Lamm (arm-tan)
![](http://178.128.105.246/cars-http-upload.wikimedia.org/wikipedia/commons/thumb/9/91/Calcio_winchester.jpg/220px-Calcio_winchester.jpg)
Al lamm, lamm-fuzuilh, pe horzh-fuzuilh zo ur pezh eus un arm-skoaz a gaver a-dreñv ar c'hanol. E bal eo aesaat ar bukañ hag izelaat efedoù an argil war an arm en ur stabilaat anezhañ.
Asambles gant ar fust e c'hall bezañ al lamm ur skor evit pezhioù all an arm evel ar c'hanol hag ar blatinenn. Mont a ra al lamm eus penn an arm betek takad an draen. Ennañ e c'haller kavout un c'hombod da renkañ ostilhoù, munisionoù pe dafar all. Toull e c'hall bezañ da skañvaat an arm. Difiñv e oa al lammoù war an armoù-skoaz koshañ. Bremañ e kaver ivez lammoù teleskopek pe plegus. E koad, metal pe danvezioù sintetek e c'hall bezañ graet al lammoù.
Er brezelioù da skouer, en un emgann krog-ha-krog, e c'hall servij al lamm da skeiñ gant un enebour.
![](http://178.128.105.246/cars-http-upload.wikimedia.org/wikipedia/commons/thumb/3/3a/Jagdliche-Hinterschaefte.png/220px-Jagdliche-Hinterschaefte.png)
Stummoù lammoù disheñvel
[kemmañ | kemmañ ar vammenn]Stummoù disheñvel a zo d'al lammoù-fuzuilh. Divjod a c'haller kavout war o c'hostez ivez, da lavaret eo seurt bosoù.
- Lamm saoz, eeun, hep dornikez[1] ;
- Horzh gouzoug alarc'h, garbet ;
- Lamm pistolenn, dezhañ un dornell evel hini ur bistolenn da aesaat ar c'hregiñ en arm ;
- Lamm Monte-Carlo, uheloc'h e nec'h evit ar re all ;
- Lammoù savet gant an armeurer gall Verney-Carron evel an horzh toull biz-meud pe an horzh born evit an dennerien zo disheñvel kostez o lagad mestr evit hini o dorn mestr [2].
Lammoù plegus
[kemmañ | kemmañ ar vammenn]![](http://178.128.105.246/cars-http-upload.wikimedia.org/wikipedia/commons/thumb/e/e9/Victory_Show_Cosby_UK_06-09-2015_WW2_re-enactment_Trade_stalls_Militaria_personal_gear_replicas_reprod.originals_zaphad1_Flickr_CCBY2.0_Uzi_submachine_guns_for_sale_IMG_3882.jpg/220px-thumbnail.jpg)
War armoù zo e c'haller plegañ o lamm evit ma kemerfe nebeutoc'h a blas. Da gentañ e oa bet ijinet ar sistem-mañ evit an harzlammerien o doa ezhomm da lampat er-maez eus ar c'harr-nij hep ma ne stokje o arm ouzh toull an nor. Abalamour da se e stager ar rakger para da fuzuilhoù zo da zikouez eo plegus o horzh, evel evit ar Para-FAL da skouer. E Rusia e stager al lizherenn S d'an armoù-se (evit Skladnoy, "plegañ)"[3].
Priziet eo ivez al lammoù plegus e-touez ar soudarded kaset gant kirri-houarnet evit gounit plas e-bourzh o c'harbedoù pe gant reoù an Nerzhioù ispisial a rank bale gant o arm e-pad pell a-wechoù.
Lamm teleskopek
[kemmañ | kemmañ ar vammenn]![](http://178.128.105.246/cars-http-upload.wikimedia.org/wikipedia/commons/thumb/c/ce/MilitaryGunstocks_NEW.jpg/220px-MilitaryGunstocks_NEW.jpg)
Gant ul lamm teleskopek e c'haller berraat an arm da zougen anezhañ hag azasaat e hirder hervez ezhommoù ha ment an tenner. Ar sistem-mañ a gaver muioc'h-mui war an armoù-skoaz brezel evel ar garabinenn Colt M4, ar fuzuilh-arsailh CZ Bren 2 pe fuzuilh-arsailh standart nevez an arme gall, an HK 416. Fuzuilhoù-chase evel ar Benelli M4 A1 o deus ul lamm plegus ivez.
War an armoù-dorn
[kemmañ | kemmañ ar vammenn]Dornell pe dornikez a raer kentoc'h eus lamm un arm-dorn. E dornell ur bistolenn e lakaer ar munisionoù abalamour e siler ar c'harger ennañ. War bistolennoù pe revolverioù zo e c'haller ouzhpennañ ul lamm evit bukañ aesoc'h.
Daveennoù
[kemmañ | kemmañ ar vammenn]- ↑ (en) Straight, swan neck, Monte-Carlo, pistol: what’s it all about? war al lec'hienn Browning.eu, 06/09/2019 (lennet d'ar 17/01/2024)
- ↑ (fr) Les différents types de crosses de Verney-Carron war Chassons.com, 24/12/2015 (lennet d'ar17/01/2024)
- ↑ (en) Gordon L. Rottman, The AK-47 : Kalashnikov-series assault rifles, Oxford, Osprey Publishing, dastumad « Weapon », 2011, p. 20