Cliara
Cliara (Oileán Chliara en iwerzhoneg, Clare Island e saozneg) zo un enezenn veneziek war aod kornôg Iwerzhon, e kontelezh Maigh Eo. Brudet eo rak enni e oa o chom ar vorlaerez Gráinne Ní Mháille, er XVIvet kantved.
Emañ Cliara e digor ur bae bras anvet Cuan Mó. Er mervent dezhi emañ Inis Toirc ; en hanternoz emañ enez Acaill. Unan eus inizi bras Iwerzhon eo, gant ur gorread a 18,7 km². War-dro 130 den zo o chom e Cliara bremañ, pa oa bet betek 1600 a annezidi en XIXvet kantved, a-raok an Naonegezh Vras.
Emañ Cliara war-hed 5,6 km diouzh an douar-bras. Mont a c’haller di gant bigi a loc’h diouzh ur c’hal e-kichen Cluain Cearbán (Louisburgh).
Er Grennamzer e oa Cliara ul lodenn eus douaroù an tiegezh Ó Máille. Rivinoù o c’hastell a weler enni c’hoazh, koulz ha rivinoù un abati ma vije bet beziet Gráinne Ní Mháille.
![](http://178.128.105.246/cars-http-upload.wikimedia.org/wikipedia/commons/thumb/f/fb/Clare_Island.jpg/220px-Clare_Island.jpg)