareyu de mampostería y sillares nes esquinew y enmarques de los vanos. Los dos torruxones de la fachada norte tien tres pisos. Un potente contrafuerte refuerza'l cuerpu central de la fachada oeste, al tiempu que vanos adintelaos de distintes formes y tamaños distribúyense irregularmente sobro los llienzos. Adosada a la fachada N. hai una antigua cuadra, güei fecha vivienda, y frente a ella una panera. De la capiella'l palaciu, emplazada frente a la fachada E., sólo queden en pie parte de sos muries y una columna toscana. Foi destruyida durante la Guerra Civil Española, al igual que la portalada del palaciu.
Interior
[editar | editar la fonte]Por mor del estáu d'abandonu y ruina ye perdificil precisar la distribución del interior del palaciu. La zona oriental de la cruxía sur ta ocupada por una vivienda. El patiu interior ta porticáu con columnes toscanes que sofiten correderes de madera, güei perdíos. Consérvase, por embargu, gran parte de la descomanada escalera de piedra que daba accesu al segundu pisu. El palaciu ta nun penosu estáu d'abandonu y les partes que nun tan habitaes tan arruinaes, como amuesen l'interior y cubierta.
Bibliografía
[editar | editar la fonte]- El conteníu d'esti artículu amiesta material de la declaración del Bien d'Interés Cultural publicáu nel BOE Nº 295 el 10 d'avientu de 2003 (testu), que s'alcuentra nel dominiu públicu arriendes a lo dimpuestu nel artículu 13 de la Llei de Propiedá Inteleutual española (castellán).